Read anuak Jøcua 23 Bible Online

Jøcua 23 - anuak bible

Jøcua 23

¹'Ba kanya nø tïme na køør cwiiri møøk, ni Wuuö Jwøk jø Icriel ee nø mooc ki jwöm, ni bäŋ leny këët yïthakicge ki nyïïmänge bëët moa en deŋ ŋöömö marge bäre, ni Jøcua onø jalø ni cwiiye oløny ni thööth døc,

²eni na Jøcua enø, jø døøŋŋø, ki dïbwöthe mo wïth tuŋi, ki jø wø ŋøl luup, ki jø kööre, ni beege mo jø Icriel bëët, acwøle ni kööe jïge, ni «Aani, aana nø jal ni cwiiya thööth døc.

³'Ba uuni Wuuö Jwøk na näk Jwøu, gïïa tïïe bëët kiperu dëët wïth juurre moa bëëdö yi ŋööm Keenan bëët ajootu, kiper beeye Wuuö Jwøk na näk Jwøu na bëëdö ni këëdö kiperu.

⁴Neennu, aani ŋöömö bäre anø pääŋŋa jïïu ki køør ŋïïce mo wø tïïc ki ri kwääk ki baw nee tïme ni beeye ŋöömmo dööŋ jï wïth tuŋi mou, ni ŋöömö manøgø tägi ka Naam Jördan na en jï løø kur tuul-cäŋ këël mana aae ni këët deŋ naama dwøŋ na en jï løø kur pänh-cäŋ, ni wïth juurre bëët moa en yi ŋöömö manøgø, møøk dïge ŋøøm moge yøø nø mac, ni møøk dïge ŋøøm moge poot kärø maaø.

⁵'Ba Wuuö Jwøk na näk Jwøu, jøøgø di keethø, ni put geni riem wøk nyïmmu; ni mayu ŋøøm moge, kaawat mana nø ö Wuuö Jwøki na näk Jwøu na caan gø jïïu.

⁶«Magu rou døc ki man gwøgu ciik bëët moa no ogöör Modhe piny yi wëël ciik ni kïthu geni bäät tïïc; kär nou gaa wøk ki røk ciik moøgø ni ba gaau bäät cwïyu wala bäät cämmu.

⁷Käru dwätö ki wïth juurre moa no odööŋ yïthakiyu, ni ba cøøru nyeŋ juu moge, ni ba kööŋŋu røk juu moge, ni ba tïnynyu juu moge, ni ba këëllu cøŋŋu piny nou wøøra juu moge.

⁸'Ba uuni, putu bëëtö ni uuno göök ri Wuuö Jwøk na näk Jwøu kaawat mana tïïyu këël dïcäŋi en.

⁹Kiper Wuuö Jwøk wïth juurre mo døøŋŋø mo teek anø riem wøk nyïmmu, ni bäŋ ŋat mo ocuŋŋö nyïmmu kanyo näk ri leny këël dïcäŋi en.

¹⁰Dhaanhø aciel dëëtu jiy ma kuma di riemmø, kiper beeye Wuuö Jwøk na näk Jwøu na bëëdö ni këëdö kiperu, kaawat mana nø caan gø jïïu.

¹¹«'Ba uuni, gwøgu rou døc ki man bëëdu nou mëër ki Wuuö Jwøk na näk Jwøu.

¹²Kiper ni näk mo uuno døø ŋäthu ni göögu røk juurre moøgø no odööŋ yïthakiyu yøø, ni nywømmu dëëtu ki geni, ni dwätu ki ge, ni ö geni ni dwätge ki uuni,

¹³wär putu ŋäc nø ni Wuuö Jwøk na näk Jwøu juurre moøgø ba riem wøk nyïmmu këët; 'ba ge puta tïmö ni caala abïëp ka akupa kiperu, ni caala alaŋŋa mo u di pöötö ki gø, ni caalge koodhi mo cööba nyeŋŋu, këël mano putu thumö ki thøø ni bäŋ dhaanhø aciel rou mo dööŋ yi ŋöömmi ni beer en na no onø cïp Wuuö Jwøki na näk Jwøu jïïu.

¹⁴«'Ba neennu, dïcäŋi ennø, kara aløny ni cään ki man thøøa, naa cøøa jöör wø caath jø bäät pinynyi bëët; 'ba oløny ni ŋäc ŋati man nø dëëtu ki cwïnye bäre ka acaaye bäre, ni luup bëët moa beyø na caan Wuuö Jwøki na näk Jwøu athur karge jïïu; gïïögø bëët aput thur karge jïïu ni bäŋ aciel mo odööŋ dëëtge ni kär thur kare.

¹⁵'Ba kaawat mana ö Wuuö Jwøki na näk Jwøu na wëëk luup bëët thur karge moa beyø na caane kiperu, eni na Wuuö Jwøk thuwø gïï mo leth di kälö bäätu ni näk uuno bääyö, këël mano dïïr wïthu yi ŋöömmi ni beer en, ni beeye ŋöömma cïbe jïïu, eni na Wuuö Jwøk na näk Jwøu.

¹⁶Ni näk mo luumma tuut Wuuö Jwøki na näk Jwøu na kööm uuni ki gø you kaalø, ni cou ni tïnynyu juu møøk, ni këëllu cøŋŋu piny nou wøøra geni, kanyøgønø Wuuö Jwøk wëëye pute ka jääŋŋö bäätu kaamar maac mo liel, ni laaru thumö bëët ki thøø yi ŋöömmi ni beer en, ni beeye ŋöömma cïbe jïïu.»