Read anuak Jøcua 21 Bible Online

Jøcua 21 - anuak bible

Jøcua 21

¹'Ba na tïme na kaagø, dïbwöthe mo jø tuuŋ Libay aö nyïm Eliedhar na näk Kwääy Lam Mana Dwøŋ, ki Jøcua o Nun, ki dïbwöthe mo wïth tuŋi mo jø Icriel.

²Ni cäänge ki geni kanya cwøl ni Cëëlö na en yi ŋööm Keenan, ni köge, ni «Wuuö Jwøk acäänö ki dhi Modhe nee wa mooc ki päänye mo bëëtwa yïthge, ki kwör kwaath mo ena buut päänye moøgø kiper lääc paac mowa.»

³Kanyøgønø, jø Icriel jø tuuŋ Libay aputge mooc ki päänye ki kwör kwaath moge na en buutge, ni lwørge røk päänye moa no onø wëëk geni na kurge, kaawat mana nø caani ya Wuuö Jwøki.

⁴'Ba kanya tïme na ri pääŋ päänye ki køør ŋïïce mo wø tïïc ki ri kwääk ki baw, päänye mo ci jï dhøk uudi mo nyïïkwaac Kät aö wøk ki nyeŋge. 'Ba ki ri dhøk uudi mo nyïïkwaac Kät, nyïïkwaac Aran na näk Kwääy Lam Mana Dwøŋ, na käl ri jø tuuŋ Libay, päänye moa ci jïge ki køør ŋïïce mo wø tïïc ki ri kwääk ki baw beege päänye apaar kurdäk, ni lwørra røk päänye mo jø tuuŋ Juuda, ki jø tuuŋ Cimien, ki jø tuuŋ Benjamen.

⁵'Ba nyïïkwaac Kät moa dööŋ ajïtö ki päänye apaar ki køør ŋïïce mo wø tïïc ki ri kwääk ki baw, ni lwørra røk päänye mo dhøk uudi mo jø tuuŋ Ipariem, ki jø tuuŋ Daan, ki thääŋ tuuŋ Maneeca.

⁶Køøre nyïïkwaac Gërcön ajïtö ki päänye apaar kurdäk ki køør ŋïïce mo wø tïïc ki ri kwääk ki baw, ni lwørra røk päänye mo dhøk uudi mo jø tuuŋ Icakar, ki jø tuuŋ Acer, ki jø tuuŋ Naptali, ki thääŋ tuuŋ Maneeca mana en Baacan.

⁷Ni ö nyïïkwaac Mërari ni jïtge ki päänye apaar kurriiø ki køør dhøk uudi moge, ni päänye moøgø lwørra røk päänye mo jø tuuŋ Ruben, ki jø tuuŋ Gaat, ki jø tuuŋ Dhebulan.

⁸'Ba jø Icriel päänye moøgø ki kwör kwaath moa en buutge acïpge jï jø tuuŋ Libay ki køør ŋïïce mo wø tïïc ki ri kwääk ki baw, kaawat mana nø caani ya Wuuö Jwøki ki dhi Modhe.

⁹'Ba moi beege nyeŋ päänye moa lwør jø Icrielli røk päänye mo jø tuuŋ Juuda ki jø tuuŋ Cimien,

¹⁰na cïpge jï nyïïkwaac Aran, na näk dhi øtø aciel røk dhøk uudi mo Kät, na käl ri jø tuuŋ Libay. Ni beege na kwøŋ jïtö ki päänye ki køør ŋïïce mo wø tïïc ki ri kwääk ki baw.

¹¹'Ba jø Icriel Kiriat-Arba na näk ocaa ri kwar jø Anak, ni beeye pääny mana cwøl ni Keeprön, na en mïëya en bäät kïte løøa näk kur jø tuuŋ Juuda, acïpge jï nyïïkwaac Aran ki kwör kwaath moe na en buute kaace.

¹²'Ba pwöth mo pääny manøgø ka atude moe moa en buute onø cïp jï Kalëp o Jöpöni ni beeye kure.

¹³'Ba geni päänye moa cïpge jï nyïïkwaac Aran na näk Kwääy Lam Mana Dwøŋ beeye Keeprön na no ocïbö na pääny gwøk røk nee ŋat mo onägö ki dhaanhø reŋ yie, ki Libana,

¹⁴ki Jatir, ki Ëctemöa,

¹⁵ko Olön, ki Dabëër,

¹⁶ka Ayn, ki Jötha, ki Bëëth-Camic; ni beege päänye abïŋween, ki kwör kwaath moge na en buutge, ni lwørra røk päänye mo jø tuuŋ Juuda ki jø tuuŋ Cimien.

¹⁷'Ba päänye moa lwør røk päänye mo jø tuuŋ Benjamen beege Gibien, ki Gëba,

¹⁸ka Anathöth, ka Almön; ni beege päänye aŋween ki kwör kwaath moge na en buutge.

¹⁹Päänye bëët moa ci jï nyïïkwaac Aran na bëëdö na dïlämme beege päänye apaar kurdäk ki kwör kwaath moge na en buutge.

²⁰Køøre dhøk uudi mo nyïïkwaac Kät møga ni poot na jø tuuŋ Libay, gena jïtö ki päänye røk päänye mo jø tuuŋ Ipariem ki køør ŋïïce mo wø tïïc ki ri kwääk ki baw.

²¹'Ba päänye moa cïp jø Icrielli jïge beege Cekam na en mïëya en bäät kïte løøa näk kur jø tuuŋ Ipariem, ni beeye pääny mana no ocïbö na pääny gwøk røk nee ŋat mo onägö ki dhaanhø reŋ yie, ki Gëdher,

²²ki Kibicayim, ki Bëëth-Örön; ni beege päänye aŋween ki kwör kwaath moge na en buutge.

²³'Ba ki røk päänye mo jø tuuŋ Daan, beege Eltekë, ki Gebatön,

²⁴ka Ayalön, ki Gaat-Rimön; ni beege päänye aŋween ki kwör kwaath moge na en buutge.

²⁵'Ba ki røk päänye mo thääŋ jø tuuŋ Maneeca, beege Tanak, ki Gëth-Rimön; ni beege päänye ariiø ki kwör kwaath moge na en buutge.

²⁶Päänye bëët ki kwör kwaath moge na en buutge moa cïp jï dhøk uudi mo nyïïkwaac Kät moøgø beege päänye apaar.

²⁷'Ba moi beege päänye moa cïp jï nyïïkwaac Gërcön, na näk dhi øtø aciel røk dhøk uudi mo jø tuuŋ Libay; ni lwørra røk päänye mo thääŋ tuuŋ Maneeca møga. Päänye moa cïpge beege Gölan na en Baacan na no ocïbö na pääny gwøk røk nee ŋat mo onägö ki dhaanhø reŋ yie, ki Bë-Ëctëra; ni beege päänye ariiø ki kwör kwaath moge na en buutge.

²⁸'Ba ki røk päänye mo jø tuuŋ Icakar, beege Kicön, ki Dabirat,

²⁹ki Jërmut, ka Ayn-Ganim; ni beege päänye aŋween ki kwör kwaath moge na en buutge.

³⁰'Ba ki røk päänye mo jø tuuŋ Acer, beege Mical, ka Abidön,

³¹ki Këlkath, ki Reeyöp; ni beege päänye aŋween ki kwör kwaath moge na en buutge.

³²'Ba ki røk päänye mo jø tuuŋ Naptali, beege Këdëc na en Galili na no ocïbö na pääny gwøk røk nee ŋat mo onägö ki dhaanhø reŋ yie, ka Amöth-Dör, ki Kartan; ni beege päänye adäk ki kwör kwaath moge na en buutge.

³³Päänye bëët moa cïp jï nyïïkwaac Gërcön ki køør dhøk uudi moge beege päänye apaar kurdäk ki kwör kwaath moge na en buutge.

³⁴'Ba moi beege päänye moa cïp jï dhøk uudi mo nyïïkwaac Mërari, ni beeye dhi øt jø tuuŋ Libay mana no odööŋ; 'ba päänye moøgø lwørra røk päänye mo jø tuuŋ Dhebulan. Päänye moa cïp jø Icrielli jïge beege Jökniam, ki Karta,

³⁵ki Dimna, ki Nalal; ni beege päänye aŋween ki kwör kwaath moge na en buutge.

³⁶Ki røk päänye mo jø tuuŋ Ruben, beege Böcör na en jï kuna en dï paap bäät thuur yi ŋöömma näk ree ee päärö, na no ocïbö na pääny gwøk røk nee ŋat mo onägö ki dhaanhø reŋ yie, ki Jäc,

³⁷ki Kedemöth, ki Mëpät; ni beege päänye aŋween ki kwör kwaath moge na en buutge.

³⁸'Ba ki røk päänye mo jø tuuŋ Gaat, beege Ramöth na en Gelät na no ocïbö na pääny gwøk røk nee ŋat mo onägö ki dhaanhø reŋ yie, ki Maanayim,

³⁹ki Ëcbön, ki Jadher; ni beege päänye aŋween ki kwör kwaath moge na en buutge.

⁴⁰'Ba päänye bëët moa cïp jï nyïïkwaac Mërari ki køør dhøk uudi moge, ni beege dhøk uudi moa no odööŋ ri jø tuuŋ Libay, beege päänye apaar kurriiø, ni cïp jïge ki køør ŋïïce mo wø tïïc ki ri kwääk ki baw.

⁴¹'Ba päänye bëët moa cïp jï jø tuuŋ Libay na en dï ŋøøm moa no onø cïp na kur jø Icriel beege päänye ma pïëraŋween ka abära ki kwör kwaath moge na en buutge.

⁴²Ni pääny aciel man nø røk päänye moøgø da kwör kwaath moe mo ena buute ni beeye deŋŋe bäre; ni päänye moøgø bëët bëëdö na enøgønø.

⁴³'Ba Wuuö Jwøk ŋöömö bäre aput cïp jï jø Icriel, ni beeye ŋöömma kööŋe jï kwäcge kipere nee cïbe jïge; ni ö jø Icrielli ni macge ŋöömö manøgø ni putge bëëtö yie.

⁴⁴'Ba kaawat mana nø ö Wuuö Jwøki na kööŋe jï kwäcge, gena put mooc ki jwöm këël deŋ ŋöömö marge bäre, ni bäŋ dhaanhø aciel mo omaar cuŋŋö nyïmge røk nyïïmänge bëët kanya näk ri leny; ni ö Wuuö Jwøki ni put nyïïmän moge bëët cïp ceŋge.

⁴⁵Kanyøgønø, luup bëët moa beyø na caan Wuuö Jwøki kiper jø Icriel aput thur karge, ni bäŋ aciel mo odööŋ ni kär thur kare.