Read anuak 2 Körin 6 Bible Online

2 Körin 6 - anuak bible

2 Körin 6

¹'Ba waana tïmö ni wa tïïö ka Jwøk na aciel, ni wa köömma uuni nee met yi Jwøk ba jïëyu ki dhøgu jaak.

²Kiper eni wø köö, ni «Maru awïnynya kanya näk kare, ni kønya uuni dïcäŋa näk cäŋ pïëm man piem jiy ki gø.» 'Ba beeye kanya näk kare ennø, ni beeye cäŋa näk cäŋ pïëm man piem jiy ki gø ennø.

³Bäŋ ŋat mo jööre kïthwa ki dïdëët, kiper nee bäŋe ŋat mo jøøŋ tïïc marwa.

⁴'Ba dëëtwa ewa nyoodhø ki yïth jammi bëët ni waana laaŋe mo Jwøk ki køør gïï wø leth døc wø jïënywa, teeŋ ka gïï wø pïï dëëtwa, ki caannø, ki rïm can,

⁵ki pöödö, ki tööyö, ki dïŋaŋ, ki öölö, ki bäŋ niine, ki bëët käc.

⁶Ni dëëtwa ewa nyoodhø ki køør mana ciilwa ki raay, ki køør ŋäc luup, ki cïp cwïny piny, ki bäth ec, ki køør teek Jwïëc Jwøk na en kur keere, ki mëër mana näk adïëri,

⁷ki køør caan luup na adïëri, ki køør teek Jwøk, ki køør jap leny mar cer cwïïc ki cer caam, na näk beeye bëënynyö.

⁸Ni dëëtwa ewa nyoodhø kany wø wøør waani, ki kany wø ba wøør waani, ki kany wø waac nyeŋwa ni wa reyø, ki kany wø pwøc waani. Ni waano caarø ni waana jø cwøk, këël na näk marwa adïëri.

⁹Ni caar wa ni wa kuc, këël na ŋäc wa døøc. Ni wa wø cööpa kany mo cään ki thøø, 'ba wa wø cäŋa kwøw. Waani, wa di pöötö, 'ba wa bäŋ wø 'näk.

¹⁰Ni kïmwa, 'ba yïthwa wø poot mïnnö cooth. Wa wø cännö, 'ba jiy mo thööth poot wëëkwa kwärö. Ceŋwa wø dar, ni poot jammi bëët na mowa.

¹¹Waani, bäŋ gïn mo ewa mooŋø jïïu, u na jø Körin. Cwïnywa ewa jabø jïïu,

¹²ni yïthwa ba diir ki uuni, 'ba beeye uuni na yïthu diir ki waani.

¹³'Ba man, a cäänna uuni kaawat man wø cään obwöre, japu cwïnynyu jïwa thuwø.

¹⁴Kär dëëtu kuupu ki jiy mo kär jïëy. ?Aŋø, bëënynyö ki rääö a dege dwätö na aciel nidïï? ?Wala a tuuŋa ŋø ni en yïthakic tar ki muudhö?

¹⁵?Wala a tuuda ŋø ni en yïthakic Krictø ki Biliel?[2] ?Wala agïnaŋø noo gääp ŋat mo ojïëy ki ŋat mo kär jïëy?

¹⁶?Wala Øt Jwøk ojïëe ki gïï wø lam nidïï? Kiper øøna øtø mar Jwøa kwøw, kaawat mana caan Jwøki, ni «Aano bëëdö ki geni ni cäädha dïge, ni tïma ni aana Jwøk marge, ni tïmge na jiya.»

¹⁷«Kiper manøgønø, ocaan Wuuö Jwøki, ni ‹Ööu wøk dïge, ni pääu ki geni, ni bäŋe gïn mo gutu mo ba waany. Kanyøgø nø, uuno pänhnha.› »

¹⁸«Noo caan Wuuö Jwøki na en teeki jïre, ni ‹Aano tïmö ni aana Wuuö jïïu, ni tïmu ni uuna wääta ki nyïïa.› »