Read anuak Pilipay 4 Bible Online

Pilipay 4 - anuak bible

Pilipay 4

¹Kiper manøgø, nyïïmera, u na mëëra ki uuni, ni cwïnya lääŋŋa uuni, u na tïïc yia ni met, na gïr ajiem jïra, cuŋŋu nou teek ki ri Wuuö, u no omëëya.

²A kwaya ï na Yudia, naa kwaya ï na Cintike, ki man dwallu cwïnynyu ki ri Wuuö.

³Naa kwaya ïïni thuwø, ï na näk ŋat tïïc ma adïëri ki aani, køny määrögø, kiper gena tïïö ki aani na aciel ri luumma nyään na met, ge ki Kalement ki jø møga moa tïïö ki aani bëët, jøøa nyeŋge en yi wëël kwøw.

⁴Yïthu mïnge ki ri Wuuö cooth, naa cäŋa gø caannø jïïu, ni yïthu mïnge.

⁵Beerra man ö jøwi bëët man ŋäcge uuni nou mwöl, kiper Wuuö kare acäännö.

⁶Kär dee gïn lääŋŋu ki cwïnynyu, 'ba ki yïth jammi bëët, gïn wäro manynyu wäru pëënynyu ki Jwøk nou lämö, nou kwaya eni, nou dwøga met ec baŋe.

⁷'Ba leec cwïny man wø cïp Jwøki, na näk ba løny ki par, cwïnynyu ogwøe ka acaayu ki ri Krictø Jecu.

⁸'Ba mana dööŋ keere nø, nyïïmera, gïn wäro näk adïëri, ki gïn mo orømø ki wödö, ki gïn mo thïïŋ, ki gïn mo bäŋ raay dëëre, ki gïr mëër, ki luubö mo beer, ni näk beege gïï mo met, na gïï mo orømø ki pwøc, caarru gïïögø.

⁹'Ba tïïyu gïna kwanynyu, ki gïna jootu, ki gïna wïnynyu, ki gïna neennu baŋa. 'Ba Jwø wø cïp bëët-mëër, obëëdö ki uuni.

¹⁰'Ba yia amïnnö døc ki ri Wuuö, kiper kawaane wïthu acäŋu caarrø cään, ni kønynyu aani. Kiper aana lääŋŋu møn, 'ba atïmö ni bäŋ jöö jïïu.

¹¹'Ba ennø, a ba dwaalli naa can. Kiper yaa nø kwany ki man bëëda ni cwïnya yaa cïp piny, këël a doo bëëdö kanya ŋø.

¹²Kiper ŋääa ki man bëëda naa can, ni ŋääa ki man bëëda ni da jammi jïra. 'Ba ki yïth jammi bëët, nee bëët jäŋö, wala bëët käc, yaa nø kwany ki man bëëda ni cwïnya yaa cïp piny.

¹³'Ba jammi bëët løny jïra ki man tïïa ge ki køør ŋat wø tïïc aani naa teek.

¹⁴'Ba uuna tïïö ki gïn mo beer jïra, na kønynyu aani ki gïna leth na pïï dëëra.

¹⁵'Ba u na jø Pilipay, ŋäyu ki dëëtu ni kanya täk luumma nyään na met dïïu, kanya wiia Macedönia, bäŋ acooŋ Jwøk mo ocïpö ki gïrpiny jïra, 'ba beeye u keeru.

¹⁶'Ba këël na ena Thecalönika, aana kønynyu, ni cäŋu aani kønynyø.

¹⁷'Ba aani, a ba neet køny, 'ba a neeta gïna beer ni wø meet ree, noo cïp jïïu.

¹⁸'Ba aana nø jïtö ki muuce baŋu mo thööth døc, ni jäŋa ki muuce moa cïbu cer Eparödaata, na näk caala olämi man wø waaŋ ni ŋwääö ni met, man wø jïëc Jwøki ki gø, ni wø met yie ki gø.

¹⁹'Ba Jwøa uuno kønye ki gïïo manynyu bëët, kaawat mana näk eno kwär ka ajiem ki ri Krictø Jecu.

²⁰Ajiem en jï Jwøø na näk Wuuö këël na bäre bäre. Enøgønø.

²¹Määthu jø Jwøk bëët ki ri Krictø Jecu. Uuna määth nyïïmëëe moi ni en buuta ii.

²²Uuni, uuna määth jø Jwøki bëët. 'Ba beeye jø po Cidhar ni määth uuni røk.

²³'Ba met ec mar Kwääyø ma Jecu Krictø bëëde cwïnynyu.