Read anuak Galeecia 5 Bible Online

Galeecia 5 - anuak bible

Galeecia 5

¹'Ba øøna pät Krictø, nee ø bëëdö ni øøno pädö. Kiper manøgønø, cuŋŋu nou teek. Ni ba cäŋu jïëy ki bëët laŋ ni caal twöc.

²'Ba kawaane a na Pøøl, a caana gø jïïu, ni ni näk uuno jïëy ki man daŋ uuni, Krictø u ba dee maara køny.

³A cäŋa mara caannø jï jiy bëët mo wø jïëy ki man daŋi, wär ŋäc ŋatøca ni ciik Jwøk karge bëët poot gwøe gwøø.

⁴U ni many man jïëc u ni maru beer ki køør ciik Jwøk, uuna ŋul wøk ri Krictø, ni tïmu nou tøør ri met ec.

⁵'Ba waani, wa jïta bëënynyö man ni ŋääthwa en, ki køør Jwïëc Jwøk ki ri ŋäädhe.

⁶'Ba ki jï jø wø en dëër Krictø Jecu, daŋ wala bäŋ daŋ bäŋ gïn tïïcge, 'ba gïn mo pere leth beeye ŋäädhe ni wø tïïö ki køør mëër.

⁷Uuni, uuna kwøŋ rïïŋu ki ŋwïëy mo beer. ?Aŋø, aŋa na røøth nyïmmu ki man leŋŋu mana näk adïëri?

⁸'Ba teeŋ gïnögø ba käl baŋ ŋata kwøŋ uuni cwøl.

⁹Thømmø mo thiinh møø wø maae maaø bäre.

¹⁰'Ba Wuuö yaa ŋäädhö døc, ni uuno jïëy ki dwøl mara ni bäŋ dwøl mør këët. 'Ba eni ni kier wïthu enø, ajälle ojoode, këël ena ŋa jaak.

¹¹'Ba nyïïmera, aani, onää a poot køpa luum daŋ, doo bäŋ jiy mo gëëmö ki aani. Onää a poot køpa luum daŋ, doo bäŋ jiy mo män ki aani kiper køp luum jaadha no odëëdö.

¹²A doo naa manynya jøø ni kier wïthu yøøgø, mana dege mätge dïnö.

¹³'Ba nyïïmera, uuna cwøl nou bëëdu ni uuno pädö. 'Ba kär nou tïïya pät maru ni beeye jöö man tïïyu mo dëël ki gø. 'Ba ŋati man nø beerra man tïny ŋati man nø ki køør mëër.

¹⁴Kiper ciik Jwøk ki kare bäre wø thur kare ka ri luubö aciel, ni «Ï doo mëër ki ŋat mør kaawat man wø mëërï ki dëërï.»

¹⁵'Ba ni näk mou kaaya dëëtu ni møønnu rou, dëëtu wär gwøgu, nee dëëtu ba raanynyu.

¹⁶'Ba a caana gø jïïu, ni caathu køør Jwïëc Jwøk, ni ba jïëyu ki gïï wø cac dëëlli.

¹⁷Kiper gïï wø cac dëëlli män ki gïï wø many Jwïëc Jwøki. Ni ö Jwïëc Jwøki ni mäne ki gïï wø many dëëlli. Kiper gïïögø män ki rege, ni ge mäna uuni ki mana dou tïïö.

¹⁸'Ba ni näk uuno bwøth Jwïëc Jwøki, luum ciik Jwøk ba en bäätu këët.

¹⁹'Ba gïï wø tïïc dëëlli, ŋäc. Ni beege käp, ki rääö, ki bäŋ mak røk,

²⁰ki wøør juu møøk, ki thïëth, ki män, ki pïëm, ki keec, ki wëër, ki ŋäc røk keel, ki wëëye, ki pääŋ røk,

²¹ki gwönö, ki maath, ki meeye mo dëël oraanynyø, ki teeŋ møga bëët. A köömma uuni, kaawat mana kwøŋa u köömmö, jø wø tïïc teeŋ gïïögø, buc Jwøk ba dege joodø.

²²'Ba nyïëdi mo wø ööi ki ri Jwïëc Jwøk, beege mëër, ki met ec, ki bëët-mëër, ki bäŋ jøømø, ki bäth ec, ki køny, ki ŋääth dhaanhø,

²³ki mööl, ki män røk. Teeŋ gïïögøøni, bäŋ ciik aciel mo kwier ge.

²⁴'Ba jøøa näk mo Krictø Jecu, gïï wø many dëëlli agurge bäät jaadha no odëëdö, ki jape na reyø wø caye.

²⁵'Ba ni näk mo ø bëënna Jwïëc Jwøk, wär cäädhø køør mo Jwïëc Jwøk thuwø.

²⁶Kär dee atöör jïïø, ni bäŋe ŋat miin ŋat mør, ni bäŋe ŋat gwöni ki watge mør.