Read anuak Jøcua 4 Bible Online

Jøcua 4 - anuak bible

Jøcua 4

¹'Ba kanya nø tïme ni jø Icriel bëët onø thum løø Naam Jördan løøga, Wuuö Jwøk acäänö ki Jøcua ni kööe,

²ni «Kwänyu ki jiy apaar kurriiø dëët jø Icriel, ni ŋati man nø käla ri wï tuuŋ man nø,

³ni köömmu geni, ni kööu, ni ‹Cou dï Naam Jördan kany bëët dïlämme ni ge cuŋŋö ni tietge ege këël piny yie ice; ni lwötu ki kïte apaar kurriiø ni kääru geni ni cïbu ge piny kanyo butu yie dïwääni en.› »

⁴Køøre Jøcua jøøa näk apaar kurriiø acwøle, ni beege jøøa näk ee nø jier røk jø Icriel, ni ŋati man nø käla ri wï tuuŋ man nø.

⁵Ni kö Jøcua jïge, ni «Cou dï Naam Jördan kanya en acanduk mar Wuuö Jwøk na näk Jwøu yie, ni ö ŋati man nø dïïu ni lwöte ki kïdi ni käär gø ki göönne, ni you päärö ki køør kwään wïth tuŋi mo jø Icriel.

⁶Beerra man bëët gïnögø na nyuudhi jïïu; 'ba kanyo ö wäätu noo pëënyge uuni yi nyïme, ni köge, ni ‹?Kïte moi tiere agïnaŋø ki baŋu?›

⁷køøre nø, u doo köö jïge, ni ‹Tiere beeye ni pï Naam Jördan aniŋul nyïm acanduk man wø nyooth luumma tuut Jwøki ki jiy na näk mar Wuuö Jwøk. Kanya ö acanduki manøgø na ŋøli løøga, pï Naam Jördan aput niŋul.› 'Ba kïte moøgø puta bëëtö na gïr par wïc jï jø Icriel na bäre bäre.»

⁸'Ba jø Icriel gïnögø atïïcge kaawat mana ö Jøcua na kööm geni; ni cige ni lwötge ki kïte apaar kurriiø dï Naam Jördan, ni tïïcge gø na kare kaawat mana ö Wuuö Jwøki na kööm Jøcua ki gø, ni ege päärö ki køør kwään wïth tuŋi mo jø Icriel; ni käärge kïte moøgø këël mana pïïcge kanya butge yie, ni cïpge ge piny kaace.

⁹Køøre Jøcua alwötö ki kïte apaar kurriiø møøk ni löör ge piny kanya ciel dï Naam Jördan, kanya cuŋ dïlämme moa biel acanduk man wø nyooth luumma tuut Jwøki ki jiy yie; 'ba kïte moøgø poot nut kaace këël dïcäŋi en.

¹⁰'Ba dïlämme moa biel acanduk, gena put bëëtö ni ge cuŋŋö dï Naam Jördan këël mana thum jammi bëët ki tïïc, ni beege jammi bëët moa ö Wuuö Jwøki na kööm Jøcua ki ge nee caane jï jiy. 'Ba jammi bëët atïïcge na karge kaawat mana ö Modhe na kööm Jøcua. Køøre nø, jiy bëët aput ŋut løøga ni ge rwäänhnhö.

¹¹'Ba kanya nø thum jiyi løøga bëët, acanduk mar Wuuö Jwøk ki dïlämme moa biel gø, gena put ŋut løøga thuwø ni nëënö jï jiy bëët.

¹²Ni ö jø tuuŋ Ruben ki jø tuuŋ Gaat ki thääŋ tuuŋ Maneeca ni pööthge maal nyïm jø Icriel ni dëëtge ege jiiŋŋø kiper leny, kaawat mana caani ya Modhe jïge.

¹³'Ba beege jiy mo jïtö ki kume ma pïëraŋween mo jïge da jap leny, na ŋut løøga kiper leny, na ci pwöl Jerikö ni ge cäädhi ka køør dwør Wuuö Jwøk.

¹⁴'Ba dïcäŋeca Wuuö Jwøk Jøcua atïïe na dhaanhø mo kare dwøŋ nyïm jø Icriel bëët; ni ö geni ni putge tïmö ni lwäär ki eni, ki yïth nïr kwøw moe bëët, kaawat mana bëëtge ni ge lwäär ki Modhe.

¹⁵'Ba kar kaace Wuuö Jwøk aköö jï Jøcua,

¹⁶ni «Kööm dïlämme moø ni käär acanduk man wø nyooth luumma tuut Jwøki ki jiy yøø, nee öge wøk ki yi Naam Jördan.»

¹⁷Ni ö Jøcua ni kööm dïlämme, ni kööe, ni «Ööu wøk ki yi Naam Jördan nø.»

¹⁸'Ba kanya tïm dïlämme moa käär acanduk man wø nyooth luumma tuut Jwøki ki jiy na näk mar Wuuö Jwøk, ni ge ööa wøk ki dï Naam Jördan, kanya tïm tietge ni këëta kanya no otal ennø, pï Naam Jördan aput døø karge, ni put døø ri kwödö ki deŋŋe manøgø bäre kaawat mana bëëde dïkwøŋ.

¹⁹'Ba jø Icriel aö wøk ki bäät Naam Jördan kanya tïm nïr dwääyi mana dïkwøŋ na apaar; ni tïïcge twïër marge kanya cwøl ni Gëlgela na en deŋ Jerikö jï løø kur tuul-cäŋ.

²⁰Ni ö kïte moa näk apaar kurriiø na kälge ki yi Naam Jördan, ni puti ya Jøcua löör piny kanya ciel Gëlgela kaace.

²¹Ni kö Jøcua jï jø Icriel, ni «Kanyo ö obwöre mou noo pëënyge uuni yi nyïme, ni köge, ni ‹?Kïte moi a kïte mo ŋøøni?›

²²køøre nø, dou lamø jï obwöre mou, ni kööu, ni ‹Jø Icriel Naam Jördan man en aŋølge ni ge cäädhi ka kany mo otal.›

²³Kiper Wuuö Jwøk na näk Jwøu pï Naam Jördan ataale nyïmmu këël mana ŋutu løøga, kaawat mana tïïc Wuuö Jwøki na näk Jwøu thuwø dëër Naama Kwaar, na taal gø nyïmmø këël mana putø ŋut løøga.

²⁴Manøgø beeye kiper nee ŋäc jø bäät pinynyi bëët ni Wuuö Jwøk jïre da teek, ni ö uuni ni putu bëëtö nou lwäär ki Wuuö Jwøk na näk Jwøu na bäre bäre.»