Read anuak Epeca 6 Bible Online

Epeca 6 - anuak bible

Epeca 6

¹Obwöre, leŋŋu luup jøøa nywøl uuni, ki ri Wuuö, kiper beeye mana beer.

²«Wøør wäru ki meru,» ni manøgø beeye luubö mana kwøŋ cem ni ree da buuk,

³«Nee tïme ni beer jïrï, niï ruuwï wïth ŋøøm.»

⁴U na wëëe, kär cwïny nyïïu wëëgu ränynyö nee gootge. 'Ba piithu geni ki pwöc ni nyuthu geni jöör Wuuö.

⁵U na laaŋe, leŋŋu dööt jøø ni bëënnu pinyi en ki cwïnynyu bäre nou lwäär ni dëëtu kwanynyi, kede tïïyu jï Krictø.

⁶Ni ba tïïyu kaper na mïëre ki nyeŋ jiy nou døøya yïth jiy mo met. 'Ba tïïyu ni uuna laak Krictø, nou tïïya mana many Jwøki ki cwïnynyu bäre,

⁷nou tïïö ka met cwïny kede u tïnynya Wuuö ni patha jiy,

⁸ni ŋäyu ni gïn wø beer wø tïïc dhaanhe, wø cäŋe ka jootø baŋ Wuuö, nee ena laŋŋø wala ŋat mo bëëdö ka wïïe.

⁹U na kwääri, bëëdu na enønø ki geni, ni weyu geni ki ŋwönynyö, kiper ŋäyu ni ŋata näk Kwääyge ni näk Kwääyu ena maal, ni luumme aciel kiper jiy bëët.

¹⁰'Ba mana dööŋ keere nø, tëënnu ki ri Wuuö ki køør teege, eni ni wø teek.

¹¹Røøu kwöt leny mar Jwøk dëëtu kare bäre nou ba bööt cwøk anägö.

¹²Kiper leny marø ba këëlø ka jiy, 'ba ø këëdi ka gïïa jïge da teek maalø, ki moa jïge da teek piny, ki kwääc muudhö ni en pinyi en, ni ø këëdi ka juu na reyø ni en maalø na thööth døc.

¹³Kiper manøgønø, källu kwöt leny mar Jwøk kare bäre, kiper nou cuŋŋu nou teek dïcäŋo raac. 'Ba no onø tïïyu gïïögø bëët, uuno cuŋŋi nou teek møn.

¹⁴Kiper manøgønø, cuŋŋu ni kaw na näk adïëri you twöö ŋäthu, ni kwöt nywïënyö na näk bëënynyö you kïth kööthu,

¹⁵ni jap luumma nyään na met mar bëët-mëër you røø tietu.

¹⁶'Ba mana pere letha eni dï japøgø bëët, lwørru kwöt leny na näk ŋäädhe, ni beeye gïno jwöyu tøøk maac mo ŋata raac ki gø.

¹⁷Ni kääru cöör nywïënyö na näk pïëm man piem jiy ki gø, ko opëëllö mar Jwïëc Jwøk, ni beeye luum Jwøka eni.

¹⁸Lämu cooth ki ri Jwïëc Jwøk, ki teeŋ laam bëët ki kwac. Kiper manøgønø, bëëdu ni nyeŋŋu you jabø ni dëëtu you gwøø, nou kwaaya Jwøk kiper jø Jwøk bëët,

¹⁹këël kipera thuwø, naa wëënni ki jöö man jaba dhaa ki gø ni cwïnya da cer ki man køba luumma nyään na met na näk tiere okwøŋ kan,

²⁰luumma tïma ni aana kar dhøk kipere ni bëëda yïth oguudi en. Lämu kipera kiper nee luummögø køba døøc ni cwïnya da cer keda mana daa gø caanø.

²¹'Ba kawaane Taykika, cöögö mana mëërö ki gø na näk ŋat tïïc mo oŋäädhö ki nyeŋ Wuuö, jammi bëët ocaane jïïu, kiper nee bëëtö mara man bëëda ki gø en, ki gïn tïïa en, nee ŋäyu thuwø.

²²Ni beeye gïnögø ni jääŋŋa eni baŋu kipere, nee bëëtö marwa man wa bëëtwa nidïï nee ŋäyu, ni cøm cwïnynyu.

²³'Ba bëët-mëër en bäät nyïïmëëe, ki mëër, ki ŋäädhe ciel man wø ööi ki baŋ Jwøk na näk Wuuö, ge ki Kwäärö ma Jecu Krictø.

²⁴Met ec bëëde bäät jø wø mëër ki Kwääyø ma Jecu Krictø ki mëër mo ba jøøl.