Read anuak Jøcua 13 Bible Online

Jøcua 13 - anuak bible

Jøcua 13

¹'Ba kanya tïm Jøcua na jaal ni cwiiye oløny ni thööth døc, Wuuö Jwøk aköö jïgø, ni «Ïïni, ïïna nø tïmö na jaal, ni cwiiri moï oløny ni thööth døc; 'ba poot da ŋøøm mo thööth mo poot kär maaø.

²Ŋøøm moa näk poot no odööŋ beege ŋööm jø Pilitin bäre ki ŋööm jø Gëcur bäre,

³ni beeye ki mana täge ki Naam Ciör na en løø Ijep jï løø kur tuul-cäŋ, këël mana aae ni këët waŋ keew mar paana cwøl na Akarön na no okwaan røk mïëc jø Keenan moa en jï løø wï-piny; ni beege mïëc kwääri mo jø Pilitin moa näk abïïc. Ni kwääri moøgø beege mo jø Geedha, ki jø Acdöt, ki jø Ackelön, ki jø Gëth, ki jø Akarön, këël mïëc jø Awim na en jï løø tier-piny.

⁴'Ba ŋøøm møga moa näk poot no odööŋ beege ŋööm Keenan bäre, na en jï løø wï-piny, na en yïthakic Mëëra na näk mar jø Caydan, ka Apëk, këël mana put gø këël waŋ keew mar jø Amör;

⁵ki ŋööm jø Gëbal, ki ŋööm Libaanø bäre, na en jï løø kur tuul-cäŋ, ni tägi ka Baal-Gaat na en tier Kïn Armön këël mana këët kanya cwøl ni Libö-Amath.

⁶«'Ba aani na Wuuö Jwøk, jiy bëët moa näk bëëdö mïëya en bäät kïte ki mana täge ki Libaanø këël mana këët Micerepöth-Mayim, ki jø Caydan bëët, ge riema wøk nyïm jø Icriel; 'ba gïno tïïyï keere beeye ki man pääŋŋï ŋøøm moøgø jï jø Icriel ki køør ŋïïce mo wø tïïc ki ri kwääk ki baw, nee ci jïge na marge kaawat mana nø köömma ïïni.

⁷'Ba ennø, ŋøøm moøgø ni løø Naam Jördan jï løø kur pänh-cäŋ enø, këël mano këët deŋ naama dwøŋ, wär pääŋŋï jï wïth tuŋi moa näk abïŋween ki thääŋ tuuŋ Maneeca, na ŋöömmo ci jïge na marge.»

⁸'Ba kar kaaca thääŋ tuuŋ Maneeca, ki jø tuuŋ Ruben ki jø tuuŋ Gaat, ŋøøm moa cïp jïge na moge ege nø lwør kanya enge løø Naam Jördan jï løø kur tuul-cäŋ, ni beeye Modhe na näk dhaanh Wuuö Jwøk na cïp gø jïge;

⁹ni ŋøøm moøgø tägi ka Aröör, na en deŋ goor Naam Arnön ki pääny mana en dï gool kaagø, ni rwöpa pwöl Medeba bäre, këël mana këët Dibön;

¹⁰ki päänye bëët mo Cëëwön nyeny jø Amör na bëëdö Ëcbön, këël mana aae ni këët waŋ keew mar jø Amön;

¹¹ni rwöpa Gelät bäre, ki ŋööm jø Gëcur ki jø Maika, ki Kïn Armön bäre, ki ŋööm Baacan bäre këël mana aae ni këël gø päänya cwøl ni Caleka;

¹²ni rwöpa mïëri moa en cer Ög nyeny Baacan, na bëëdö Actaröth ki Edaray. Kiper Modhe jiy moa en yïth mïëri moøgø, këël Ag, anääe ni mac ŋøøm moge. 'Ba dïkwøŋ Ög keere beeye na dööŋ ri juna cwøl ni Rapayim.

¹³'Ba jø Icriel jø Gëcur ki jø Maika kärge riem wøk; ni jø Gëcur ki jø Maika ge poot bëëdö na aciel ki jø Icriel këël dïcäŋi en.

¹⁴'Ba kanya ö Modhe na pääŋ ŋøøm, jø tuuŋ Libay keere käre mooø ki ŋøøm na ŋöömmo dööŋ jïge na kurge; kiper olämme mo wø waaŋ ki maac ni wø cïp jï Wuuö Jwøk na näk Jwø Icriel, beeye na cïp na tïmö ni caala ŋöömmo dööŋ jïge, kaawat mana caani ya Wuuö Jwøki jï Modhe.

¹⁵Kanyøgønø, Modhe ŋøøm mo dööŋ jï jø tuuŋ Ruben acïbe jïge ki køør dhøk uudi moge.

¹⁶'Ba ŋøøm moa cïp jïge tägi ka Aröör na en deŋ goor Naam Arnön ki pääny mana en dï gool, ni rwöpa pwöl Medeba bäre,

¹⁷ki Ëcbön, ki päänye moe bëët moa en yi ŋöömma näk ree ee päärö, ni beege Dibön, ki Bamöth-Baal, ki Bëëth-Baal-Miyön,

¹⁸ki Jäc, ki Kedemöth, ki Mëpät,

¹⁹ki Kiriatayim, ki Cebama, ki Ceret-Caar, na en bäät kïdi mana en buut gool,

²⁰ki Bëëth-Pëëgör, ki deŋ Kïn Pedhega, ki Bëëth-Jecimöt,

²¹këël päänye bëët moa en yi ŋöömma näk ree ee päärö, ki mïëri bëët moa en cer Cëëwön nyeny jø Amör na näk bëëdö Ëcbön. 'Ba Modhe nyeya manøgø ki kwääri mo jø Midien ee nø 'näk, ni beege Ëwi, ki Rekem, ki Cuur, ki Ur, ki Riba, jøøa bëëdö na kwääri mo mïëri ena ceŋge yi ŋööm Cëëwön.

²²'Ba jø Icriel thuwø Beelam o Beeyör, ŋat adïëda, anäkge ko opëëllö na aciel ki jiy møga bëët.

²³'Ba waŋ keew mar jø tuuŋ Ruben beeye Naam Jördan. Moøgø beege päänye ki mïëri moa dööŋ jï jø tuuŋ Ruben ki køør dhøk uudi moge.

²⁴Køøre thuwø Modhe ŋøøm mo dööŋ jï jø tuuŋ Gaat, acïbe jï jø tuuŋ Gaat ki køør dhøk uudi moge.

²⁵'Ba ŋøøm moa cïp jïge beege Jadher, ki päänye mo Gelät bëët, ki thäk ŋøøm mo jø Amön, ni put aay ni këët Aröör na näk neeta rege ki Raaba;

²⁶ni tägi ka Ëcbön këël mana këët Ramat-Micpa, ki Bethönim, ni cäŋ tägö ki Maanayim këël mana këët waŋ keew mar pääny mana cwøl ni Dabëër;

²⁷ni rwöpa mïëri moa en dï goor Naam Jördan, ni beege Bëëth-Aram, ki Bëëth-Nimera, ki Cuköt, ki Capön. 'Ba ŋöömö manøgø bäre beeye mar Cëëwön nyeny Ëcbön, na thääŋŋe cïp jï jø tuuŋ Ruben. Ni ŋöömö manøgø beeye ŋöömma en løø Naam Jördan jï løø kur tuul-cäŋ, ni keew mare beeye Naam Jördan, ni put gø këël deŋ puul mana cwøl ni Kinërët.

²⁸Moøgø beege päänye ki mïëri moa dööŋ jï jø tuuŋ Gaat, ki køør dhøk uudi moge.

²⁹Køøre thuwø Modhe ŋøøm mo dööŋ jï thääŋ tuuŋ Maneeca, acïbe jïge ki køør dhøk uudi moge.

³⁰'Ba ŋøøm moa cïp jïge tägi ka Maanayim, ni rwöpa ŋööm Baacan bäre na en cer Ög nyeny Baacan, ki päänye mo Jayer bëët na en yi ŋööm Baacan, ni beege päänye ma pïërabïciel;

³¹ki thääŋ Gelät thuwø, no orwöbö na aciel ki Actaröth, ki Edaray, ni beege päänye moa en cer Ög na en yi ŋööm Baacan. 'Ba ŋøøm moøgø aput tïmö na mo nyïïkwaac Makir o Maneeca, ni puti cïp jï nyïïkwaac Makir møga ki køør dhøk uudi moge.

³²Moøgø beege ŋøøm moa pääŋ Modhe jï wïth tuŋi moa näk ariiø ki thääŋö na ŋøøpo dööŋ jïge, kanya enge pwöl Möap løø Naam Jördan løøga jï løø kur tuul-cäŋ ni ge dïët ki Jerikö.

³³'Ba kanya ö Modhe na pääŋ ŋøøm, jø tuuŋ Libay käre mooø ki ŋøøm na ŋöömmo dööŋ jïge na kurge; 'ba beeye Wuuö Jwøk Jwø Icriel no odööŋ jïge ni caala ŋöömma doo dööŋ jïge na kurge, kaawat mana caani ya Wuuö Jwøki jïge.