Read anuak 2 Körin 5 Bible Online

2 Körin 5 - anuak bible

2 Körin 5

¹Kiper ŋäcwa ni ni näk abïl bëëtwa yie pinyi en onyaaø, jïwa da øtø[1] baŋ Jwøk, mo ba tïïc ka ceŋ, ni beeye øtø mana näk adïëri na en maal ni wø bëëdö na bäre bäre.

²'Ba kawaane wa cooyø møn, ni wa neeta øtø marwa ni en maalø nee røø dëëtwa,

³ni kïth bäätwa kaper nee wa ba joot ni wa cäädhi ka dëëtwa.

⁴Kiper kany pootwa ni wa ena ya abïlli en, wa wø mïïmmö ki gïno tägi. Ni patha kiper ni wa doo tïmö ni bäŋ abïï dëëtwa, 'ba wa doo manynya man røc waani ki mør, kiper nee gïn ni wø bëën thøø en mwøny kwøwi.

⁵'Ba ŋata jiiŋ waani kiper gïnögø kiree beeye Jwøk, ŋata wëëk Jwïëye waani na kuri.

⁶Kiper manøgø nø, cwïnywa wø makwa maa cooth ni yïthwa met. Ni ŋäcwa ni kany pootwa ni wa bëëdö ka dëël man en, wa tøør buut Wuuö.

⁷Kiper wa cäädhi ka ŋäädhe, ni patha gïn mo di neenø.

⁸Ni cwïnywa ewa maa ni yïthwa met, ni doo beerra eni ki mana dewa tøør ri dëël man, ni enwa buut Wuuö.

⁹Kiper manøgø nø, nee wa ena kany wala wa tøør kany, wïthwa poot ewa këël ri gïï wø met yie ki ge.

¹⁰Kiper øøni bëët ø cuŋŋö nyïm thunh løøk mar Krictø, nee ŋati man nø jïte ki gïno joode na näk orømø ki gïïa tïïe na en ri dëël, nee gïï mo beyø, wala gïï mo reyø.

¹¹Kiper manøgønø, na ŋäcwa gø ni Wuuö di lwäärö, jiy wø cøkwa cøgø. 'Ba man en cwïnywa ŋäya Jwøki, ni yaa ŋäädhö ni ŋäyu thuwø ki cwïnynyu.

¹²Wa ba cäŋ dëëtwa nyoothø jïïu, 'ba wa wëëga uuni atöör kiperwa, kiper nee maar lønyø jïïu ki man duunnu jø wø töödö kiper dëër dhaanhø man ni wøk en, ni patha kiper gïn mo ena cwïnye.

¹³Ni näk waana bøøre, wa bøøl kaper Jwøk, 'ba ni näk wïthwa leer, leer kaperu.

¹⁴Kiper mëëc Krictø wa ee maa, kiper ewa jïëö ni da dhaanhø aciel mo othøw kiper jiy bëët. Kiper manøgønø, jiy bëët athøw.

¹⁵'Ba ena thuunh jiy bëët, kiper nee jøøa kwøw bëënge eni na thøw kiperge ni tïŋi maal, ni ge ba bëën dëëtge këët.

¹⁶Kiper manøgønø, kawaane bäŋ dhaanhø mo caarwa ni dhaanhø jaak. Këël na kwøŋwa Krictø caar ni dhaanhø jaak, eni ba caarwa na enøgønø këët.

¹⁷Kiper manøgønø, ni näk mo dhaanhø ena dëër Krictø, eno cwääö ni nyään. Ni ö bëëtö mana näk oruuö ni aae, ni tïm jammi bëët ni nyärö.

¹⁸Ni moi bëët käla baŋ Jwøk, ŋata cäŋwa dwøk kanya ciel ki eni ki køør Krictø, ni wëëk wa tïïc man cäŋ jiy dwøk kanya ciel ki Jwøk.

¹⁹Ni beeye, ni Jwøk ena dëër Krictø ni dwøga piny baŋe, ni eni ba caan moa dhal jø pinynyi dëëtge, ni wëëk wa twiel man cäŋ jiy dwøk kanya ciel ki eni.

²⁰Kiper manøgønø, waana kar dhøk mo Krictø, ni Jwøk jiy wø köömme ka køørwa. Wa kwaaya uuni ki køør Krictø ki man døøu kanya ciel ki Jwøk.

²¹Kiper ŋata kuc raay atïïe na ŋat raay kiperø, kiper nee ø bëënynyø ki beeny Jwøk ki køøre.