Read anuak 2 Körin 13 Bible Online

2 Körin 13 - anuak bible

2 Körin 13

¹Man beeye dää wäädhi jïra ki man ööa baŋu. 'Ba nee da luubö mo di caanø, wär caan ni da jiy ariiø wala adäk mo ŋäc gø.

²'Ba jøøa kwøŋ bääyö dïkwøŋ ki jø møga bëët yaa nø köömmö. 'Ba a cäŋa ge köömmö ennø kany pooda naa tøør, kaawat mana caana gø jïge kanya ena dïge ri riet lïïmmö mara, ni ni näk maa cäŋa öö, ge ba wiia.

³Kiper u wø köö nou manynya ŋïï nee jootu ki man näk mo Krictø cäänö ki raa. Eni ba jääk ki man cääne ki uuni, 'ba eni wø tïïya tïïc mo teek dïïu.

⁴Kiper ena 'näk bäät jaadha no odëëdö ni jääk, ni cäŋ kwøwø ki køør teek Jwøk. Kaawat manøgø thuwø, waani, wa jägö ki ree, 'ba waano kwøw ki eni ki køør teek Jwøk, nou tïnywa.

⁵Pëënynyu dëëtu, nee jootu ki man näk mou poot bëëdö ri ŋäädhe mana näk adïëri. Päänynyu rou. ?Aŋø, ŋäyu møn ni Jecu Krictø ena cwïnynyu? Wala kanymør uuno nø pädhö ri päänynyö manøgø.

⁶Aani, yaa ŋäädhö ni wa jootu joodø ni wa kär pädhö.

⁷'Ba Jwøk wø lamwa lamø kiper nou ba bääyu, ni paa kiper nee wa joot ni wa kär pädhö ki päänynyö manøgø, 'ba kiper nou tïmö nou tïïya gïno beer, këël wa doo nëënö keda waano pädhö.

⁸Kiper bäŋ gïn mo raac mo maarwa tïïc ŋëët gïn ma adïëri, 'ba wa wø tïnynya adïëri keere.

⁹Kiper yïthwa met kany wø jääkwa ni teegu. Ni wa wø lämö kiper nee bëëtö maru thur kare ni beer.

¹⁰Ni beeye tiere na gööra gïï kany pooda naa tøør buutu en, kiper kanyo ööa naa ba cääna ki teek mara mana wëëk Wuue aani, teega wëëk aani kiper nou tëënnu, ni patha kiper nou raanynya.

¹¹'Ba ennø, nyïïmera, turu paar nø. Bëëdu ki bëëtö mana beer. Leŋŋu kwac mara. Mëërru ki røgu. 'Ba Jwø wø cïp mëër ki bëët-mëër oen buutu.

¹²Määthu røgu ki nuum dhøk mana en kur keere na mar Jwøk.

¹³Uuna määth jø Jwøki bëët.

¹⁴'Ba met yi Kwäärö ma Jecu Krictø, ki mëëc Jwøk, ki dwätö mar Jwïëc Jwøk na en kur keere en bäätu bëët.