Read anuak Köløcia 3 Bible Online

Köløcia 3 - anuak bible

Köløcia 3

¹'Ba ni näk uuno tïŋ maal nø ki Krictø, beerra man manynyu moa en maal, ni beeye kanya en Krictø yie, no opï piny kur cer cwïï Jwøk.

²Cïbu cwïnynyu køør jammi moa en maal, ni patha køør jap piny.

³Kiper uuna thøw, ni kwøw maru okanø ki Krictø na aciel baŋ Jwøk.

⁴'Ba kanyo ö Krictø, ŋata näk kwøw marø, noo nyooth ree, uuni thuwø, dëëtu onëëni ki eni na aciel ka ajiem.

⁵Kiper manøgønø, 'nägu jap piny ni en cwïnynyu, teeŋ kaa käp, ki rääö, ki gïïa reyø wø nieŋ cwïnynyu køørge, ki many raay, ki päl cwïny, na näk beeye wøør juu møøk.

⁶Kiper gïïögøøni beeye no ö wëëc Jwøki bäät jø adhala.

⁷'Ba gïïögø, uuna kwøŋ cäädhö køørge thuwø, kanya bëëdu dïge.

⁸'Ba kawaane nø, weyu gïï ii bëët, teeŋ kaa wëër, ki gootø, ki cøl cwïny, ki waac nyeŋ, ni bäŋ rääc dhøk dhøgu.

⁹Kär dee ŋat cään watge ki tööt. Kiper bëëtö mana dïkwøŋ you nø wec, ki tïïe moe bëët,

¹⁰ni tïmu ni uuna jiy mo nyärö, ni wø kïtu caal kït ŋata cwääc uuni, nou døøc mo nyärö ki køør man ŋäyu eni.

¹¹'Ba ki ri bëëtö manøgø, bäŋ ŋat mo jeeny ni ena ŋat Gïrïïk, wala ŋat Juuth, wala ŋat mo odaŋø, wala ŋat mo kär daŋø, wala jur, wala jøw mo otaaø, wala laŋŋø, wala ŋat mo bëëdö ka wïïe; 'ba Krictø ena wïth jøøgø bëët, ni en cwïnyge bëët.

¹²Kiper manøgønø, kaawat mana ö Jwøki na jier uuni, nou ena kur keeru na mo Jwøk ni uuno omëëye, bëëdu ni cwïnynyu jööt, ni yïthu bäth, nou mwöl, ni bäŋ atöör, ni cwïnynyu you cïp piny.

¹³Ni bäŋe ya ŋat mo cwïnye laara ränynyö ki watge maya. 'Ba ni näk da ŋat mo manynya cäänö kiper gïn mo oraany watge, beerra man cïp cwïnye piny ki gø. Kiper cwïnynyu dou cïba piny thuwø, keda mana ö Wuue na cïp cwïnye piny ki uuni.

¹⁴'Ba dï gïïögø bëët, ŋäyu mëër keere, ni beeye ni wø dwal jammi bëët ni thurge karge ki cwïny aciel.

¹⁵Ni wëëgu leec cwïny mar Krictø bwøth uuni ki yïth cwïnynyu, ni beeye gïna cwøl uuni kipere møn, na tïmu na dëël aciel. Ni dwøgu met ec jï Jwøk.

¹⁶Wëëgu luum Krictø bëëtö cwïnynyu na adïëri, kaawat man wø pwönynyu røgu, nou jøga røgu ki køør acaare bëët mo leec wïc, kaawat man wø wärru Dut Pwøc ki dut Jwøk, nou dwøga met ec jï Jwøk.

¹⁷'Ba jammi bëët moo wäro tïïyu, ni näk luubö wala tïïc, wär tïïyu ki nyeŋ Kwäärö ma Jecu, ni dwøgu met ec jï Jwøk na näk Wuuö ki køøre.

¹⁸U na mään, bëënnu cwøwu, ni beeye mana mïërö jï Wuuö.

¹⁹U na cwøw, mëërru ki määru, ni ba cäännu geni ki luup mo reyø.

²⁰U no obwöre, leŋŋu luup jøøa nywøl uuni ki yïth jammi bëët, kiper beeye man wø mïn yi Wuuö ki gø.

²¹U na wëëe, kär cwïny nyïïu raanynyu, nee cwïnyge ba päthge.

²²U na laaŋe, leŋŋu luup jøø ni bëënnu piny en ki yïth jammi bëët. Ni ba tïïyu kaper man wø neet uuni nou døøya yïth jiy mo met. 'Ba tïïu ni cwïnynyu leer, nou lwäära Wuuö.

²³'Ba gïn wäro tïïyu, tïïyu ki cwïnynyu bäre, kede tïïyu jï Wuuö, ni patha jï jiy.

²⁴Ni ŋäyu gø, nou jïtö ko olaawi baŋ Wuuö, na ŋade maru. Kiper u tïnynya Kwäärö ma Krictø.

²⁵Kiper ŋato tïïc gïn mo raac, kwör ocool dëëre kiper gïna raac na tïïe, ni bäŋ ajeeny.