Read anuak Jøcua 1 Bible Online

Jøcua 1 - anuak bible

Jøcua 1

¹'Ba kanya nø thøw Modhe na näk dhaanh Wuuö Jwøk, Wuuö Jwøk acäänö ki Jøcua o Nun, ŋat tïïc mar Modhe, ni kööe,

²ni «Dhaanhnha ma Modhe anø thøw; ennø, ö maal, ni ŋutï løø Naam Jördan løøga, ni beeye ïïni ki jøøi bëët ii; ni cou yi ŋöömmo wëëga geni, ge na jø Icriel.

³Kany mo you gudö ki tietu jaak, yaa nø cïp jïïu na maru, kaawat mana nø caana gø jï Modhe.

⁴Ni tïm nyeŋ keee mo ŋøøm mou ni tägi ka dï paap këël mano këët røk Kït Libaanø; ni maya tägi ka naama cwøl ni Upareeti këël mano këët naama dwøŋ jï løø kur pänh-cäŋ, ni beeye ŋööm jø Këth bäre.

⁵'Ba bäŋ dhaanhø mo maara lønyø jïre ki man cuŋŋe nyïmï kany wø näk ri leny ki yïth nïr kwøw moï bëët moo beetï. Aano bëëdö ki ïïni kaawat mana bëëda ki Modhe; ï ba leeŋa piny ni ba wiia ïïni.

⁶«Mak riï ni bëëdï niï teek, kiper ïïni, jøøi ii otïïyï nee ŋöömö mana kööŋa kipere jï kwäcge ni wëëga geni na marge nee ci jïge.

⁷'Ba mana pere letha eni keere, mak riï ni bëëdï niï teek; gwøk ciik bëët na karge moa ö dhaanhnha ma Modhe na kööm ïïni ki ge; kär niï gaa wøk ki røk ciik moøgø ni ba gaaï bäät cwïï wala bäät caamï, nee gïï wø tïïyï bëët thurge karge.

⁸Luup moa en yi wëëlö man na mar ciik en kär nee tïmö ni tøør dhiï, 'ba bëëdï niï lääŋŋa gø ki dïcäŋ ki wäär, nee riï gwøgï ki man tïïyï jammi bëët na karge kaawat mana näk ogöörö yie; køøre nø, jöö marï obëëdö ni tiir, ni thur jammi mo wø tïïyï bëët karge.

⁹Ennø, a köömma ïïni. Mak riï ni bëëdï niï teek; ni ba bwøk cwïnyï ni ba lwäyï, kiper a na Wuuö Jwøk na näk Jwøk marï, a ena buutï kany wø ciï yie jaak.»

¹⁰Køøre Jøcua dïbwöthe mo jø Icriel aköömme, ni kööe,

¹¹ni «Cou dï twïër ni köömmu jiy ni kööu, ni ‹Tïïu ki caammi kiper dëëtu, kiper noo tïme na ri dää nïne, naami na Jördan en ŋøllu ŋølø, ni cou yi ŋöömmo cïp jïïu na maru nee mayu. Ni ŋöömmögø cïpa Wuuö Jwøki na näk Jwøu.› »

¹²'Ba Jøcua aköö jï jø tuuŋ Ruben ki jø tuuŋ Gaat ki thääŋ jø tuuŋ Maneeca,

¹³ni «Parru wïthu ki luubö mana ö Modhe na näk dhaanh Jwøk na kööm uuni ki gø, na kööe, ni ‹Wuuö Jwøk na näk Jwøu uuno mooe ki jwöm, ni cïp ŋöömmi en jïïu.›

¹⁴Ennø, mään mou, ko obwöre mou, ki lääc paac mou dööŋ løø Naam Jördan løøi yi ŋöömma cïp Modhe jïïu. 'Ba u na dëëtu teek kiper leny, u ŋuta løøga ni rou you jiiŋŋø kiper leny, ni bwøthu maal nyïm nyïïmëëgu ni kønynyu geni.

¹⁵'Ba u doo bëëdö nou køønynya nyïïmëëgu këël mano ö Wuuö Jwøki noo mooc geni ki jwöm, kaawat mana mooc uuni ki jwöm, këël mano ö geni thuwø noo macge ŋöömö mano cïp Wuuö Jwøki na näk Jwøu jïge. Køøre nø, uuno døø yi ŋöömö mana näk maru ni bëëdu yie, ni beeye ŋöömma näk onø cïp Modhe na näk dhaanh Wuuö Jwøk jïïu na en løø Naam Jördan løøi jï løø kur tuul-cäŋ.»

¹⁶'Ba aløk jø wïth tuŋi moøgø jï Jøcua, ni köge, ni «Luup bëët moa köömmï waani ki ge yøø tïïcwa tïïö, ni kany wäro jääŋŋï wa yie jaak wa cøø.

¹⁷Ïïni dwørï oleŋwa kaawat mana bëëtwa ni dwør Modhe ewa leŋø ki røk jammi bëët. 'Ba mana pere letha eni keere, beerra man bëët Wuuö Jwøki na näk Jwøï ki ïïni, kaawat mana bëëde ki Modhe.

¹⁸'Ba ŋato kwier dwørï ni ba leŋ luup moa caanï jïre, ŋatøgø doo nääö. 'Ba mana pere letha eni keere, mak riï ni bëëdï niï teek.»