Read anuak Galeecia 4 Bible Online

Galeecia 4 - anuak bible

Galeecia 4

¹'Ba mana caana, beeye ni lwiidhø kanyo poode ni thiinh, bëëdö kaamar laŋŋø, këël na näk jammi bëët moe.

²'Ba eni bëëdö ni wïnynya luum jøøa piith gø ki jøøa en jammi moe ceŋge, këël kanyo ö cwiina caan wänni.

³Ni øøni, marø poot na enøgønø thuwø. Kanya poodø ni ø therø, øøna laaŋe jï juu mo bäät piny.

⁴'Ba na ö kanya wäŋŋi na thur kare, Jwøk Wääde ajääŋŋe, ni nywøli ya dhaage ni ciik Jwøk ena bääte,

⁵kiper nee jøøa en ciik Jwøki bäätge, nee wïïl wøk, nee ø tïïe na wääte.

⁶'Ba kiper mana näk uuna wääte, Jwøk Jwïëc Wääde ajääŋŋe yïth cwïnynyø, ni wø jwöŋi na «Abba, Awuuö.»

⁷'Ba kawaane, kiper mana tïïc Jwøki, ï patha laŋŋø këët, 'ba ïïna wäädö. 'Ba ni näk ïïna wäädö, ïïna lwiidhø møn.

⁸Dïkwøŋ kanya poodu ni Jwøk kuyu, u bëëdö ni uuna laaŋe jï juu mo paa adïëri.

⁹?'Ba kawaane na tïmu ni Jwøk ŋäyu, ni doo beerra mana daa köö, ni uuna tïmö nou ŋäc Jwøki, uuna dou cäŋ døø baŋ juu moøgø nidïï, na näk jïge bäŋ teek ni bäŋ karge, ni cäŋu tïmö ni uuna laakge en?

¹⁰Uuni, uuna tïmö nou gwøga cääŋŋe, ki dwäde, ki kwöra näk owäŋŋö yi cwiir, ki cwiiri.

¹¹Aani, yia athäŋŋö, ni kanymør tïïc mana tïïa dïïu aay jaak.

¹²A kwaya uuni, nyïïmera, tïmu kaamar mara, kaawat mana tïma kaamar maru. Bäŋ gïn mo raac mo you tïïö dëëra.

¹³Ŋäyu, ni luumma nyään na met na kwøŋa gø køp jïïu, køba kaper täw na mak aani.

¹⁴'Ba këël kanya bëëda naa tuu dïïu, ni u yaa öölö ki täw mara, u kär jøøm ki aani, wala da gïn mo raac mo you caanø dëëra, 'ba aana pänhnhu kede aana nyïïatwiel maal mar Jwøk, wala kaawat mana dou Krictø Jecu pänhnhö.

¹⁵?Agïnaŋø na tägö ri met ec mana kwøŋu joot? Kiper maru ajooda na adïëri, ni onää løny jïïu kar kaaca, nyeŋŋu dou gööna wøk, ni dou ge mëëk aani.

¹⁶?Aŋø, kawaane, aana tïmö na nyimän maru kiper na caana mana näk adïëri jïïu?

¹⁷Jøøgø ge mwøtha uuni døc, 'ba tier marge patha gïn mo beer. 'Ba ge manynya man køøge u wøk, nou tïmu nou pwøya geni.

¹⁸'Ba ni näk mo dhaanhø mwøth kaper tier gïn mo beer, doo beer ki mana dii mwødhø cooth, ni paa kany wø ena buutu keere.

¹⁹U na nyïïa, cwïnya ajïtö ki gïn mo caala mäc lwaar kiperu, këël mano tïm Krictø ni ena cwïnynyu.

²⁰Beer kaa ena buutu kawaane ennø. A doo cäännö ki uuni mëëth. Kiper yia anithay ki maru.

²¹Caannu jïra, u ni many bëëtö ni ciik Jwøk ena bäätu en, ?luup moa en yi ciik Jwøk bäŋ wø wïnynyu?

²²Kiper ogöörö, ni Eeberam jïre da wääte ariiø. Aciel nywøle ka laŋŋø, na aciel nywøle ka dhaagø mana cøøde.

²³'Ba wäädö mana nywøl laŋŋø, nywøl ka ri mo dëël, 'ba wäädö mana nywøl dhaaŋŋa näk ocøødø, nywøl ka køør mana buuk Jwøki.

²⁴Ni luummögø caala leer mo da tiere. Määrögø caala luup ariiø mo otuudö. Aciel käla ri Kïn Caynay, ni nyïïe nywøle yi laŋ. Ni beeye Eegar.

²⁵'Ba Eegar beeye Kïn Caynay ni en ya Areebia. Ni eni caala Jerucalem man en, kiper ena laŋŋø ki nyïïe bëët.

²⁶'Ba Jerucalem mana en maal paa laŋŋø, ni beeye eni na miiø.

²⁷Kiper ogöörö: ni «Yiï mïnne, ï na bwøc ni ba nywøl en. Tïŋ dwørï maal ni kwöŋŋï ki met ec, ï na dëërï bäŋ mäc. Kiper nyaana bëëdö keere, ajïtö ki nyïëdi, ni kaala cer nyaana näk jïre da dïcwøø.»

²⁸'Ba kawaane, nyïïmera, uuni, u caala Aydhak, ni uuna nyïï buuk.

²⁹'Ba keda mana ö ŋata nywöli ki ri mo dëël ni gëëme ki ŋata nywöli ki ri Jwïëc Jwøk, beeye ni jïëø ennø.

³⁰?'Ba agïnaŋø ni wø caan Wëël Jwøki? Wø köö, ni «Riemu laŋŋøgø wøk ki wääde. Kiper ba doo beer ki man ö o laŋŋø ni nywaakge olaawi ki o dhaaŋŋa näk cøøtø.»

³¹Kiper manøgø, nyïïmera, ø patha nyïï laŋŋø, 'ba øøna nyïï dhaaŋŋa näk cøøtø.