Read anuak 2 Körin 3 Bible Online

2 Körin 3 - anuak bible

2 Körin 3

¹?Aŋø, man acäŋ tïmö ni wa nyootha dëëtwa ennø? ?Da weeli mo dewa manynyø man gööri kiper nee wa ŋäyu ki ge, kaawat man wø tïïc jø møøki? ?Wala wa doo kädö baŋu ki weeli?

²'Ba uuni ki dëëtu, uuna wëël ŋïï marwa mo ogöör cwïnywa, ni wø kwaan jø bëëti ni ŋäcge gø.

³Ni røgu you nyoodhø ni uuna wëëlö mar Krictø na cïpwa, mo ba göör ka peen, 'ba göör ka Jwïëc Jwøa kwøw, ni paa ogöör bäät opäp kïte, 'ba ogöör bäät opämi moa näk cwïny jiy.

⁴'Ba luummögø caanwa ka køør ŋäädhe marwa na en cwïnywa ki køør Krictø ki nyïm Jwøk.

⁵Ni wa ba caar gø ni waano rømø ki man köwa ni beeye waani wø tïïc jammi. 'Ba beeye Jwøk ni wø tïïc wa ni waano rømø,

⁶ŋata wëëk wa rømø ki man tïnywa luubö mana nyään na tuut Jwøki ki jiy, na näk patha ciik mo ogöörö, 'ba ena ri mo Jwïëc Jwøk. Kiper ciik mana näk ogöörö wø duua thøø, 'ba Jwïëc Jwøk wø cïpa kwøw.

⁷?'Ba ni näk Ciik Modhe na näk ogöör bäät opäm kïdi na bwöth baŋ thøø oöö ka ajiem mo kär løny jï jø Icriel ki man neenge täärnyïm Modhe kiper taye, këël na bëët tayøgø ni cäätha piny,

⁸a tïïc mar Jwïëc Jwøk a dee bäŋ ajiem mare nidïï mo kaala gø?

⁹Kiper ni näk Ciik Modhe ni wø cïp ajäla ree da ajiem, ajiem tïïc man wø cïp bëënynyö doo dwøŋŋa eni.

¹⁰Ka adïëri møn, gïna kwøŋ ajiemmi en dëëre atïmö ni bäŋ ajiem dëëre këët, kiper ajiem mana kaal gø.

¹¹Ni näk gïna jøøl oöö ka ajiem, gïno bëëdö, ajieme doo dwøŋŋa eni.

¹²'Ba kiper mana näk jïwa da ŋäädhe ma enøgønø, wa cäänö ni cwïnywa da cer.

¹³Ni wa ba caal Modhe na rïëp täärnyïme ka abïï, kiper nee thumö mar ajiem na many man jøøle nee ba raŋ jø Icrielli.

¹⁴'Ba cwïnyge adøøc mo teek. Këël dïcäŋi en, kany wø kwaange luumma kwøŋ Jwøki tuut ki jiy, abïïnøca poot bëëdö kare ni kär käl wøk. Kiper beeye Krictø keere noo käli wøk ki køøre.

¹⁵Adïëri møn, këël dïcäŋi en, kany wø kwaan luup Modhe, acaara marge poot no orïëp gïnögø na caal abïï man wø rïëp wïc.

¹⁶'Ba kany wø ö dhaanhe wø løø ree baŋ Wuuö, abïïnögø odaaø.

¹⁷Kiper Wuuö beeye na Jwïëy. Ba kany wø en Jwïëc Wuuö yie, jiy opädö kanyøca.

¹⁸Ni øøni bëët, ø neeta ajiem Wuuö ni bäŋ abïï mo orïëp wïthø, ni øøno røø ni ø caala kïte ni øøno wëëk koor ajiem man nø ni cøøø baŋ man nø. Ni gïnögø wø ööi ka baŋ Wuuö na näk Jwïëc Jwøk.