Read anuak Jøcua 16 Bible Online

Jøcua 16 - anuak bible

Jøcua 16

¹'Ba jø tuuŋ wäät Jocep, ni beege jø tuuŋ Ipariem ki thääŋ tuuŋ Maneeca, ŋøøm moa ci jïge ki køør ŋïïce mo wø tïïc ki ri kwääk ki baw, waŋ keew ki jï løø tier-piny atägö ki Naam Jördan ni dïët ki Jerikö, ni aae ki buut jøør mo Jerikö, ni cøra jï løø kur tuul-cäŋ ki jøør moøgø. Køøre keew ree aput gøn ki Jerikö, ni cøøa jï løø kur pänh-cäŋ, ni aae ni cøra dï paap ni pöödhe ki dï mïëya en bäät kïte ni put pïï Bëthël.

²Ni cäŋ aay ki Bëthël ni pïïe Löja, ni pöödhe ni pïïe Atharöt na en waŋ keew mar jø Arki.

³Ni løøc piny mëëth jï løø kur pänh-cäŋ, ni put pïï waŋ keew mar jø Jeplëtha, ni aae ki waŋ keew mar Bëëth-Örön mana en jï piny këël mana pïïe Gëdher. Ni put ŋuudö yi naama dwøŋ.

⁴Moøgø beege ŋøøm moa ci jï jø tuuŋ wäät Jocep na ŋöömmo dööŋ jïge na kurge, ni beege jø tuuŋ Ipariem ki thääŋ tuuŋ Maneeca.

⁵'Ba ŋøøm moa cïp jï jø tuuŋ Ipariem na ŋöömmo dööŋ jïge na kurge ki køør dhøk uudi moge, waŋ keew mar ŋøøm moøgø ki jï løø tier-piny, atägö ka Atharöt-Adar na en jï løø kur tuul-cäŋ, këël mana aae ni coonya jï løø kur pänh-cäŋ, ni put pïï Bëëth-Örön mana en jï maal.

⁶Køøre keew aput aay ni ŋuude naama dwøŋ. 'Ba ki mana täge ki Mikmitat na en jï løø wï-piny, keew ree aput gøn jï løø kur tuul-cäŋ, ni aae ki buut Taanat-Cëëlö na en yi ŋöömö marge, ni put pöödhö ni coonya Janöa.

⁷Ni cäŋ aay ki Janöa jï piny mëëth ni coonya Atharöt ki Neära, ni pïïe Jerikö, ni put ŋuudö Naam Jördan.

⁸'Ba ki mana täge ki Tapuwa, waŋ keew apöödhö ki jï løø kur pänh-cäŋ ni coonya yi waŋ Kana, ni put ŋuudö naama dwøŋ. Moøgø beege ŋøøm moa dööŋ jï jø tuuŋ Ipariem ki køør dhøk uudi moge.

⁹'Ba päänye møøk ka atude moge moa en buutge na en yi ŋøøm mo jø tuuŋ Maneeca acïp jï jø tuuŋ Ipariem thuwø.

¹⁰'Ba jø tuuŋ Ipariem, jø Keenan moa bëëdö Gëdher kärge riem wøk, ni ö jø Keenanni moøgø ni putge bëëtö na aciel ki jø tuuŋ Ipariem këël dïcäŋi en. 'Ba jøøgø aput tïmö na laaŋe mo tïïö ka teek jï jø tuuŋ Ipariem.