Read anuak Galeecia 6 Bible Online

Galeecia 6 - anuak bible

Galeecia 6

¹Nyïïmera, noo dee ŋat jootu no obääyö, u ni cwïnynyu en køør Jwøk, wär cou baŋe nou mwöl, ni dwøgu gø kare. 'Ba riï wär gwøgï, niï ba päänynyi thuwø.

²Beerra man ö ŋati man nø ni køny watge maya ki gïïa peek na kääre, nee ciik Krictø thur kare jïïu na enøgønø.

³Kiper ŋat wø caar dëëre keere ni kare dwøŋ, ni kare ba dwøŋ, eni cøøga ree keere.

⁴Beerra man ö ŋati man nø ni raŋ tïïc mare keere, no orømø. Køøre, gïno tööde kipere oen jïre keere, ni paa kiper mano pääny dëëre ki watge mør.

⁵Kiper ŋati man nø baanne okääre keere.

⁶'Ba ŋat wø pwönynyi ki luum Jwøk, wär jape na beyø bëët nywaae ki ŋat wø pöö.

⁷Kär dëëtu cøøgu. Jwøk ba maar cøøgø. Kiper gïn wø piith dhaanhe, beeye wø cäŋ kayø.

⁸Kiper ŋat wø piith gïï wø many dëëlli, beeye ränynyö noo kaae. 'Ba ŋat wø piith gïï wø many Jwïëc Jwøki, kwøw mana näk adïëri mo bäŋ cuŋŋe na en ri Jwïëc Jwøk okaae.

⁹Beerra man ba jøømø ki tïï gïïa beyø. Kiper øøno kää kanyo näk ma kare, ni näk mo bäätø ba wëëgø pädhö.

¹⁰Kiper manøgønø, kaawat man bëëdö ni da jöö jïïø en, beerra man tïïø ki gïï mo beyø jï jiy bëët. 'Ba jøøa døø kønyø røk beege nyïïmëëe moa näk jø Jwøk.

¹¹Neennu wëëlö man ni gööra ki cera jïïu ni nyeŋge døøŋŋø en.

¹²Jøø ni many man nyoothge dëëtge ni marge beer yøø, beege ni many man makge uuni ki teek nou daŋ. Ni tïïcge kaper nee bäŋe luubö mo leth mo caan dëëtge kiper jaadha no odëëdö mar Krictø.

¹³'Ba këël geni ki dëëtge na näk odaŋø, ciik Jwøk bäŋ wø gwøkge. 'Ba ge manynya man daŋ uuni, kiper nee ge töötge ki mano tïïc dëëtu.

¹⁴'Ba aani kara bäär ki teeŋ atöör manøgø, 'ba beeye luum jaadha no odëëdö mar Kwääyø ma Jecu Krictø keere ni daa tööda kipere, ni beeye na tïïc jap piny keda gïn mo ogur bäät jaadha no odëëdö ki baŋa, ni tïma ni aano thøw jï jap piny.

¹⁵'Ba daŋ wala bäŋ daŋ, bäŋ gïn mo dege tïïö, 'ba beeye cwääc mana nyään keere.

¹⁶Bëët-mëër ki met ec obëëdö bäät jø wø bëën luummi en, na näk jø Icriel moa näk adïëri mo Jwøk.

¹⁷'Ba køør man nø, kär dee ŋat mo ööl aani këët. Kiper aani, a käära pööc mo Jecu ki dëëra.

¹⁸'Ba u na nyïïmera, met ec mar Kwääyø ma Jecu Krictø obëëdö cwïnynyu. Enøgønø.