Read anuak Epeca 4 Bible Online

Epeca 4 - anuak bible

Epeca 4

¹Kiper manøgønø, a na tööny Wuuö, a kwaya uuni ki man bëëdu ki bëëtö mo orømø ki cwödö mana cwøl uuni kipere,

²nou mwöl ni bäŋ atöör cwïnynyu, ni bäŋ jøømø, ni cwïnynyu you cïp piny ki røgu ki ri mëër,

³ni cwïnynyu jööt ki man putu bëëtö ki cwïny aciel man wø cïp Jwïëc Jwøki, nou bëëdö ka bëët-mëër man wø dwal uuni.

⁴Kiper beeye dëël aciel ki Jwïëc Jwøk aciel, keda mana cööl u ŋäädhe aciel mano en nyïm na cwøl u kipere,

⁵ni beeye Kwäärö aciel, ki ŋäädhe aciel, ki lwøk aciel na nyuudhi,

⁶ni beeye Jwøk aciel na näk Wääø bëët, eni na en wïth jammi bëët, ni nude ri jammi bëët, ni ena cwïnynyø bëët.

⁷'Ba ŋati man nø dïïø amooc ki muuy ki køør met yi Jwøk kaawat mana cïpi ya Krictø ni ee rømø.

⁸Ni beeye na caani, «Ni kanya ci maal akädö ki jiy mo thööth mo ee maaø ki tøŋ, ni cïpe ki muuce jï jiy.»

⁹'Ba na købi ni ena ci maalø, tiere ŋø? Beeye ni ena ö piny kiree thuwø.

¹⁰'Ba eni na ö piny poot na eni na ci maal thuwø, ni ena maal wïth jammi bëët, kiper nee maal bäre ki piny bäre pääŋe ki dëëre.

¹¹'Ba muuce moe moa cïbe beeye ki man tïm jø møøki na nyïïatwieli, ni tïm jø møøki na nyïïkuk Jwøk, ni tïm jø møøki na jø wø køp luum Jwøk, ni tïm jø møøki na dïkwääc jiy ki dïpööye,

¹²kiper nee bäŋe gïn mo läämö jï jø Jwøk kiper tïïc man wø tïïcge ni ge wëëga dëër Krictø tëënnö,

¹³këël mano dwätø karøbëët na aciel ki ri ŋäädhe ki ŋäc man ŋääø O Jwøk, ni døøŋŋø, ni thurø karø kaamar Krictø ni wø näk othur kare,

¹⁴kiper nee ø ba bëëdø kaamar obwöre këët ni wø wïïri køør pwöc ma teeŋi ki køør reek nyeŋ jiy ni wø maaŋ wïth jiy ki cwøkge.

¹⁵'Ba ø doo caana adïëri ni ø mëër, ni ø døøŋŋø ki yïth jammi bëët ki ri Krictø, eni na en wïth jammi bëët,

¹⁶ni beeye eni ni wø ö dëëlli bäre wø piidhe ki ree ni tëënne ki ri mëër, dëëra näk okupö ni dwäte na aciel ki køør mut na kïth dëëre, kany wø ö thääŋö man nø wø tïïc kuna näk mare.

¹⁷Kiper manøgønø, a cäänna uuni ni mara køba ka nyeŋ Wuuö, ni kär nou bëëdö këët kaawat man wø bëët juurre ni wø bäŋ gïn mo ŋäcge.

¹⁸Kiper bäŋ gïn kwanyge, ni ge tøør ri kwøw mar Jwøk kiper na bäŋe gïn mo ŋäcge ki køør mana teek cwïnyge.

¹⁹Ni tïmge na jø ataa, ni putge cwïnyge cïp køør gïï mo patha karge, ni geno wär ki man tïïcge teeŋ jammi bëët moa reyø.

²⁰'Ba bëëtö manøgø paa mana kwanynyu baŋ Krictø.

²¹Ni u yaa ŋäädhö ni gïre you wïnynyö ni pwöny uuni ki nyeŋŋe, ki køør adïëri mana en ri Jecu.

²²Weyu bëëtö maru mana dïkwøŋ na kwøŋu bëëtö ki gø na raac ki køør japa reyø na nieŋ cwïnynyu køørge na cøøk uuni.

²³Døøyu cwïnynyu mo nyärö,

²⁴ni bëëdu ki bëëtö mana nyään, na näk ocwääö ni caala bëët Jwøk, na bëëtö mana beer na näk adïëri na en kur keere.

²⁵Kiper manøgønø, weyu tööt, ni tïmu karubëët nou cäänö ka adïëri jï wat mør. Kiper ø ena ri dëël aciel.

²⁶«Ni näk mou wëër, käru bääyö.» Ni ba wëëgu cäŋ päth piny nou poot ni uuno gootø,

²⁷ni ba wëënnu anägö ki jöö.

²⁸Kär dee kuu mo kwädö këët, 'ba beerra man tïïe ki cere ki tïïc ma adïëri, kiper nee lønye jïre ki man cïpe jï jø wø can.

²⁹Kär dee luubö mo raac mo wïnyi dhøgu, 'ba näk gïn mo beer keere mo dhaanhø tëënnö ki gø kaawat man wø manynyi, nee tïme ni beer jï jø wø wïny gø.

³⁰Kär cwïny Jwïëc Jwøk na en kur keere wëëgu ränynyö, ŋata jootu ŋïï ree kiper cäŋo wïïr kwöri mou yie.

³¹Weyu keec cwïny na bäre bäre, ki wëër, ki gootø, ki pïëm, ka ajaany, ki cøl cwïny bäre.

³²'Ba køønynyu røgu, ni cwïnynyu da mëër, ni wëënnu røgu kaawat mana ö Jwøki na wec raayu ki ri Krictø.