Read anuak 1 Thecalönika 5 Bible Online

1 Thecalönika 5 - anuak bible

1 Thecalönika 5

¹'Ba ennø nyïïmera, ni näk per nïne ki kwöra wäŋŋi, u ba many man göön baŋu ki luubö kipere.

²Kiper uuni ki dëëtu, ŋäyu døøc, ni Cäŋ Kwäärö öö kaamar kuu ni wø ööi ki wäär.

³Kanyo kö jiyi ni «Kawaane nuta bëët-mëër ni bäŋ thøø këët,» kanyøgø beeye kanyo ö thøøe noo neelïm bäätge kaamar dhaagø mo yie da dhaanhø mo ogøøc mäc lwaarri, ni bäŋ ŋat mo bøth.

⁴'Ba nyïïmera, u ba en yi muudhö ki man thäŋ cwïnynyu ki cäŋöce noo caal kuu.

⁵Kiper uuna wäät tar bëët, ni uuna wäät cäŋ, ni ø paa mo wäär, wala mo muudhö.

⁶Kiper manøgønø, kärø butø kaawat man wø tïïc jø møga. 'Ba beerra man bëëdø ni ø nëënö, ni dëëtø yøø gwøø.

⁷Kiper jø wø buti, wø buti ka wäär, ni jø wø meeyi wø meer ka wäär.

⁸'Ba kiper mana näk mo øøna wäät dïcäŋ, beerra man gwøø dëëtø, ni kïthø kwöt nywïënyö mar ŋäädhe ki mëër kööthø, ni ö pïëmmi mana piem øøni ki gø ni wø ŋäädhø ni kïthø gø wïthø kaamar cöör nywïënyö.

⁹Kiper ø kär mëëŋ Jwøki wëër, 'ba beeye kiper nee pïëm man piem øøni ki gø nee joodø ki køør Kwääyø ma Jecu Krictø,

¹⁰ŋata thøw kiperø, kiper nøø tïmø ni ø bëëdö ka eni na aciel, nee øøno thøw wala ø kwøw.

¹¹Kiper manøgønø, cømmu cwïnynyu keeru, ni kääru dëëtu keeru, keda man tïïyu gø enøgø.

¹²'Ba nyïïmera, wa kwaya uuni ki man wøørru jøøgø ni tïïö dïïu yøø, ni enu ceŋge ki ri Wuuö, ni jøga uuni.

¹³Wøørru geni døøc nou mëër ki geni, kiper tïïc marge. Ni bëëdu ki bëët-mëër ki dëëtu keeru.

¹⁴'Ba wa köömma uuni, nyïïmera, ki man köömmu jøø ni bëëtge ogwäyö yøø, ni cømmu cwïny jøø ni cwïnyge lwäär yøø, ni kønynyu jøøa jägö, ni ba jøømmu ki geni bëët.

¹⁵Caarru wïthu, nee bäŋe ya ŋat mo dwøk raay jï ŋato caan gïn mo raac dëëre, 'ba cooth manynyu gïn mo beer mo dou tïïö jï wat maya, ki jiy bëët.

¹⁶Yïthu mïnge ki yïth nïne bëët.

¹⁷Ni lämu cooth.

¹⁸Ni dwøgu met ec ki yïth jammi bëët. Kiper beeye mana many Jwøki jïïu ki ri Krictø Jecu.

¹⁹Ni kär nou bïpa Jwïëc Jwøk.

²⁰Ni ba taagu jiy mo køpa dwør Jwøk.

²¹'Ba jammi bëët wär päänynyu, ni magu gïno beer.

²²Ni tïïyu karu ni bäär ki teeŋ raay bëët.

²³'Ba Jwøk ki dëëre, ni wø cïp bëët-mëër, uuno tïïe nou ena kur keeru ki karu bäre, ni ö jwïëyu, ki kwøw maru, ki dëëtu, ni bëëtge na karge ni bäŋ ajäla røkge, kanyo ö Kwääyø ma Jecu Krictø.

²⁴'Ba eni na cwøl uuni, dwøre ba dak. Otïïe.

²⁵Nyïïmera, lämu kiperwa.

²⁶Määthu nyïïmëëe bëët ki nuum dhøk mana en kur keere na näk mar Jwøk.

²⁷'Ba a köömma uuni ki ri Wuuö, ni wëëlö man en wär kwaannu jï nyïïmëëe bëët.

²⁸Met ec mar Kwääyø ma Jecu Krictø bëëde bäätu.