Read anuak Jøcua 22 Bible Online

Jøcua 22 - anuak bible

Jøcua 22

¹Køøre Jøcua jø tuuŋ Ruben, ki jø tuuŋ Gaat, ki thääŋ tuuŋ Maneeca acwøle,

²ni kööe jïge, ni «Uuni luup bëët moa ö Modhe na näk dhaanh Wuuö Jwøk na kööm uuni ki ge anø gwøgu, ni leŋŋu dwøra ki røk jammi bëët moa köömma uuni ki ge.

³Uuni thuwø nyïïmëëgu käru wiiø ki kanya beetu na yie bäär këël dïcäŋi en; 'ba ciik mo Wuuö Jwøk na näk Jwøu aputu gwøk møn.

⁴'Ba ennø, Wuuö Jwøk na näk Jwøu nyïïmëëgu amooe ki jwöm kaawat mana caan gø jïge. Kiper manøgønø, u aay nø ni døøu pou, yi ŋöömma cïp Modhe na näk dhaanh Wuuö Jwøk jïïu na kuru, na en løø Naam Jördan løøga.

⁵'Ba gïno tïïyu keere nø, koorru wïthu døc ni gwøgu ciik ki luup moa ö Modhe na näk dhaanh Wuuö Jwøk na kööm uuni ki ge, ki man putu bëëtö nou mëër ki Wuuö Jwøk na näk Jwøu ni caathu jööre bäre, ni gwøgu ciik moe, ni göögu ree, ni tïnynyu eni ki cwïnynyu bäre ka acaayu bäre.»

⁶Ni ö Jøcua ni gwïëth geni ni wëëk ge wääth, ni putge aa poge.

⁷'Ba ŋöömö mana en løø Naam Jördan jï løø kur tuul-cäŋ, na näk onø cïp Modhe jï thääŋ tuuŋ Maneeca na kurge, ena Baacan; 'ba ŋöömö mana cïp Jøcua jï thääŋ tuuŋ Maneeca maya na kurge ena løø Naam Jördan jï løø kur pänh-cäŋ yïthakic tuuŋge. 'Ba Jøcua wïth tuŋi moøgø na ariiø ki thääŋö yøø, awëëk wääth nee aage poge; ni put geni gwïëth,

⁸ni kööe jïge, no «U døøa pou ni uuna jiy mo okwär døc ni jïïu da lääc paac mo thööth døc, ki warkey, ki gwel-bïrö, ki nywïëny ma jwëëlli, ki nywïëny møga, ka abïïe mo thööth døc; ni pääŋŋu gïïa twierru baŋ nyïïmännu yïthakiyu ki nyïïmëëgu.»

⁹Ni ö jø tuuŋ Ruben, ki jø tuuŋ Gaat, ki thääŋ tuuŋ Maneeca ni døøge poge ni putge jø Icriel møga wii Cëëlö na en yi ŋööm Keenan, ni aacge ni ge cøøa ŋööm Gelät, ŋöömma näk onø wëëk geni na kurge, kaawat mana nø caani ya Wuuö Jwøki ki dhi Modhe.

¹⁰'Ba kanya ö jø tuuŋ Ruben, ki jø tuuŋ Gaat, ki thääŋ tuuŋ Maneeca na pïïcge bäät Naam Jördan løøa en yi ŋööm Keenan, gena put tïïö ki gïn wø cïp olämme bääte mo dwøŋ mo nëëni ni mïërö buut Naam Jördan kaace.

¹¹'Ba jø Icriel møga gïnögø awïnyge, ni køp, ni «Ka adïëri møn, jø tuuŋ Ruben, ki jø tuuŋ Gaat, ki thääŋ tuuŋ Maneeca gena nø tïïö ki gïn wø cïp olämme bääte deŋ ŋööm Keenan buut Naam Jördan, ni beeye løøa näk mar jø Icriel.»

¹²'Ba kanya ö jø Icrielli moøgø na wïnyge gïnögø, lwaa Icriel bäre rege aputge cooŋ Cëëlö, kiper nee cige nee këëtge ki wïth tuŋi moøgø.

¹³Køøre jø Icriel moøgø Piniac wär Eliedhar na näk Kwääy Lam Mana Dwøŋ ajääŋge yi ŋööm Gelät baŋ jø tuuŋ Ruben, ki jø tuuŋ Gaat, ki thääŋ tuuŋ Maneeca.

¹⁴'Ba jiy moa jääŋŋi ki Piniac na aciel beege dïbwöthe apaar, ni dïbwödhi aciel man nø käla dhi øt tuuŋ wänni na en røk wïth tuŋi mo jø Icriel moøgø; ni geni beege jøøa kwörge døøŋŋø dhøk uut wëëkge røk wïth tuŋi mo jø Icriel.

¹⁵'Ba jøøa jääŋŋi yøø, gena ci yi ŋööm Gelät baŋ jø tuuŋ Ruben, ki jø tuuŋ Gaat, ki thääŋ tuuŋ Maneeca, ni cäänge ki geni ni köge,

¹⁶ni «Man beeye dwør lwaa Icriel bäre, ni beeye lwaa Wuuö Jwøk, gena köö, na ‹?Aŋø, man ateeŋ gïn mo nyïëdi, ni tïïyu bääyö man dëër Jwø Icriel, ni gaau wøk dïcäŋi en ki jöör Wuuö Jwøk na dou caadhø, ki køør mana tïïyu gïn wø cïp olämme bääte man kiper dëëtu, ni maru beeye ageem ki Wuuö Jwøk dïcäŋ man en?

¹⁷?Aŋø, bääyö mana tïïø ki køør mana løø røø baŋ juu moa cwøl ni Pëëgör atïmö ni thiinh kiperø? Këël dïcäŋi en, dëëtø kere poot ba waany ki raay moøgø, këël na bëëde ni da ajäla mo opïï bäät lwaa Icriel ni beeye lwaa Wuuö Jwøk.

¹⁸?Aŋø, u dou cäŋa gaa wøk dïcäŋi en ki jöör Wuuö Jwøk na dou caadhø? 'Ba gïna tïïyu dïcäŋi en dëër Wuuö Jwøk ni maru ageem, diøø thuwø Wuuö Jwøk wëëye poot jääŋŋe bäät lwaa Icriel bäre.

¹⁹'Ba ennø, ni näk mo ŋöömö mana wëëk uuni nëëni kere ocienø ki baŋu, beerra man känhnhu yi ŋööm Wuuö Jwøk na näk oduŋkaanynye ogur piny yie, nou jïtu ki kuru yïthakicwa. 'Ba käru gëëmö ki Wuuö Jwøk ni ba gëëmu ki waani ki køør mana tïnynyu dëëtu ki gïn wø cïp olämme bääte mør, ni gïn wø cïp olämme bääte mar Wuuö Jwøk na näk Jwøk marø nutö.

²⁰?Aŋø, Akan o Dheera kär bääyö na bëëde, kiper mana tïm cwïnye ni päl ki gïïa no onø wëëk geni nee raanyge na bäre, ni ö wëërri mar Wuuö Jwøk ni ö bäät lwaa Icriel bäre? 'Ba kar kaace paa nyenøgø keere na thøw ki køør bääyö mana tïïe.› »

²¹Køøre jø tuuŋ Ruben, ki jø tuuŋ Gaat, ki thääŋ tuuŋ Maneeca aløkge, ni köge jï dïbwöthe mo wïth tuŋi møga mo jø Icriel,

²²ni «Kare møn, Jwøk na näk Wuuö Jwøk, Jwøa en teeki jïre, tier gïnögø ŋääe; 'ba beerra man ö jø Icrielli ki dëëtge kiree ni ŋäcge tier gïnögø. 'Ba ni näk mo tier gïnögø ageem, ni waano bääyö dëër Wuuö Jwøk møn, beerra man ö Wuuö Jwøki ni ba køny waani ceŋŋu dïcäŋ man en.

²³Ni näk mo gïn wø cïp olämme bääte man tïïcwa kiper nee wa gaawa wøk ki jöör Wuuö Jwøk na dewa caadhø, wala ni näk kiper nee wa cïpwa bääte ko olämme mo wø waaŋ bäre wala muuce mo beel, wala nee kiper nee wa cïpwa bääte ko olämme mo wø duunni ki mëër, beerra man ö Wuuö Jwøki ki dëëre kiree ni jääl waani.

²⁴«'Ba ka adïëri møn, gïnögø atïïcwa na gïn mo da tiere, ni marwa lwäyö ki gïno tägi yi nyïme; kiper løny man kö nyïïkwaayu jï nyïïkwaacwa, na ‹?Aŋø, da kuru cøøn løøa näk kur Wuuö Jwøk na näk Jwø Icriel?

²⁵Kiper Wuuö Jwøk Naam Jördan acïbe na keew mo ena yïthakicwa ki uuni, u na jø tuuŋ Ruben, ki jø tuuŋ Gaat. Uuni, bäŋ kuru løøa näk kur Wuuö Jwøk.› Kanyøgønø nyïïkwaayu nyïïkwaacwa putge ka mänö ki man ba wøørge Wuuö Jwøk.

²⁶«Kiper manøgønø, waana cädö ni beerra man tïïwa ki gïn wø cïp olämme bääte, ni paa kiper nee wa cïpwa bääte ko olämme mo wø waaŋ bäre wala olämme møga;

²⁷'ba beeye kiper nee tïme ni caala gïn ma nyuudhi mo ena yïthakicwa ki uuni ki beenhnhe 'moø moo ööi køørø, ni nyootha gø ni løny jïwa ki man öwa yi ŋöömö mana en oduŋkaany Wuuö Jwøki yie, nee eni tïnywa møn, ni cïpwa olämme mowa jï Wuuö Jwøk ki uuni na aciel, ni beege olämme mo wø waaŋ bäre, ko olämme møga, ko olämme mo wø duunni ki mëër; nee ba tïme ni løny jï nyïïkwaayu ki man köge jï nyïïkwaacwa yi nyïme, ni ‹Uuni bäŋ kuru cøøn kuna näk løø Wuuö Jwøk.›

²⁸«Kiper manøgønø, waana cädö ni kanyo tïme na kar kaaca, ni näk mo jøøgø gïnögø caange caanø jïwa wala jï beenhnhe mowa moo ööi, køøre nø, nyïïkwaacwa läwa köö, ni ‹Neennu gïn wø cïp olämme bääte mana tïïc kwäcwa ni ge ŋwaala mar Wuuö Jwøk, ni paa kiper nee cïpö bääte ko olämme mo wø waaŋ bäre wala olämme møga; 'ba beeye kiper nee bëëde na nyuudhi mo ena yïthakicwa ki uuni.›

²⁹'Ba luubö mana caan enø, na køp ni gïn wø cïp olämme bääte mana tïïcwa en, ni tïïcwa ni marwa ageem ki Wuuö Jwøk, nee wa cïpwa bääte ko olämme mo wø waaŋ bäre, ki muuce mo beel, ko olämme møga, ni gïn wø cïp olämme bääte mar Wuuö Jwøk na näk Jwøwa nutö nyïm oduŋkaara na näk kar bëëtö mare, luubö manøgø karwa tïme ni bäär ki gø.»

³⁰'Ba kanya ö Piniac na näk Kwääy Lam Mana Dwøŋ, ki dïbwöthe mo lwaa Icriel, ni beege jøøa kwörge døøŋŋø geni dhøk uut wëëkge, na wïnyge gïna caan jø tuuŋ Ruben, ki jø tuuŋ Gaat ki thääŋ tuuŋ Maneeca, yïthge amïnnö ki luubö manøgø.

³¹Ni ö Piniac wär Eliedhar na näk Kwääy Lam Mana Dwøŋ ni kööe jï jø tuuŋ Ruben, ki jø tuuŋ Gaat, ki thääŋ tuuŋ Maneeca, ni «Dïcäŋi ennø aŋäcwa møn ni Wuuö Jwøk nutö yïthakiyø, kiper gïnögø käru tïïö ni maru bääyö dëër Wuuö Jwøk møn; 'ba ennø jwïëy mo jø Icriel agwøgu cer Wuuö Jwøk.»

³²Køøre Piniac wär Eliedhar na näk Kwääy Lam Mana Dwøŋ ki dïbwöthe gena duuö ki yi ŋööm Gelät baŋ jø tuuŋ Ruben ki jø tuuŋ Gaat, ni duuge yi ŋööm Keenan baŋ jø Icriel ni caange luup jïge.

³³'Ba jø Icriel moøgø yïthge amïnnö ki luubö manøgø ni pwøcge Jwøk; ni ö geni ni kärge cädö këët ki man cige nee këëtge ki jø tuuŋ Ruben ki jø tuuŋ Gaat, nee ŋöömö mana bëët wïth tuŋi moøgø yie raanyge.

³⁴'Ba jø tuuŋ Ruben ki jø tuuŋ Gaat, gïn wø cïp olämme bääte manøgø aputge cwøl ni «Nyuudhi»; kiper mana köge, ni «Gïnögø beeye nyuudhi mano bëëdö yïthakiyø, ni nyootha gø ni Wuuö Jwøk beeye Jwøk møn.»