Read anuak 2 Körin 4 Bible Online

2 Körin 4 - anuak bible

2 Körin 4

¹Kiper manøgønø, na tïme ni tïïc man ni tïïcwa en, jootwa ka køør met yi Jwøk, cwïnywa ba wëëkwa pädhö.

²Waani tïï atade ni wø määnö akwierwa, ni wa ba caath jöör riek waŋ, wala ki man wiilwa luum Jwøk. 'Ba dëëtwa ewa nyoodhø jï jiy bëët nyïm Jwøk ki køør luumma näk adïëri ni wø køpwa ni wïnyö jaak.

³'Ba këël ni näk luumwa na nyään na met ogëëŋö, gëëŋ ka kur jø wø raanynyi keerge.

⁴'Ba beeye jwø pinyi en na wëëk jøøa kär jïëy cøørø, nee tac luumma nyään na met mar ajiem Krictø nee ba neenge, ŋata kïte caal kït Jwøk.

⁵Kiper wa ba køp dëëtwa, 'ba wa køpa gø ni Jecu Krictø beeye Kwäärö, ni waani ki dëëtwa waana laaŋe mou kiper nyeŋ Krictø.

⁶Kiper beeye Jwøk na köö, ni «Tar rienye yi muudhö,» na wëëk tar rieny yïth cwïnynyø, nee tay ajiem Jwøk ni en täärnyïm Krictø wëëk ŋäc.

⁷'Ba gïnö ni pere leth ni en jïwa en, okan yïth dääk odhöönh, nee ŋäc ni teegøgø ni dwøŋ enø, wø ena jï Jwøk ni patha marwa.

⁸Gïï mo leth wø jwørwa jwørø ki yïth jammi bëët, 'ba wa bäŋ wø ŋiithge. Yïthwa wø thäŋŋö, 'ba yïthwa ba cwat.

⁹Waana caanni, 'ba wa kär wec Jwøki. Wa wø di pöötö, 'ba wa kär ränynyö.

¹⁰'Ba waani, wa wø käära thøw Jecu ki dëëtwa cooth, kiper nee kwøw mar Jecu joot dëëtwa thuwø.

¹¹Kiper kany pootwa ni wa kwøw en, waano wëëk thøø cooth kiper nyeŋ Jecu, kiper nee kwøw mar Jecu joot dëëtwa ni bëën thøø en.

¹²Kiper manøgønø, thøø tïïö dëëtwa, ni ö kwøwi ni tïïe dëëtu.

¹³'Ba kiper mana tïme ni jïwa da teeŋ ŋäädhe aciel ki ŋata göödö, ni «Aana jïëy, ni beeye na cääna,» waani thuwø, waana jïëy, ni beeye ni cäänwa en.

¹⁴Ni ŋäcwa ni ŋata tïŋ Kwäärö ma Jecu maal, waano tïŋ maal thuwø ki Jecu, ni kïth waani nyïme ki uuni na aciel.

¹⁵Ni gïïögø bëët tïïc kaperu, kiper kanyo nyaa met yi Jwøki baŋ jiy, nee dwøk met ec jï Jwøk pälle, ni jït Jwøki ka ajiem.

¹⁶Kiper manøgønø, cwïnywa ba pädhi. Këël na näk dëëtwa moi ni wøk ii oränynyö, yïth cwïnywa wø døøya mo nyärö cooth.

¹⁷Kiper gïn ni thiinh ni leth noo laar pöödhö en, jiiŋŋa waani kiper ajiem mana näk adïëri na näk bäŋ cuŋŋe na bäŋ gïn pääri ki gø.

¹⁸Kiper wa ba neet gïï mo nëënö, 'ba wa neeta gïï mo ba nëëni. Kiper gïï wø nëëni wø laara jøølø, 'ba gïï wø ba nëëni beege gïïa näk adïëri na näk bäŋ cuŋŋe.