Read anuak Pilipay 2 Bible Online

Pilipay 2 - anuak bible

Pilipay 2

¹'Ba ni näk ŋäyu ni da cøm cwïny ki ri Krictø, ki mëër ni tïïö cwïnynyu, ni uuno kuut ri Jwïëc Jwøk, ni da met ec ki pänh cwïny kiper jø møøk mo you joodø,

²putu yia døøc mo met na adïëri, ki man bëëdu ki cwïny aciel, ki mëër aciel, ki bëëtö aciel, ni cwïnynyu you dwalø.

³Ni bäŋe gïn mo tïïyu ki cøl cwïny wala atöör, 'ba beerra man caarru gïr jiy møga, ni beyø geni ki uuni, nou mwöl.

⁴'Ba kär dee ŋat ŋäc dëëre keere. 'Ba uuni, beerra man ŋäyu jiy møga thuwø.

⁵Putu bëëtö ki køør acaara mana jootu baŋ Krictø Jecu.

⁶Kiper eni, këël na rööme ki Jwøk, bëëtö mare na näk röömi ki mar Jwøk käre caarø ni beeye gïna dee maa ki teek.

⁷'Ba dëëre adwøk piny, ni tïme ni mare rømi ka bëët laŋ, ni nywöli ni nëëna dhaanhø.

⁸'Ba na joodi ni eni röömi ki dhaanhø, eni ree adwøk cään, ni leŋ luup bëët mo Jwøk, këël mana cööp ri thøø, ni beeye thøw bäät jaadha no odëëdö.

⁹Kiper manøgønø, ena thïïŋ Jwøki ni røøny gø, ni mooc gø ki nyeŋ mo dwøŋŋa eni dï nyeŋ bëët moa näk ocaaø.

¹⁰Kiper manøgønø, kany wäro wïny nyeŋ Jecu, cøŋŋi bëët doo këëlla piny, ni beege moa en maal, ki moa en piny, këël ki moa en tiet ŋøøm.

¹¹Ni ö lëëpi bëët ni caange gø, ni Jecu Krictø beeye Kwäärö, ni jiemma Jwøk na näk Wuuö.

¹²Kiper manøgønø, u no omëëya, u ni wø leŋ luup cooth, beerra man putu pïëm man piem uuni ki gø tïïc no othur kare nou lwäär ni dëëtu kwanynyi, ni paa kany wø nuda buutu keere, 'ba doo beerra eni man putu gø tïïc, këël kany tøøra buutu en.

¹³Kiper beeye Jwøk ni wø tïïö cwïnynyu, ni mooya uuni ki teek ki man tïïyu moe na met yie ki ge.

¹⁴Tïïyu jammi bëët nou ba dwaalli ni bäŋ pïëm,

¹⁵kiper nee bäŋe ajäla mo ö dëëtu, ni bëëtö maru beer, ni uuna nyïï Jwøk mo bäŋ gïn mo jøøŋŋi ri bëëtö maru, kany bëëdu dï jøøi ni reyø ni wïthge teek ni en piny en, jøøo rienynyu dïge keda ceer ni wø meeny piny,

¹⁶ni luubö mana en kwøwi ree you maa cwïnynyu, kiper naa tïma naa töödö dïcäŋo näk cäŋ Krictø, ki man näk mo ŋwïëy mara kära ŋwieø jaak, wala raa kära öölö jaak.

¹⁷'Ba ni näk aano tïmö kaamar ogweea ni køny aani bäät jëëdhi na näk ŋäädhe maru, yia met, ni yïthø met, karøbëët.

¹⁸'Ba uuni thuwø, yïthu doo met na enøgønø, ni mïn yïthu ki aani na aciel.

¹⁹'Ba yaa ŋäädhö ki ri Kwäärö ma Jecu ki man laara Timöthi jääŋ baŋu, nee yia mïnne ki gïïo wïnynya baŋu.

²⁰Kiper bäŋ dhaanhø mør buuta mo nëëna eni mo cwïnye ena baŋu na adïëri kiper bëëtö maru.

²¹'Ba jiy møga atïmö ni ge ŋäya dëëtge keerge, ni paa moa näk mo Jecu Krictø.

²²'Ba beeny Timöthi ŋäyu, kaawat mana bëëde ni tïïö ki aani na aciel ri luumma nyään na met, ni eni bëëdö keda nyilaal mo ena buut wänni.

²³Kiper manøgønø, yaa ŋäädhö ni eni laara ka jääŋ baŋu, kanyo jooda bëëtö mara mano tïme nidïï.

²⁴Ni yaa ŋäädhö ki ri Wuuö ni aani ki dëëra, aano ööi thuwø kany mo cään.

²⁵'Ba yaa caarø ni doo beerra eni ki man jääŋŋa coka ma Eparödaata baŋu, eni ni wø tïïö ki aani, na ŋat leny mo odwätö ki aani, ni beeye ŋata jääŋŋu, na køny canna.

²⁶Kiper ena tïmö ni lääŋŋa uuni bëët, ni cwïnye opädhö kiper mana wïnynyu gø ni eni tuu.

²⁷Ena tuu møn, ki täw mo bøtha dhi thøø. 'Ba ena køny Jwøki, ni paa eni keere, këël aani thuwø, kiper naa ba tïma naa kïmmö bäät kïmmö maya.

²⁸Kiper manøgønø, a manynya gø døc ki man jääŋŋa gø baŋu, kiper nee yïthu cäŋ mïnnö kanyo jootu eni, nee cwïnya pï piny mëëth.

²⁹Kiper manøgønø, pänhnhu eni ki nyeŋ Wuuö ni mïn yïthu bëët, ni wøørru teeŋ jøøgø.

³⁰Kiper eni bøtha kany mo thiinh ki thøø kiper tïï Krictø, ni taak jwïëye, kiper mana dou tïïö jïra, nee thur kare.