Read anuak 1 Thecalönika 2 Bible Online

1 Thecalönika 2 - anuak bible

1 Thecalönika 2

¹Kiper ŋäyu ki dëëtu, nyïïmera, ni lïïmmö marwa na lïïmwa baŋu, kär cam paapi.

²'Ba waani, këël na jwørwa gïï mo leth ni caan wa døc yi Pilipay, kaawat mana ŋäyu gø, cwïnywa amakwa ki ri Jwøk marwa ki man køpwa luumma nyään na met na näk mar Jwøk jïïu, ni waano mänö døc ki man caanwa gø.

³Kiper köömmö marwa mana köömwa uuni ki gø paa mar cwøk, wala gïn mo käla raay, wala gïn mo tïïc ka atade.

⁴'Ba wa wø cäänö kaawat mana ö Jwøki na jïëc waani ki man caanwa luumma nyään na met, ni paa nee yïth jiy døøcwa mo met, 'ba wa wø tïïya mo wø mïn yi Jwøki ki ge, ŋat wø pääny cwïnywa.

⁵'Ba wa kär cäänö ni wa mwøtha uuni ni wa lwøra japu ka atade, kaawat mana ŋäyu gø, ni Jwøk beeye lïŋï marwa.

⁶Ni bäŋ pwøc mo ewa manynyø baŋ jiy, nee uuni wala jø møøk,

⁷këël na mïëre jïwa ki man caanwa gø, ni «Tïïyu gïn kiper mana näk waana nyïïatwiet Krictø.» 'Ba waana bëëdö ni wa mwöl dïïu, keda waŋø mo neeta nyïïkwaaye.

⁸'Ba kiper mana mëërwa ki uuni døc, yïthwa met ki man nywaaø luumma nyään na met mar Jwøk ki uuni na aciel. Ni patha luum Jwøk keere, 'ba këël dëëtwa kiree, kiper uuna tïmö ni peru leth jïwa døc.

⁹Kiper wïthu kär wïl ki tïïc marwa na öölwa døc, nyïïmera. Waana tïïö ki wärre ki cääŋŋe bëët, kiper nou ba öölwa, kanya køpwa luumma nyään na met na näk mar Jwøk jïïu.

¹⁰Ni uuna lïŋŋe ki Jwøk bëët kiper bëëtö marwa, ni bäŋ gïn mo wa doo jäälö ki gø, ni beeye bëëtö mo ena kur keere ni beer døc nyïmmu, u jøøa jïëy.

¹¹Kiper ŋäyu ni uuna köömwa døc, kaamar wuuö wø kööm nyïïe,

¹²ni cømwa cwïnynyu, ni caanwa gø jïïu, ki man bëëdu ki bëëtö mo beer mo orømø ki Jwøk, ŋat wø cøør uuni yi buye kiree ni mooc uuni ka ajiem.

¹³Ni beeye wø pwøcwa Jwøk cooth thuwø, kiper kanya wïnynyu luum Jwøk baŋwa, aputu jïëc ni beeye luum Jwøk, ni näk adïëri møn, ni patha luum jiy jaak, ni beeye ni tïïö cwïnynyu, u na jïëy.

¹⁴Kiper uuni, nyïïmera, uuna tïmö ni maru röömi ki mo acook Jwøk moa en yi Judia ki nyeŋ Krictø Jecu. Kiper gïïa jwørru baŋ jø pou aciel ki moa jwørge baŋ jø Juuth,

¹⁵ni beege jøøa 'näk Kwäärö ma Jecu ge ki nyïïkuk Jwøk bëët, na riem waani wøk. Geni, ge wø raanynya cwïny Jwøk, ni tïmge ni ge män ki jiy bëët,

¹⁶kiper mana mänge waani ki man caanwa luum Jwøk jï juurre, nee ge piem. Ni beeye gïï wø tïïcge cooth ni ge meeta raay moge ni thööth. 'Ba ka aŋuudi, wëëc Jwøk arøm dëëtge.

¹⁷'Ba nyïïmera, kiper mana pääwa ki uuni ki kany mo thiinh, cwïnywa atïmö ni manynya gø døc ki man cäŋwa u neennø. Kiper tøørra dëëtwa keerge, ni patha cwïnywa.

¹⁸Kiper cwïnywa manynya gø døc ki man öwa baŋu. Ka adïëri møn, a na Pøøl, beeye man wø manynya cooth cooth. 'Ba waano män Ceethanni.

¹⁹?Kiper agïnaŋø noo ŋääthwa? ?Na agïnaŋø noo mïn cwïnywa kipere? ?Na a rööny mane noo töötwa kipere nyïm Kwääyø ma Jecu, kanyo ööe? ?Aŋø, patha uuni?

²⁰Ka adïëri møn beeye uuni na käl ajiem dëëtwa ki mïn ec.