Read anuak 1 Thecalönika 4 Bible Online

1 Thecalönika 4 - anuak bible

1 Thecalönika 4

¹'Ba nyïïmera, mana dööŋ keere nø, wa kwaya uuni ni wa köömma uuni ki ri Kwäärö ma Jecu, nou bëëdu ki bëëtö mana dou bëëdö ki gøøni, ni tïïyu gïïa met yi Jwøki ki ge, kaawat mana kwanynyu gø baŋwa. Ni putu gø tïïc ni cäätha nyïm kaawat man tïïyu gø enøgø.

²Kiper gïïa pwönywa uuni ki ge ki køør Kwäärö ma Jecu, ŋäyu.

³Ni beeye mana many Jwøki nou tïmu nou ena kur keeru, nou tïmu ni karu bäär ki käp,

⁴ni ö ŋati man nø dïïu ni kwänynye ki jöö man bëëde ki gø ki cïïe ki bëëtö mana en kur keere na mïërö,

⁵ni ba en ri bëët käp, kaawat man wø tïïc juurre, jø wø kuc Jwøk.

⁶Ni bäŋe ya dhaanhø mo dhal luummögø, ni tïme ki gïn mo raac dëër coki kiper gïnögø. Kiper Wuuö kwöri wø coole kaper gïïögø bëët, keda mana kwøŋwa u köömmö døøc.

⁷Kiper Jwøk ø käre cwølø nøø tïmø ni ø reyø, 'ba nøø tïmø ni ø ena kur keerø.

⁸Kiper manøgønø, ŋato taak luummögø, ba taak dhaanhø, 'ba taaga Jwøk, ŋat wø cïp Jwïëye na en kur keere jïïu.

⁹'Ba kiper mëër man mëërru ki nyïïmëëe, u ba many ŋat göön baŋu kipere, kiper u ki dëëtu, uuna pwöny Jwøki ki man mëërru ki røgu.

¹⁰Ni näk adïëri møn, nou wø mëër ki nyïïmëëe bëët moa en dï Macedönia bäre. 'Ba wa köömma uuni, nyïïmera, nee putu tïïc ni cäätha nyïm.

¹¹Ni manynyu bëëtö mëëth, nou ŋäya bëëtö maru, nou tïïö ka ceŋŋu, kaawat mana köömwa uuni.

¹²Kiper manøgønø, nou wøør jøøa pathi, nee bäŋe gïn cannu.

¹³'Ba nyïïmera, wa ba many man kuyu gïno tägi kiper jøøa thøw, kiper nou ba kïmmu, kaamar jø møga moa näk jïge bäŋ ŋäädhe mar nyïm.

¹⁴Kiper mana jïëø ni Jecu athøw ni cäŋi tïŋ maal ki yi thøø, kaawat manøgø thuwø yøø jïëø, ni ki køør Jecu, Jwøk jøøa näk othøw okäle ki eni na aciel.

¹⁵Kiper beeye man caanwa jïïu en ki køør luum Kwäärö, ni ka adïëri møn, øøni noo dööŋ ni poot kwøw ii këël mano duu Kwäärö, paa ø noo bwödhö ki jøøa näk othøw.

¹⁶Kiper Kwäärö ki dëëre ööa piny ki maal, ki dwøl mo päl, ki dwør kwääy nyïïatwiet maal, ki dwør tuuŋ mar Jwøk. Ni ö jøøa thøw ri Krictø, ni kwøŋge ö maal.

¹⁷Køøre, ø noo dööŋ ni ø poot kwøw, øøno tïŋ maal ki geni na aciel yïth pøøl, nee ø røømmø ki Kwäärö yi jamø. Kanyøgø nø, øøno en buut Kwäärö cooth.

¹⁸Kiper manøgø nø, cømmu cwïnynyu keeru ki ri luupögø.