Read anuak Köløcia 1 Bible Online

Köløcia 1 - anuak bible

Köløcia 1

¹Aana Pøøl na nyïïatwiel mar Krictø Jecu ki køør mana many Jwøki, ki cöögø ma Timöthi.

²A määtha uuni na jø Jwøk na en Köløcia, u na nyïïmëëe moa näk oŋäädhö ni en dëër Krictø. Met ec ki bëët-mëër man wø ööi ki baŋ Jwøk na näk Wääø bëëde bäätu.

³Cooth Jwøk na näk Wää Kwääyø ma Jecu Krictø, wø pwøcwa pwøø kany wø lämwa kiperu.

⁴Kiper awïnywa ni uuno jïëy ni ŋääthu Krictø Jecu, ni wïnywa mëër maru, nou mëër ki jø Jwøk bëët,

⁵kiper gïna ŋääth na näk okanø jïïu maal. Ni beeye mana kwøŋu wïnynyö ri luubö mana näk adïëri, ni beeye luumma nyään na met,

⁶na ö baŋu, kaawat mana keethe møn yi piny bäre ni känne ki nyïëdi ni nyaae, kaawat mana tïïc dïïu thuwø dïcäŋa wïnynyu gø yie, ni kwanynyu tier met yi Jwøk ka adïëri,

⁷kaawat mana kwanynyu gø baŋ Epapara, omëëcwa, na laŋŋø ki waani na aciel. Ena ŋat tïïc mo oŋäädhö mar Krictø mo kønya waani,

⁸ni beeye eni na caan mëër maru na en ri Jwïëc Jwøk jïwa.

⁹Kiper manøgø nø, ki mana täge dïcäŋa wïnywa gø yie, bäŋ dïcäŋ aciel mo ewa ŋøl wøk, ni wa ba lämö kiperu, ni wa kwaaya Jwøk nee moa many Jwøki bëët tïme ni ŋäyu ki køør leec wïc ka acaare bëët mo wø en ri Jwïëye,

¹⁰nou bëëdu ki bëëtö mo beer mo rømø jï Wuuö, ni tïïyu gïï wø met yie ki geni keerge, nou kännö ki nyïëdi yïth tïïe moo beyø moo tïïyu bëët, ni meetu mana ŋäyu kiper Jwøk,

¹¹nou tëënnu døc ki køør teek mare na bäŋ teeŋe, nee cwïnynyu magu, ni cwïnynyu you cïp piny ki met ec,

¹²nou pwøya Wuuö Jwøk, ŋata tïïc øøni ni øøno rømø ki man nywaaø olaawi ki jø Jwøk yi tar.

¹³Ni beeye eni na käl øøni wøk ki yi teek muudhö, ni kïth ø yi buc Wääde na mëëre ki gø.

¹⁴Ni beeye ŋata wiil øøni, ni wec raay 'moø ki køøre.

¹⁵'Ba eni na Krictø röömi ka Jwøk na näk ba neen, ni beeye kaa dï jammi bëët moa cwääc.

¹⁶Kiper jammi bëët cwääc ka ree, moa en maal, ki moa en piny, ki moa näk nëënö, ki moa näk ba nëëni, nee nyeye wala kwääri, wala gïïa jïge da teek maal, ki moa jïge da teek piny. Ni jammi bëët cwääc ka køøre, ni cwänynya eni.

¹⁷Ni beeye eni na nut kanya poot jammi bëët. Ni beeye eni na ö jammi bëët na kuutge ree.

¹⁸Ni beeye eni na Wïc jï dëël na näk acooŋ Jwøk. Ni beeye eni na nut wïlöölö, ni beeye eni na kwøŋ duu wøk ki yi thøø. Kiper manøgø nø, nee nyeŋŋe tïme ni lïëŋŋa eni dï jammi bëët.

¹⁹Ni beeye eni na mïn yi Jwøki ki man bëëde ree ki dëëre bäre.

²⁰Ni duu jammi bëët baŋe ki køøre, moa en maal ki moa en piny, ni dwøga bëët-mëër kare, ki køør remme na cwïër piny bäät jaadha no odëëdö.

²¹'Ba u na kwøŋ bëëtö ni uuno pää ki Jwøk, nou män ki Jwøk ki yïth acaare mou, nou tïïya raay,

²²kawaane, uuna dwøk baŋe ki køør thøw Jecu, na cïp rïŋ dëëre, kiper nou kïth nyïme nou ena kur keeru, ni bäŋ ajäla dëëtu, ni bäŋ gïn mo jøøŋŋi dëëtu nyïme,

²³ni näk mou puta bëëtö ri ŋäädhe man nou ba dääŋi, ni putu bëëtö nou teek, ni ba weyu gïna ŋääthu ri luumma nyään na met na wïnynyu. Ni luummögø beeye mana køp jï moa näk ocwääö bëët dï piny bäre, ni put aani tïïc ni aana ŋat tïï gø, a na Pøøl en.

²⁴'Ba kawaane, yia amïnnö ki gïïa leth ni wø jwøra kiperu. 'Ba ki dëëra man, a thööra gïïa dööŋ ri moa jwør Krictø kiper dëëre na näk acooŋ Jwøk.

²⁵Ni beeye na ööa na tïma ni aana ŋat tïï gø, kaawat mana wëëgi Jwøki aani kiperu, kiper nee luum Jwøk tïïa ni wïnyö ki pälle bäre,

²⁶luumma näk tiere okwøŋ kan cøøn yïth beenhnhe moa pöödhö, 'ba kawaane anyooth jï jiye.

²⁷'Ba gïna nyooth Jwøki jïge ki met yie, beeye ni moa beyø døc na näk rege da ajiem, na en ri luumma näk tiere okwøŋ kan, awëëk pällö dï juurre; ni luummögø beeye ni Krictø ena cwïnynyu, ŋata näk gïïa beyø na en nyïm ŋääth ka ree.

²⁸'Ba beeye Krictø ni wø gïre køpwa, ni köömwa jiy bëët, ni pwönywa jiy bëët ki køør luup leec wïc bëët, kiper nee jiy bëët kïthwa nyïm Jwøk, ni kwänynyö marge othur kare na wøp ri Krictø.

²⁹Ni beeye ni ööla døc ki tïïc en, naa tïïö ka ki køør teek mare bäre, keda man tïïe cwïnya ki teege en.