Read anuak Köløcia 4 Bible Online

Köløcia 4 - anuak bible

Köløcia 4

¹U na kwääri, bëëdu ki laaŋe mou na wøpe, ni ba caannu geni, ni ŋäyu gø ni jïïu da Kwäärö maal thuwø.

²'Ba putu bëëtö nou lämö cooth ki cwïnynyu bäre, nou dwøga met ec.

³Ni lämu kiperwa thuwø, kiper nee wa jäm Jwøki ki jöö man køpwa luum Jwøk ki gø, ni køpwa gïr Krictø na näk tiere okwøŋ kan, ni beeye gïn twöc aani kipere en.

⁴Ni lämu kiper nee tiere caana ni beer kaawat mana daa gø caanø.

⁵Gwøgu rou ni tïm wïthu ni leer dï jøø ni kär jïëy yøø, ni magu rou døc ki man tïïu yi jöö mano jap jïïu jaak.

⁶'Ba döötu bëëtge ni met cooth, keda kadø ma acämme met, kiper nee luubö maaru ŋäc ki man løgu gø jï ŋati man nø.

⁷'Ba gïïa tägö dëëra bëët, ocaan Taykika jïïu. Eni, ena cöögö na mëërø ki gø, ni ena ŋat tïïc mo oŋäädhö, ni tïïö ka waani na aciel ki ri Wuuö.

⁸Ena jääŋŋa baŋu kiper nee ŋäyu ki man näk wa bëëtwa nidïï, nee cwïnynyu cøme.

⁹'Ba Onecima, na näk oŋäädhö, löömmö ki gø, ni beeye cöögø na mëërø ki gø, ŋata öö ki baŋu. 'Ba jammi bëët moa tägö kany, ocaange jïïu.

¹⁰'Ba uuna määth Aritarka, no otwöö ki aani en, ki Maak na näk tuuŋ ki Barnaba, ŋata gïre caana jïïu, ni «Noo pïïe buutu, wär pänhnhu.»

¹¹Ni uuna määth Jecu,[1] ŋata cwøl ni Jacta. Beege jøøgø keerge na jø Juuth dï jø wø tïny buc Jwøk ki aani na aciel. 'Ba cwïnya acømge døc.

¹²'Ba uuna määth Epapara ŋata öö ki baŋu, na näk laŋ Krictø Jecu. Eni lääŋŋa uuni cooth ki cwïnye bäre yïth laam moe, nou cuŋŋu ni uuno thur karu, ni moa many Jwøki bëët you kwanyø na adïëri.

¹³Kiper ena jooda ni ree ee öölö døc kiperu, ki jøø ni en Leeyödicia yøø, ki moa en Eerapöla.

¹⁴'Ba Luk na näk akïïm na mëërø ki gø, ki Diima, uuna määthge.

¹⁵Caannu määdhe mara jï nyïïmëëe moa en yi Leeyödicia, ni caannu gø jï nyijøøa cwøl ni Nyimpa ka acooŋ Jwøk mana en paare.

¹⁶'Ba noo nø kwaannu wëëlö man dïïu, wär kwaannu ya acooŋ Jwøk mar jø Leeyödicia. 'Ba wëëlö mana gööra baŋ jø Leeyödicia wär kwaannu thuwø.

¹⁷Ni caannu gø jï Arcipa, ni «Beerra man thöörï tïïc mana cïp Wuuö jïrï.»

¹⁸'Ba määdhe man en, gööra aani ki cera kiree, a na Pøøl. Caarru gïr tiimme ni en cera en. Met yi Jwøk bëëde bäätu.