Read anuak Jøcua 6 Bible Online

Jøcua 6 - anuak bible

Jøcua 6

¹'Ba kar kanyøgønø, dhi kiir mar pääny Jerikö aput bëëtö no odëëdö ni teek døc kiper jø Icriel; ni bäŋ dhaanhø mo odøny wøk, ni bäŋ dhaanhø thuwø mo oduny yie.

²'Ba Wuuö Jwøk aköö jï Jøcua, ni «Neenï, pääny Jerikö ki nyeya mare ki jø leny moa en yie na teek yaa nø cïp cerï.

³'Ba ïïni ki jø leny bëët, deŋ kiir mar päänyögø wär wïrru yie aciel ki dïcäŋ aciel man nø; ni tïïyu gïnögø ki nïne abïciel.

⁴Køøre thuwø dïlämme abïriiø wär käätge ki tuŋi abïriiø mo wø kooth, ni käärge geni nyïm acanduk man wø nyooth luumma tuut Jwøki ki jiy. 'Ba noo tïme na bïriet nïne, deŋ pääny manøgø bäre wär wïrru kwöre abïriiø, ni ö dïlämme ni koothge tuŋi.

⁵'Ba kanyo tïme ni dïlämme tuŋi køthge køthø ni ege maa ri gø jaak, kanyo wïnynyu dööt tuŋi, jiy bëët wär putge kwöŋŋö ni döötge ena maal døc. Kar kanyøgønø, kiir mar pääny manøgø puta pädhö no oninyaŋŋa, ni ö jiyi ni cige yie ni ŋati man nø cøra nyïme ni tiir jaak.»

⁶Køøre Jøcua o Nun dïlämme acwøle ni kööe jïge, ni «Lwørru acanduk man wø nyooth luumma tuut Jwøki ki jiy, ni ö dïlämme abïriiø ni käätge ki tuŋi abïriiø mo wø kooth, ni käärge geni nyïm acanduk manøgø na mar Wuuö Jwøk enø.»

⁷Køøre Jøcua aköö jï jiy, ni «Bwödhu maal ni wïrru deŋ kiir mar pääny Jerikö, ni ö jiyi møøk mo dëëtge ege jiiŋŋø kiper leny ni cääthge nyïm acanduk mar Wuuö Jwøk.»

⁸'Ba kanya ö Jøcua na nø cään jiy, dïlämme abïriiø mo käädö ki tuŋi abïriiø mo wø kooth, gena put pööth maal nyïm Wuuö Jwøk ni koothge tuŋi; ni ö acanduki man wø nyooth luumma tuut Jwøki ki jiy na näk mar Wuuö Jwøk, ki dïlämme moa käär gø, ni en køørge.

⁹Ni ö jiyi moa näk dëëtge ege jiiŋŋø kiper leny ni pööthge maal nyïm dïlämme moa näk kudhö ki tuŋi, ni ö lwaae mo leny møga ni enge køør acanduk, ni dïlämme cäädhi ni ge poot kudhö ki tuŋi.

¹⁰'Ba Jøcua jiy aköömme, ni kööe, ni «Kär nou kwöŋŋö, ni bäŋe döötu mo wïnyi, ni bäŋe dwøl mo ö wøk ki dhøgu, këël dïcäŋo kööa yie, ni ‹Kwöŋŋu.› Køøre nø, uuno put kwöŋŋö.»

¹¹'Ba manøgø beeye kanya ö Jøcua na tïïc deŋ kiir mar pääny Jerikö bäre nee wïr yie aciel, na acanduk na näk mar Wuuö Jwøk di käärö; køøre gena duu twïër ni butge yi gø wäänögø.

¹²'Ba na tïme na riet nïne ka amöölla cøøn, Jøcua apäny maal, ni ö dïlämme ni lwørge acanduk mar Wuuö Jwøk.

¹³Ni ö dïlämme moa näk abïriiø moa käär tuŋi abïriiø mo wø kooth ni pööthge maal nyïm acanduk mar Wuuö Jwøk, ni ge cäädhi ni tuŋi moøgø køthge køthø; ni ö jiyi møøk moa näk dëëtge ege jiiŋŋø kiper leny ni pööthge maal nyïm dïlämme moa näk kudhö ki tuŋi; ni ö lwaae mo leny møga ni putge ci køør acanduk mar Wuuö Jwøk, ni dïlämme moa näk abïriiø tuŋi poot køthge køthø.

¹⁴'Ba manøgø beeye gïna tïïcge ri riet nïne, ni wïrge deŋ kiir mar pääny Jerikö bäre yie aciel, ni døøge twïër. Ni tïïcge gïnögø ki nïne abïciel.

¹⁵'Ba na tïme na bïriet nïne, gena päny maal ki bäc øw ni cige ni wïrge kiir mar pääny Jerikö kwöre abïriiø ki køør ciik mana näk ocaanø; ki dïcäŋögø keere deŋ kiir awïrge ki kwöre abïriiø.

¹⁶'Ba na tïme na ri bïrietge, kanya ö dïlämme na koothge tuŋi, Jøcua aput köö jï jiy, ni «Kwöŋŋu nø, kiper Wuuö Jwøk päänyi en ee nø cïp jïïu.

¹⁷Ni ö päänyögø ki gïïa en yie bëët ni putu ge raanynyø na bäre bäre, ni caala man wø cïp olämi jï Wuuö Jwøk ni bäŋgø mo wec. 'Ba Reeyap nyaana näk kääbi keere ki jøøa en yi øtø ki eni na aciel obëëdö ni kwøw, kiper eni dïlëëwe moa jääŋŋö agwøe.

¹⁸'Ba uuni, dëëtu wär gwøgu ki gïïa näk onø wëëk uuni nee raanynyu na bäre bäre, kiper ni näk mo uuno lwötö rege, tïmö nou käla aranya bäät twïër mar jø Icriel, ni kännu bääte ki gïn mo leth.

¹⁹'Ba warkey bäre ki gwel-bïrö, ki gïïa no otïïö ki nywïënyö ma jwïël, ki moa no otïïö ki nywïëny møga jaak, beege gïï mo ena kur keerge jï Wuuö Jwøk. Gïïögø doo kïtha kanya no ojiiŋŋø na näk kar kän jï Wuuö Jwøk.»

²⁰Køøre kanya ö dïlämme na koothge tuŋi, jiy aput kwöŋŋö. 'Ba kanya ö jøøgø na wïnyge dööt tuŋi møn, gena put kwöŋŋö ni döötge ena maal døc, ni ö kiirri ni put pädhö no oninyaŋŋa, ni ö jiyi ni putge ci yi kiir, ni ŋati man nø cøra nyïme ni tiir jaak, ni putge pääny manøgø mac.

²¹Ni ö jø Icrielli ni 'näkge gïïa en yi päänyögø bëët ko opëëlle, ni beege cwøw ki mään, ko obwöre ki jø døøŋŋø, ki dhäk ki dïëk ka arëëni.

²²'Ba Jøcua aköö jï jøøa näk ariiø na liew paanøgø, ni «Cou yi øt nyaana näk kääbi ni kälu nyaanøgø wøk ki jøøa en yi øtø kaace bëët, kaawat mana nø kööŋŋu jïre.»

²³Køøre jaga näk wøpe na näk dïlëëwe, gena put ci yi øtø ni kälge Reeyap wøk, ki wänni ki menni ki nyïïmenni moa näk cwøw, ki jøøa en yi øtø bëët, ni beege tuuŋ Reeyap bëët; ni moocge geni ki kany jwömge rege yie deŋ twïër mana näk mar jø Icriel.

²⁴'Ba jø Icriel pääny manøgø ki gïïa en yie bëët awaaŋge ki maac. 'Ba warkey ki gwel-bïrö, ki gïïa no otïïö ki nywïënyö ma jwïël ki nywïëny møga keerge, akïthge kanya no ojiiŋŋø na kar kän na en yi oduŋkaany Wuuö Jwøk.

²⁵'Ba Reeyap nyaana näk kääbi, ki dhi øt wänni bäre ki jøøa en yi øde bëët, awec Jøcua nee kwøwge; ni ö nyaanøgø ni put bëëtö dï jø Icriel na bäre, kiper eni jiy moa jääŋ Jøcua nee Jerikö liewge agwøe.

²⁶'Ba kar kanyøgønø, Jøcua aput kööŋ, ni kööe, ni «Ŋato ö maal ni geer päänyi ni Jerikö en, acïëni oen bääte nyïm Wuuö Jwøk. Kanyo täge ki geer dëër kiir mar paanøgø, nyilaal mare mana näk kanynye othøw; ni kanyo kïth odhuulu mar dhi kiir, nyilaal mare mana näk aŋuunne othøw.»

²⁷'Ba Wuuö Jwøk aput bëëtö ki Jøcua, ni ö nyeŋ Jøcua ni put wïnynye yi ŋöömmögø bäre.