Read anuak Jøcua 17 Bible Online

Jøcua 17 - anuak bible

Jøcua 17

¹'Ba ki ri ŋöömö mana en løø Naam Jördan jï løø kur pänh-cäŋ, da ŋøøm mo oci jï thääŋ tuuŋ Maneeca ki køør ŋïïce mo wø tïïc ki ri kwääk ki baw. 'Ba Maneeca beeye kany Jocep, ni o Makirri ni näk kany Maneeca, ni eni da wääde mo cwøl ni Gelät. 'Ba kar kaaca, nyïïkwaac Makir, kiper mana näk gena jø leny mo teek, ŋööm Gelät ki ŋööm Baacan na en løø Naam Jördan jï løø kur tuul-cäŋ, onø cïp jïge na mano dööŋ jïge na kurge.

²'Ba ki ri ŋöömö manøgø na en løø Naam Jördan jï løø kur pänh-cäŋ enø, jø tuuŋ Maneeca møga ajïtö ki ŋøøm kaagø ki køør dhøk uudi moge, ni beege dhi øt Abiedhar, ki dhi øt Këlëk, ki dhi øt Aciriel, ki dhi øt Cekam, ki dhi øt Ëpër, ki dhi øt Cemida. Ni moøgø beege nyïïkwaac Maneeca moa näk cwøw ki køør dhøk uudi moge; 'ba Maneeca beeye o Jocep.

³'Ba Dhilöpat wär Ëpër nyikwaar Maneeca jïre bäŋ obwöre ma cwøw; 'ba beege obwöre ma mään keerge na en jïre. Ni nyeŋ nyïïe beege Maala, ki Nöa, ko Okila, ki Milka, ki Tirja. 'Ba Opëër na näk wää Dhilöpat beeye o Gelät, ni ö Geläti ni näk o Makir, ni ö Makirri ni näk o Maneeca.

⁴'Ba nyïgögø aö nyïm Eliedhar na näk Kwääy Lam Mana Dwøŋ, ki Jøcua o Nun, ki dïbwöthe, ni köge, ni «Wuuö Jwøk Modhe aköömme nee wa jïtwa ki ŋøøm mo dööŋ jïwa na kurwa yïthakic jø tuuŋ wääwa.» Kanyøgønø, kaawat mana nø caani ya Wuuö Jwøki, Jøcua nyïï Dhilöpat aput mooc ki ŋøøm mo dööŋ jïge na kurge yïthakic tuuŋ wääge.

⁵Kiper manøgønø, jø tuuŋ Maneeca ajïtö ki ŋøøm møøk mo kwöre apaar mo tøør ri ŋööm Gelät ki ŋööm Baacan na en løø Naam Jördan løøga,

⁶kiper jø tuuŋ Maneeca moa näk mään ajïtö ki ŋøøm na mo dööŋ jïge yïthakic nyïïkwaaye møga moa näk cwøw. Ni ö ŋööm Gelät ni ci jï jø tuuŋ Maneeca møga.

⁷'Ba ŋøøm mo jø tuuŋ Maneeca na en løø Naam Jördan jï løø kur pänh-cäŋ kïïö ki ŋøøm mo jø tuuŋ Acer, ni rwöpa ŋöömö bäre mana en yïthakicge ki pääny Mikmitat na en løø pääny Cekam jï løø kur tuul-cäŋ. 'Ba waŋ keew aput aay ki Mikmitat, ni coonya jï løø tier-piny ni pööth ŋöömma näk jø Ayn-Tapuwa bëëdö yie.

⁸'Ba pääny mana cwøl ni Tapuwa ena waŋ keew mana en yïthakic ŋøøm mo jø tuuŋ Maneeca ki ŋøøm mo jø tuuŋ Ipariem. 'Ba pääny manøgø ena jï jø tuuŋ Ipariem, ni ŋøøm moa en deŋŋe ena jï jø tuuŋ Maneeca.

⁹Køøre keew aput aay ni løøc yi waŋ Kana. 'Ba päänye moa en løø waŋ manøgø jï løø tier-piny, këël na bëëtge ni kere ena yi ŋøøm mo jø tuuŋ Maneeca, thööth päänye moøgø atïmö ni ena jï jø tuuŋ Ipariem. 'Ba waŋ keew mar jø tuuŋ Maneeca adøøk ki løø waŋ manøgø jï løø wï-piny ni put ŋuudö yi naama dwøŋ.

¹⁰'Ba løøa en jï løø tier-piny ena jï jø tuuŋ Ipariem, ni ö løøa en jï løø wï-piny ni en jï jø tuuŋ Maneeca. 'Ba jø tuuŋ Maneeca kïïö ka naama dwøŋ ki jï løø kur pänh-cäŋ. 'Ba ŋöömö marge ki jï løø wï-piny kïïö ki ŋööm jø tuuŋ Acer, ni put aay ni tïme ni kïïö ki ŋööm jø tuuŋ Icakar no onyek jï løø kur tuul-cäŋ.

¹¹'Ba päänye møøk moa en yïth ŋøøm mo jø tuuŋ Icakar ki ŋøøm mo jø tuuŋ Acer na ci jï jø tuuŋ Maneeca beege Bëëth-Can ka atude moe moa en buute, ki Ibleäm ka atude moe moa en buute, ki Dör, paana en bäät kïdi, ka atude moe moa en buute këël jiy moa bëëdö yïthge, ka Endör ka atude moe moa en buute ki jiy moa bëëdö yïthge, ki Tanak ka atude moe moa en buute ki jiy moa bëëdö yïthge, ki Megidø ka atude moe moa en buute ki jiy moa bëëdö yïthge.

¹²'Ba jø tuuŋ Maneeca kär løny jïge ki man macge päänye moøgø na bäre, kiper jø Keenan cwïnyge aputge mak ki man bëëtge yïth ŋøøm moøgø.

¹³'Ba kanya tïm jø Icrielli ni ge teek, jø Keenan moøgø akïthge tietge ni kïthge bäätge ki tïïe mo teek; 'ba kärge riem wøk na bäre.

¹⁴Køøre nyïïkwaac Jocep acäänö ki Jøcua ni köge, ni «Waani, waana jiy mo kwäänwa thööth, ni waano gwïëth Wuuö Jwøki këël kar kany ennø. ?Aperŋø nø ni tïme niï cïpa ŋøøm mo nøk jïwa en ki køør ŋïïce mo wø tïïc ki ri kwääk ki baw en?»

¹⁵'Ba Jøcua aköö jïge, «Ni näk mo uuna jiy mo kwäännu thööth nø, cou ni ŋøtu lul mana en bäät kïdi maal yi ŋööm jø Përec ki jø Rapayim nee tïme na maru, kiper uuna köö ni mïëya en bäät kïte na cïp jï jø tuuŋ Ipariem atïmö ni diiny ni ba rømi kiperu.»

¹⁶'Ba nyïïkwaac Jocep aköö, ni «Mïëya en bäät kïte ba rømi kiperwa møn, këël jø Keenan thuwø moa en yi ŋöömma näk gool, ge ba løny böötö jïwa, kiper jïge da jïëthe mo wø tut okwëënyi mo tïïc ka nywïëny, ni beege jø Keenan moa en Bëëth-Can ka atude moe moa en buute ki moa en goor Jedhriel.»

¹⁷'Ba Jøcua acäänö ki dhi øt Jocep ni beege jø tuuŋ Ipariem ki jø tuuŋ Maneeca, ni kööe, ni «Uuni, uuna jiy mo kwäännu thööth, nou teek døc thuwø. U ba doo mooø ki ŋøøm mo nøk keerge ki køør ŋïïce mo wø tïïc ki ri kwääk ki baw.

¹⁸'Ba ŋøømma en bäät kïte poot tïmö na maru. Këël na bëët kaace na lul, dou ŋødø, ni këëllu gø nyeŋ keee moe, ni ö ŋöömmöca ni tïme na maru bäre; ni riemu jø Keenan wøk thuwø, këël na bëëtge ni ge teek ni jïge da jïëthe mo wø tut okwëënyi mo tïïc ka nywïëny.»