Read anuak 2 Körin 9 Bible Online

2 Körin 9 - anuak bible

2 Körin 9

¹'Ba kawaane bäŋ gïn maa doo göönna baŋu këët kiper muuce mo wø cïp jï jø Jwøk moa en Judia.

²Kiper ŋääa ni beeye mana manynyu ki cwïnynyu, ni beeye ni wø tööda kiperu nyïm jø Macedönia, ni wø caana ni uuni na jø Akeea dëëtu you nø jiiŋŋø cwiina pöödhö. 'Ba thööthge cwïnyge ajïtö ki luum køny thuwø kiper maru na nieŋ cwïnynyu ree.

³'Ba a jääŋŋa nyïïmëëe naa atöör marwa kiperu ba joot no oballe jaak ri luummögø, kiper nee japu jiiŋŋu kaawat mana caana gø jïge ni japu you nø jiiŋŋø.

⁴Kiper noo näk da jø Macedönia møøk mo öö ki aani, nou ba cwänge nou poodi, ni tïm wïthwa ni laay kiper mana ŋääthwa uuni døc. 'Ba laac wïc maru ba caana nø.

⁵Ni beeye na caara gø ni beer ki man laar nyïïmëëe ö baŋu naa poodi, nee muuce moøgø na buugu yøø nee jiiŋge dïkwøŋ, kiper nee tïme no onø jiiŋŋø, na muuy mo cïp ka met ec ni patha gïn mo mak ka teek.

⁶'Ba tiere beeye en, ŋat wø pïïdhö ni cere ee noogø, ociek jïre thuwø no onoogø. 'Ba ŋat wø pïïdhö ni ee møgø, ociek jïre thuwø no omøgø.

⁷'Ba ŋati man nø, wär cïpe ki mano näk ee cooŋø ki cwïnye, ni ba cwiigi, wala eni mak ka teek. Kiper Jwøk wø mëër ka ŋat wø cïpi ki met cwïny.

⁸Kiper løny jï Jwøk ki man gwïëth uuni døc ki yïth jammi bëët, nou bëëdu ni jïïu da jammi mo orømø cooth, nee u cïpö døc kiper tïïe bëët mo wø beyø cooth.

⁹Kaawat mana gööri, ni «Jape wø keethe keethø, ni mooc jøøa can. Ni beenynye wø bëëdö na bäre bäre.»

¹⁰'Ba ŋat wø cïp köödhi jï dïpïïdhi ki møø kiper cam, uuno mooe ni meet japu, ni put uuni tïïc nou kønya can jiy cooth.

¹¹Uuni, uuno kwär ki yïth jammi bëët nee yïthu bänhge døc ki muuc, man wø käl dwøk met ec jï Jwøk ki køørwa.

¹²Kiper tïïc manøgø ba køny can jø Jwøk keerge, 'ba duua dwøk met ec mo päl jï Jwøk thuwø.

¹³Kiper tïïögø nyootha bëëtö maru, ki man näk mo uuno tïmö nou jiema Jwøk ki køør mana leŋŋu luumma nyään na met mar Krictø na jïëyu, ki man cïpu ki muuce mo thööth ki bäth ec kiperge ki jø møga bëët,

¹⁴kanyo bëëtge ni ge lääŋŋa uuni, ni ge lämö kiperu, ki køør met yi Jwøk na päl ni en cwïnynyu.

¹⁵Pwøc en jï Jwøk kiper muuy mare na bäŋ gïn pääri ki gø.