Read anuak Jøcua 5 Bible Online

Jøcua 5 - anuak bible

Jøcua 5

¹'Ba kanya ö nyeye bëët mo jø Amör moa en løø Naam Jördan løøga jï løø kur pänh-cäŋ, ki nyeye mo Keenan bëët moa en bäät naama dwøŋ, na wïnyge gø ni Wuuö Jwøk pï Naam Jördan ataale nyïm jø Icriel këël mana ŋutge løøga, geni cwïnyge abwøk, ni päth bäätge ki lwär kiper jø Icriel.

²Kanyøgønø, Wuuö Jwøk aköö jï Jøcua, ni «Wärï tïïï ki kïte mo deŋge beth na gïï daŋ; ni daŋï cwøw mo jø Icriel moa näk kär kwøŋ daŋ dïkwøŋ.»

³Køøre Jøcua atïïö ki kïte mo deŋge beth, ni daŋ cwøw mo jø Icriel ki geni kaace, ni put kaace cwøl ni Thuur Daŋ.

⁴'Ba tier gïna ö Jøcua na daŋ geni kipere beeye en; cwøw leny bëët moa ö wøk ki Ijep na no onø daŋ kanya enge Ijep, atïmö no onø thumö ki thøø dï paap kanya cääthge.

⁵'Ba beege jiy moa lwaarø ki geni øtjöö dï paap kanya ö jøwi wøk ki Ijep na näk poot kär daŋø.

⁶Kiper jø Icriel acäädhö dï paap ki cwiiri ma pïëraŋween, këël mana thøw cwøw lenynyi bëët moa ö wøk ki Ijep, kiper mana kärge dwør Wuuö Jwøk leŋø. Ni beege jøøgø na cään Wuuö Jwøki ki ge na kööe ni ŋöömma näk caak ki maar kïc päl yie ba dege joodø, ni beeye ŋöömma kööŋe kipere jï kwäyø nee cïbe jï nyïïkwaacge.

⁷'Ba obwöre moge moa laa Wuuö Jwøki karge adaŋ Jøcua, kiper geni ge kär daŋ wëëkge kanya cääthge dï paap.

⁸'Ba kanya nø ö jø Icrielli na thöörge cwøw bëët ki daŋ, gena put bëëtö kwöra enge yïthge twïër këël mana caŋ dëët jiyi moa daŋ.

⁹Køøre Wuuö Jwøk aköö jï Jøcua, ni «Dïcäŋi en, gïna raac na eel jø Ijepi bäätu aŋeela wøk.» 'Ba nyeŋ kaace aput cwøl ni Gëlgela këël dïcäŋi en.

¹⁰'Ba kanya bëët jø Icrielli ni twïër marge ege tïïö Gëlgela, cäŋ Cäŋa Pööth Thøøe Yie awøørge pwöl Jerikö ni nïr dwääy apaar kurŋween ni piny a wïthïënhö.

¹¹'Ba na tïme na amöölla maya, ni cäŋ Cäŋa Pööth Thøøe Yie ege nø wøør, dïcäŋ manøgø kiree jø Icriel gena cämö ki caammi moa ciek yi ŋöömmögø, ni beege muunni mo rege bäŋ thømmø ki beel mo omuuö.

¹²Ni ö meena ni neeŋul ka amöölla maya køør dïcäŋ mana nø cämge ki caammi moa ciek yi ŋöömmögø; ni tïm jø Icrielli ni bäŋ meena jïge këët. 'Ba gena bëëdö ni ge cämö ki caammi moa ciek yi ŋööm Keenan cwiinøgø.

¹³'Ba kanya en Jøcua buut Jerikö, wïïe atïŋ maal ni lwïthe; ni joot dhaanhø mør ni cuŋŋö nyïme no opëëllö dagø cere; ni ö Jøcua ni ci baŋe ni kööe jïgø, ni «?Ï ena løøk marwa wala ï ena løø nyïïmän?»

¹⁴Ni kö ŋatøgø, ni «Patha enøgønø. Aani, a ööi ni aana kwääy lwaa leny mar Wuuö Jwøk.» Kanyøgønø, Jøcua cøŋŋe akëël piny ni kuul wïïe piny, ni kööe jïgø, ni «?Kwäärö, agïnaŋø na diï caanø jïra nee tïïa, a na laŋŋø marï?»

¹⁵'Ba ŋata näk kwääy lwaa leny mar Wuuö Jwøk aköö jï Jøcua, ni «Käl war wøk tietï, kiper kanyo cuŋŋï yie enø beeye kany mo ena kur keere na mar Wuuö Jwøk.» Ni ö Jøcua ni tïïc gïnögø.