Read anuak Jøcua 18 Bible Online

Jøcua 18 - anuak bible

Jøcua 18

¹'Ba kanya nø ö jø Icrielli na macge ŋööm Keenan, geni rege acooŋge Cëëlö, ni gurge oduŋkaany røømmø[5] piny kaace.

²'Ba kar kaaca, røk wïth tuŋi mo jø Icriel moa näk apaar kurriiø, da wïth tuŋi abïriiø mo ŋøøm mo dööŋ jïge na moge poot kär pääŋŋö jïge.

³Kanyøgønø, Jøcua aköö jï jø Icriel, na «?Aŋø, a këël kany mo nyïëdi nø nou poot bëëdö nou ba døny yi ŋöömma cïp Wuuö Jwøki na näk Jwø kwäyu jïïu nee lwørru na maru?

⁴'Ba ennø, kwänyu ki jiy, ni kwanynyu na jiy adäk adäk ri wï tuuŋ man nø, nee ge jääŋŋa, nee cige ni caathge dï ŋöömö manøgø, ni göörge gïïo jootge ki køør ŋøøm moo dööŋ noo cïp jï wï tuuŋ man nø. 'Ba kanyo nø tïïcge gïïögø nø, geno duu baŋa.

⁵'Ba geni ŋöömö manøgø dege pääŋŋö na kwöre abïriiø. 'Ba jø tuuŋ Juuda ŋöömö mana nø lwørge na marge na en jï løø tier-piny wär putge bëëtö yi gø. Ni ö dhi øt Jocep, ni beege jø tuuŋ Ipariem ki jø tuuŋ Maneeca, ni putge bëëtö yi ŋöömö mana näk marge na en jï løø wï-piny.

⁶'Ba uuni ŋöömö manøgø wär göörru na kwöre abïriiø, ni kälu gïna göörru baŋa. 'Ba aani, ŋïïce mo wø tïïc ki ri kwääk ki baw oläwa jiiŋŋø kany nyïm Wuuö Jwøk na näk Jwøk marø.

⁷'Ba jø tuuŋ Libay ba jïti ki kurge yïthakiyu, kiper tïï dïlämme ki man tïnyge Wuuö Jwøk beeye noo tïmö ni caala ŋöömmo dööŋ jïge na kurge. Jø tuuŋ Gaat ki jø tuuŋ Ruben ki thääŋ tuuŋ Maneeca thuwø ŋøøm mo dööŋ jïge na kurge ege nø lwør løø Naam Jördan jï løø kur tuul-cäŋ, ni beeye Modhe na näk dhaanh Wuuö Jwøk na cïp ŋøøm moøgø jïge.»

⁸Køøre jiy moa kwany nee cige nee ŋøøm göörge, gena tïŋŋö ni aacge; 'ba kanya pootge ni ge poot kär aay, gena kööm Jøcua ni kööe jïge, ni «Cou ni caathu dï ŋöömö bäre ni göörru gïïo jootu piny, ni duuu baŋa; køøre nø aani ŋïïce mo wø tïïc ki ri kwääk ki baw ojiiŋŋa Cëëlö kany nyïm Wuuö Jwøk.»

⁹Ni ö jøøgø ni putge aay ni caathge dï ŋöömö bäre, ni pääŋge ŋöömö na kwöre abïriiø ki køør päänye moa en yie, ni göörge nyeŋ päänye piny yi warakata; køøre gena duu twïër kanya en Jøcua yie Cëëlö.

¹⁰'Ba Jøcua ŋïïce mo wø tïïc ki ri kwääk ki baw aput jiiŋŋø jïge Cëëlö kaagø nyïm Wuuö Jwøk, ni ö Jøcua ni put ŋøøm pääŋŋö jï jø Icriel ki køør wïth tuŋi moge.

¹¹'Ba kanya pääŋ ŋøøm ki køør ŋïïce mo wø tïïc ki ri kwääk ki baw, ŋöömö mana cïp jï jø tuuŋ Benjamen ki køør dhøk uudi moge ena yïthakic ŋööm jø tuuŋ Juuda ki ŋööm jø tuuŋ Jocep.

¹²'Ba waŋ keew marge ki jï løø wï-piny atägö ki Naam Jördan, ni ö keewi ni put aay ni coonya jï løø kur pänh-cäŋ ni Jerikö ee wii bäät caam, ni aae ni coonya mïëya en bäät kïte; ni pöödhe ki dï paap ni pïïe Bëëth-Awëën.

¹³'Ba keew acäŋ tägö ki kaace, ni poot cøøa jï løø kur pänh-cäŋ, ni aae ki jï løø tier-piny ki Löja, ni beeye Bëthël; ni ö keewi ni put løøc piny ni coonya Atharöt-Adar, na en buut kïnna en jï løø tier-piny ki Bëëth-Örön mana en piny.

¹⁴'Ba ki mana täge ki løø kïdi manøgø na en jï løø tier-piny ki Bëëth-Örön enø, waŋ keew manøgø, na aa jï løø kur pänh-cäŋ, ree aput gøn jï løø tier-piny, ni put aay ni coonya Kiriat-Baal, ni beeye Kiriat-Jeerim, na en yi ŋööm jø tuuŋ Juuda. 'Ba manøgø beeye waŋ keew mar jø tuuŋ Benjamen mana en jï løø kur pänh-cäŋ.

¹⁵Køøre waŋ keew mar jï løø tier-piny atägö ki buut Kiriat-Jeerim, ni gøn ree jï løø kur tuul-cäŋ, ni aae ni coonya jøør moa en kanya cwøl ni Nëëptö.

¹⁶'Ba waŋ keew aput løøc jï piny mëëth ni cør tier kïnna näk dïët ki Goor Ben-Inöm, ni poot cøøa jï løø kur tuul-cäŋ, ki jï løø wï-piny ki Goor Rapayim. Ni pöödhe ki dï Goor Inöm ni put døø ki deŋ kïdi mana bëët pääny jø Jeebuc bääte, ni kïdi manøgø ena yi ŋöömö marge; ni put aay ni coonya jøøro mana cwøl na Ayn-Rögëël.

¹⁷'Ba waŋ keew ree aput gøn bäät caam ni aae ni coonya jøøro mana cwøl na Ayn-Camic, ni put pöödhö ni coonya Gëëlilöt na näk dïët ki jöör Adumim, ni løøc piny ni aae ni coonya kïdi mana no ocaa ri Böwan nyikwaar Ruben.

¹⁸Ni ö keewi ni pöödhe ki deŋ thuur mana en buut goor Jördan ni wø cwøl na Araaba ni cøra bäät caam, ni put løøc yi gool manøgø.

¹⁹'Ba waŋ keew aput pöödhö ki deŋ thuur mana näk pääny Bëëth-Ogla ogeer bääte ni cøra jï løø wï-piny; ni ö keewi ni put ŋuudö weel Naam Acäbö, ni beeye kanya pänh Naam Jördanni ki yie. 'Ba manøgø beeye waŋ keew mar jø tuuŋ Benjamen mana en jï løø tier-piny.

²⁰'Ba waŋ keew marge ki jï løø kur tuul-cäŋ beeye Naam Jördan. Moøgø beege nyeŋ keee mo ŋöömö mana ci jï jø tuuŋ Benjamen ki køør dhøk uudi moge.

²¹'Ba päänye mo tuuŋ Benjamen ki køør dhøk uudi moge beege Jerikö, ki Bëëth-Ogla, ki Emek-Këëcic,

²²ki Bëëth-Araaba, ki Dhemarayim, ki Bëthël,

²³ka Awim, ki Para, ki Opara,

²⁴ki Kipir-Amönay, ko Opni, ki Gëba; ni beege päänye apaar kurriiø ka atude moge moa en buutge.

²⁵Ki Gibien, ki Reema, ki Bëëröth,

²⁶ki Micpa, ki Keepira, ka Möja,

²⁷ki Rekem, ki Yirpiëël, ki Terala,

²⁸ki Cëëla, ki Ëëlëëp, ki pääny jø Jeebuc ni beeye Jerucalem, ki Giba, ki Kiriat; ni beege päänye apaar kurŋween ka atude moge moa en buutge. Manøgø beeye ŋöömö mana cïp jï jø tuuŋ Benjamen ki køør dhøk uudi moge.