Read anuak Epeca 5 Bible Online

Epeca 5 - anuak bible

Epeca 5

¹Kiper manøgønø, ŋwaallu mar Jwøk kaamar obwöre mo di mëërö ki ge.

²Ni caathu jöör mëër, kaamar Krictø na mëër ki øøni ni cïp dëëre kiperø na jëëdhi mo ŋwääö ni met no olämi man wø 'näk jï Jwøk.

³'Ba bëët käp, ki rääö, ki päl cwïny kär nee wïnyö dïïu na bäre bäre, kiper gïïögø beege gïïa ba beyø kiper jø Jwøk.

⁴Kär dee rääc dhøk dïïu, wala luum lal, wala waac mo reyø, gïï wø ba mïërö. 'Ba mana doo beerra eni beeye dwøk met ec jï Jwøk.

⁵'Ba gïn wär ŋäyu døøc, ni bäŋe ŋat ma kääbi, wala ŋat mo raac, wala ŋat mo cwïnye päl ki jammi, ni wø caal wøør juu møøk, mo jïre da kare yi buc Krictø ge ki Jwøk.

⁶Kär dee ŋat mo cøøk uuni ki luup mo oballe jaak. Kiper beeye teeŋ gïïögønø ni wø käl wëëc Jwøk bäät jø adhala.

⁷Kiper manøgønø, käru cäädhö ki geni.

⁸Kiper dïkwøŋ uuna muudhö, 'ba kawaane uuna tar ki ri Wuuö. Cäädhu ni uuna nyïï tar.

⁹Kiper nyïëdi mo wø nywøl tarri wø joota ri gïï wø näk adïëri bëët, na beyø ni näkge wøpe.

¹⁰Ni kwanynyu bëëtö man wø met yi Wuuö ki gø.

¹¹Tïïyu karu ni bäär ki tïïe mo muudhö ni wø bäŋ gïn duuge. 'Ba u doo jooga geni.

¹²Kiper beeye gïr laac wïc këël ki man caan gïï wø tïïc jøøgø ni ege kanø.

¹³'Ba gïn wø nyooth tarri wø tïmö ni nëënö, kiper gïn wø nëëni, tar wø ena dëëre.

¹⁴Ni beeye na købi, «Ni päyï nø, ï no obutö, ni ööï maal ki yi thøø. 'Ba Krictø ïïno mooe ki tar.»

¹⁵Kiper manøgønø, gwøgu dëëtu døøc ki wääthu, ni wïthu leer nou patha jiy mo wïthge ba leer.

¹⁶Ni magu rou døc ki man tïïyu gïï mo beyø, kiper nïri ii beege nïne mo raay.

¹⁷Kiper manøgønø, käru tïmö ni uuna bøøre, 'ba ŋäyu gïna many Wuue.

¹⁸Käru meeyø ki kwøŋ, kiper beeye wø käl bëëtö mo raac, 'ba cwïnynyu päŋge ki Jwïëc Jwøk,

¹⁹ni cäänu ki røgu nou cäänö ka ri Dut Pwøc, ki dut Jwøk, ki dut met ec mo wø wär ki ri Jwïëc Jwøk, nou wära dudi mo met jï Wuuö ki cwïnynyu bäre,

²⁰nou dwøga met ec jï Jwøk na näk Wuuö cooth ki yïth jammi bëët, ki nyeŋ Kwääyø ma Jecu Krictø.

²¹Bëënnu røgu kiper mana lwäärru Krictø.

²²U na mään, bëënnu cwøwu kede tïïyu jï Wuuö.

²³Kiper dhaagø wø bëënna cwøre, kaawat man wø bëët Krictø ni ena wïc mar acooŋ Jwøk na näk beeye dëëre, ni bëëdö na Pïëmi mare.

²⁴'Ba keda man ö acooŋ Jwøki ni bëën Krictø en, beerra man ö määnni thuwø ni bëënge cwøwge na enønø ki yïth jammi bëët.

²⁵U na cwøw, mëërru ki määru kaamar Krictø na mëër ka acooŋ Jwøk ni cïp dëëre kiper gø,

²⁶kiper na acooŋ Jwøk døøc mo ena kur keere na mar Jwøk ki køør mana peny gø ki pïï ki luumme ni døøc gø mo waany,

²⁷na acooŋ Jwøk peeth nyïme ka ajiem, ni bäŋ kïdö mo raac wala kany mo ba mïërö wala gïn mør mo ena dëëre, nee tïme ni ena kur keere ni bäŋ kany mo jøøŋŋi dëëre.

²⁸Kaawat manøgø thuwø, cwøw doo mëër ki määrge kaawat man wø mëërge ki dëëtge. Ŋat wø mëër ki cïïe, mëër ki dëëre.

²⁹Kiper bäŋ ŋat mo män ki dëëre, 'ba wø piitha gø ni gwøk gø, kaawat man wø tïïc Krictø kiper acooŋ Jwøk.

³⁰Kiper øøna thäk dëëre.

³¹«Kiper manøgønø, beeye tiere ni wø ö dhaanhe wø wec wänni ki menni ni dwätge ki cïïe. Ni ö ge riet ni tïmge na dëël aciel.»

³²Gïnögø beeye gïn mo dwøŋ døc mo tiere okwøŋ kan, naa cäänö kaper Krictø ka acooŋ Jwøk.

³³'Ba beerra man ö ŋati man nø ni mëëre ki cïïe keda dëëre, ni ö dhaage ni lwäär cwøre.