Read anuak Köløcia 2 Bible Online

Köløcia 2 - anuak bible

Köløcia 2

¹'Ba aani, a manynya man ŋäyu gø, ki man näk maa lääŋŋa u døc ki cwïnya bäre, ki jøø ni en Leeyödicia yøø, ki jø møga bëët moa näk a poot kärge joodø.

²Kiper a doo naa manynya geni man jïtge ki cøm cwïny, kaawat mana kuutge bëët ki mëër, nee gïna näk tiere okwøŋ Jwøki kan, na näk beeye Krictø, nee kwanyge ki pälle bäre, ni ci cwïnyge døøc,

³ŋata näk jap kwärö mo leec wïc ki kwänynyö bäre okan ree.

⁴'Ba manøgø acaana jïïu kiper nee bäŋe ya ŋat mo maaŋ wïthu ki luup mo keda beyø jaak.

⁵'Ba këël na tøøra buutu ki dëëra en, cwïnya kiree poot ena baŋu, ni yia met kiper na jooda gø nou poot bëëdö karu ni beer, ni ŋäädhe maru dwøŋ ri Krictø.

⁶Kiper manøgønø, putu bëëtö ree, kaawat mana jïëyu Krictø Jecu na näk Kwäärö.

⁷Ni put tietu këët piny, ni tëënnu ki ree, ni ŋäädhe maru you maa, kaawat mana pwöny uuni, ni put pwøci bëëtö dhøgu cooth.

⁸Gwøgu rou, nee bäŋe ya ŋat mo tïïc uuni na laaŋe ki køør luum acaare mo jiy, ki man maaŋ wïthu ki luup mo oballe jaak, keda luup kwäre ni wø caan jiyi, ki juu mo bäät piny, ni paa moa näk mo Krictø.

⁹Kiper bëët Jwøk bäre bëëdö dëër Krictø.

¹⁰'Ba kawaane, uuna nø thur karu ki ree, ŋata näk wïth kwääri bëët ki moa no ocuumö bëët.

¹¹'Ba beeye eni thuwø, na ö uuni ni jïtu ki daŋ, ni beeye kanya gøønyu mo dëël piny, ni daŋ manøgø paa man wø tïïc ki ceŋ, 'ba beeye daŋ mana näk mar Krictø.

¹²'Ba kanya lwøk dëëtu na nyuudhi, koonynya uuni ki eni na aciel, ni beeye mana tïŋ uuni maal thuwø ki eni, ki køør ŋäädhe mana ŋääthu teek Jwøk na tïïö, ŋata tïŋ gø maal ki yi thøø.

¹³'Ba u na näk othøw yïth gïïa dhallu, ni mo dëëtu paa odaŋø, uuna tïïc Jwøki nou kwøw ki eni na aciel, ni wec moa dhalø bëët,

¹⁴ni wec luubö mana doo caanø dëëtø, na dee marø ŋøl piny ki køøre. Luummögøøni alwøre, ni guri bäät jaadha no odëëdö.

¹⁵Ni ö eni ni dwøc tøøk gïïa jïge da teek maal ki moa näk ocuumö, ni tïïe ni ee nyoodhø jï jiy bëët, ni dïïm geni ki køøre.

¹⁶Kiper manøgønø, kär dee ŋat ŋøl maru piny kiper gïï wø cammu wala gïï wø maathu, wala kiper ajwöm-cam, wala kiper cäŋ man wø päär dwääy, wala cäŋ jwömö mar Jwøk.

¹⁷Kiper gïïögø caala tïpö jaak mar gïïo ööi. 'Ba mano näk adïëri ena jï Krictø.

¹⁸'Ba kär dee ŋat jääl uuni ni caana gø, ni «Dwøgu rou cään,» ni «Wøørru nyïïatwiet maal,» ni eni ŋäya lääk moe keere, ni eni töödö kiper gïn mo bäŋ tiere, kiper cwïnye na poode køør mo piny,

¹⁹ni Wïc käre maa, na näk Krictø, ŋata ö dëëlli bäre ni wø piidhe ki ree no odwätö na aciel ki ri mut ki läär na dwal gø, ni piith ka pïth mana en baŋ Jwøk.

²⁰?'Ba ni näk uuno thøw ki Krictø na aciel jï juu mo bäät piny, aŋø ni poot bëëdu keda uuna mo piny en? ?Na aŋø wø leŋŋu dööt jiy mo wø köö,

²¹ni «Kär gïnögø magu,» «Kär gïnögø bellu,» «Kär gïnögø gutu»?

²²ni beege ciik mo wø laar ränynyö kany wø nø køny røk ki ge, kiper ge cuŋŋa ri pwöc ki ciik mo jiy.

²³Kiper ciik moøgø nëëni keda ena ri leec wïc ma adïëri møn, kany wø lämö ki teeŋ lame møøk, ni dëël okïyö, ni dëël odwøk piny. 'Ba bäŋ gïn kønyge ki man mänge dëël ki gïïa caye.