Read anuak Galeecia 1 Bible Online

Galeecia 1 - anuak bible

Galeecia 1

¹Aana Pøøl na nyïïatwiel, ni twiel mara ba jooda baŋ jiy ni ba wïnynya baŋ dhaanhø, 'ba jooda baŋ Jecu Krictø, ki Jwøk na näk Wuuö, na tïŋ gø maal ki yi thøø.

²Aani ki nyïïmëëe moa en buuta bëët, wa göönna baŋ acook Jwøk mo Galeecia.

³Met ec bëëde bäätu ki bëët-mëër man wø ööi ki baŋ Jwøk na näk Wääø, ki Kwääyø ma Jecu Krictø,

⁴ŋata cïp dëëre kiper raay moø, nee ø pieme yi piny man en ni raac en, kaawat mana many Jwøø na näk Wääø,

⁵ni beeye na doo jiemø, këël na bäre bäre. Enøgønø.

⁶Aani, yia athäŋŋö kiper na laaru eni wec na cwøl uuni yi mëëc Krictø, ni løøu røgu baŋ teeŋ luubö mør mo nyään.

⁷'Ba luummögø paa luumma nyään na met. 'Ba da jø møøk mo kiera wïthu, ni ge manynya man wiilge luum Krictø na nyään na met.

⁸'Ba këël doo naa waani wala nyïïatwiet maal, ni näk da ŋat mo køpa luubö mør jïïu mo patha luumma nyään na met mana kwøŋwa køp jïïu, ŋatøca, acïëni oen bääte.

⁹'Ba, kaawat mana kwøŋwa gø caan, këël kawaane cäŋa ka caannø, ni nee da ŋat mo køpa luubö mør jïïu ni patha luumma nyään na met mana kwøŋu jïëc, ŋatøca, acïëni oen bääte.

¹⁰?Aŋø, aani kawaane, a manynya man ö jiyi ni pwøcge aani, ni patha pwøc mar Jwøk? Wala, a manynya man døøya yïth jiy mo met? Onää a poot døøya yïth jiy mo met, a bäŋ doo tïmö ni aana laŋŋø mar Krictø.

¹¹'Ba a caana gø jïïu, nyïïmera, ni luumma nyään na met na køba, patha luum dhaanhø.

¹²Kiper luummögø kära wïnynyö dhi dhaanhø, naa kär pwönynyö ki gø, 'ba beeye Jecu Krictø na nyooth gø jïra.

¹³Ni ŋäyu bëëtö mara dïkwøŋ na en ri lam jø Juuth, kaa mana gëëma ka acooŋ Jwøk ni raac døc kiree, naa manynya man raanynya gø.

¹⁴Ni aano kadhø ri lam jø Juuth, ni tïëŋwa mo thööth yaa kaalø dï jø powa, kiper cwïnya yaa cïbö døc køør kööŋŋe mo kwäya.

¹⁵'Ba eni na cïp aani kur keera naa poot kär nywølø, na cwøl aani ki met ec mare,

¹⁶kanya tïm yie ni met ki man nyooth Wääde jïra, nee gïre køba jï juurre bëët, bäŋ ŋat mo yaa pëënynyö ka acaara.

¹⁷Naa kär døø Jerucalem baŋ jøøa näk nyïïatwieli kanya pooda. 'Ba aana put ci ya Areebia. Køøre, aana cäŋ døø yi Damacka.

¹⁸'Ba na tïme na køør cwiiri adäk, aana døø yi Jerucalem kuna liimma Piter, ni bëëtwa ki eni ki nïne apaar kurbïïc.

¹⁹'Ba bäŋ ŋat mo yaa joodø dï nyïïatwieli, 'ba beeye Jeemeth na näk cöök Kwäärö ma Jecu keere na jooda.

²⁰'Ba luup moi ni gööra baŋu ii, nyïm Jwøk, a ba caan tööt.

²¹Køøre aana aa yïth mïëc Ciria ki Cilicia.

²²'Ba dëëra poot kuc acook Jwøk moa en dëër Krictø yi Judia.

²³'Ba mana wïnyge keere na caan, ni «Ŋata wara gëëmö ki øøni, atïmö ni køpa gïr ŋäädhe mana wara manynye nee raanynye.»

²⁴Ni pwøcge Jwøk kipera.