Read anuak 2 Körin 7 Bible Online

2 Körin 7 - anuak bible

2 Körin 7

¹'Ba omëëya, kiper mana tïme ni gïïögø buuka jïïø nø, beerra man døøyø dëëtø mo waany ki gïï wø raany dëël ki jwïëy, ni tïïø bëëtö mana en kur keere no othur kare ni ø lwäära Jwøk.

²Uuni, japu cwïnynyu jïwa. Bäŋ gïn mo raac mo ewa tïïö dëër ŋat mør, ni bäŋ ŋat mo ewa raanynyø. Ni bäŋ ŋat mo gïre ewa mødø.

³Aani, gïnögø ba caana naa jääla uuni. Kiper akwøŋa caan ki man näk mo wa lääŋŋa uuni ki cwïnywa, ki man thøø na aciel wala man kwøø na aciel.

⁴Aani, cwïnya da ŋäädhe mo päl døc kiperu, naa töödö døc kiperu, ni cwïnya yaa cømø. Këël ni jøøcwa gïï mo leth en, yia poot met døc.

⁵'Ba këël na pïïcwa Macedönia, bäŋ jwöm mo ewa joodø. Waana jïtö ki gïï mo leth ki yïth jammi bëët. Ŋaap atïmö ni ena bäätwa, ni tïm cwïnywa ni lääŋŋa gïn mør.

⁶'Ba Jwøk ni wø cøm cwïny jø wø can, cwïnywa acøme ki køør ööny Tayta.

⁷Ni patha kiper öönynye keere, 'ba beeye kiper cøm cwïny mana cømmu cwïnye ki gø thuwø, kaawat mana køp äp cwïny maru jïwa, ki kïmmö maru, ki mëër maru ki aani. Manøgø yia acäŋ døøc mo met kiree.

⁸'Ba këël na näk cwïnynyu yaa raanynyø ki wëëlö mara, dëëra ba jääla, këël na kwøŋa dëëra jääl. Kiper ajooda ni wëëllögø cwïnynyu awëëk pädhö, këël na näk nyi kany mo thiinh.

⁹'Ba kawaane yia met, ni patha kiper mana räny cwïnynyu, 'ba yia met kaper räny cwïny maru na wëëk cwïnynyu løk. Kiper uuna tïmö nou kïmmi ka teeŋ kïmmö man wø many Jwøki, ni bäŋe gïn mo oraany uuni ki køørwa.

¹⁰Kiper teeŋ kïmmö man wø many Jwøki wø käla løk cwïny man wø bwöth baŋ pïëm man piem jiy ki gø, ni bäŋ jääl røk. 'Ba kïmmö mar pinyi en wø duua thøø.

¹¹Neennu a teeŋ acaara mo nyïëdi na jootu ki køør kïmmö manøgø ni wø many Jwøki, na a teeŋ piew cwïny mo nyïëdi na laaru dëëtu nyooth nou beyø, na a teeŋ räny cwïny mo nyïëdi, ki lwär, ki äp cwïny, ki cïp cwïny køør gø, ka ajäla na cïpu. Ki yïth japøgø bëët røgu anyoothu ni bäŋ gïn mo ogwäyö jïïu ri luummögø.

¹²'Ba këël na göönna baŋu, a ba göön baŋu kaper ŋata bääyö, wala ŋata bääyö dëëre, 'ba a göönni kaper nee mëër maru ki waani nëëne jïïu nyïm Jwøk.

¹³Kiper manøgønø, cwïnywa acøm. Ni patha cøm cwïny mana cøm cwïnywa ki gø keere, 'ba yïthwa acäŋ mïnnö døc na neenwa Tayta ni yie met, kiper cwïnye acïbu piny karubëët.

¹⁴'Ba ni näk Tayta yaa cäännö naa töödö kiperu, wïïa kär lääö. 'Ba kaawat mana bëët japa caanwa jïïu bëët na adïëri, atöör marwa nyïm Tayta ajoot na adïëri thuwø.

¹⁵'Ba Tayta cwïnye puta tïmö ni ena baŋu kiree, kany wø par gïru na leŋŋu dwøre karubëët, kanya pänhnhu eni ki lwär, ni dëëtu kwanynyi.

¹⁶Aani yia met, kiper u yaa ŋäädhö møn.