Read anuak Jøcua 20 Bible Online

Jøcua 20 - anuak bible

Jøcua 20

¹Køøre Wuuö Jwøk acäänö ki Jøcua, ni kööe,

²ni «Caanï jï jø Icriel, ni kööï jïge, ni ‹Jëëtu ki päänye mo bëëdö na mo gwøk røk, kaawat mana nø caana gø jïïu ki dhi Modhe,

³kiper nee ŋat mo nägö ki dhaanhø ni ba kame nee reŋ ya aciel dïge, ni ö päänye moøgø ni tïmge na kwör gwøk røk jïïu kiper jø ocool kwöri.

⁴« ‹'Ba ŋat mo onägö ki dhaanhø doo reŋŋa yi pääny aciel røk päänye moøgø, ni ci dhi kiir kar acooŋa, ni lam luubö mare ni wïnyö jï jø døøŋŋø mo pääny manøgø; ni ö jø døøŋŋø moøgø ni jïëcge ŋatøgø nee ö yi pääny marge, ni moocge eni ki kany bëëde yie, ni put bëëtö dïge kaagø.

⁵'Ba ni näk ŋato cool kwör orïŋ køør ŋata 'näk dhaanhø enø, jø døøŋŋø mo pääny manøgø ŋata no onägö ki dhaanhø ba dege cïbö jï ŋato cool kwör, kiper eni wati anääe ni ba kame, ni bäŋ män yïthakicge ki gø dïkwøŋ cøøn.

⁶Ni ö ŋata no onägö ki dhaanhø ni bëëde pääny manøgø këël kanyo ci kar ŋøl luup nyïm jø acooŋa. Køøre eni puta bëëtö kaagø këël kanyo thøw Kwääy Lam Mana Dwøŋ na nut yïth cwiiri moøgø. Køøre nø, løny jïre ki man døø paare na en yi pääny mana rïŋŋe ki yie.› »

⁷Kanyøgønø jø Icriel päänye moi aputge cïp kur keerge, ni beege Këdëc na en Galili na en mïëya en bäät kïte na näk mar jø tuuŋ Naptali, ki Cekam na en mïëya en bäät kïte na näk mar jø tuuŋ Ipariem, ki Kiriat-Arba, ni beeye Keeprön, na en mïëya en bäät kïte na näk mar jø tuuŋ Juuda.

⁸'Ba ki løø Naam Jördan jï løø kur tuul-cäŋ, løøa näk neeta rege ki Jerikö, päänye moa jierge beege Böcör na en jï kuna en dï paap bäät thuur yi ŋöömma näk ree ee päärö na näk mar jø tuuŋ Ruben, ki Ramöth na en Gelät na näk mar jø tuuŋ Gaat, ki Gölan na en Baacan na näk mar jø tuuŋ Maneeca.

⁹Moøgø beege päänye moa jier kiper jø Icriel ki juurre moa path moa näk bëëdö yïthakicge, kiper ŋat mo onägö ki dhaanhø ni ba kame nee reŋ ya aciel dïge, nee ba 'näk ŋato cool kwör këël kanyo ci nyïm jø acooŋa.