Read anuak Jøcua 8 Bible Online

Jøcua 8 - anuak bible

Jøcua 8

¹Køøre Wuuö Jwøk aköö jï Jøcua, ni «Kärï lwäyö ni ba bwøk cwïnyï. Lwør jø leny mo jø Icriel bëët, ni cou baŋ jø Gaay. Neenï, aani nyeny Gaay, ki jiye, ki pääny mare, këël ŋöömö mana näk mare bäre, yaa nø cïp cerï.

²Teeŋ gïna tïïyï ri pääny Jerikö ki nyeya mare, wär tïïyï ri pääny Gaay ki nyeya mare; 'ba jammi ki lääc paac moo twierru wär källu kiper dëëtu. 'Ba ïïni, wärï känï ki jø leny møøk ŋää paanøgø.»

³Køøre Jøcua ki jø leny bëët aput tïŋŋö ni ge cøøa baŋ jø Gaay; ni ö Jøcua ni kwänye ki jø leny mo teek marge okadhø, ni beege jiy ma kume ma pïëradäk, ni jääŋ ge wøk ki wäär.

⁴'Ba gena köömme ni kööe, ni «Neennu, uuni u cøøa kuna kannu dëëtu ŋää pääny manøgø. Kär karu tïïyu ni bäär ki gø. 'Ba uuni bëët, wäru bëëdu ni dëëtu you jiiŋŋø.

⁵Køøre nø, aani ki jiy bëët moa en buuta, wa nyiiga buut kiir. 'Ba kanyo tïme ni ge ööa baŋwa wøk kaawat mana tïïcge dïkwøŋ, kar kanyøgønø wa puta reeŋø ni wa ŋwieya geni.

⁶Ni ö geni ni rïŋge køørwa këël mano peewa geni kany mo bäär ki pääny marge, kiper geno köö, ni ‹Jø Icriel areeŋø ki øøni kaawat mana dïkwøŋ.› 'Ba waani, kanyo reŋwa ni wa ŋwieya geni,

⁷køøre nø, u puta ö maal ki kanya näk rou you kan yie, ni cou ni magu pääny manøgø, kiper Wuuö Jwøk na näk Jwøu pääny manøgø cïbe ceŋŋu.

⁸'Ba kanyo tïme ni pääny you nø mak, wär putu nyep ki maac; ni tïïyu ka køør dwør Wuuö Jwøk. Neennu, uuna nø köömma.»

⁹Køøre Jøcua jøøgø aput wëëk wääth, ni cige ni putge rege kan yïthakic Bëthël ki Gaay, ni ge ena løø Gaay jï løø kur pänh-cäŋ. 'Ba dïwäänögø Jøcua aput but dï jø leny møga.

¹⁰'Ba na tïme na amöölla cøøn Jøcua apäny maal ni cooŋ jø leny kanya ciel, ni ö eni ki jø døøk Icriel ni pööthge maal nyïm jø leny moøgø ni cige Gaay.

¹¹Køøre jø leny bëët moa aay ki Jøcua, gena cøø ni pïïcge kany mo cään ni ge dïët ki pääny manøgø, ni tïïcge twïër marge jï kuna en wï-piny ki Gaay. 'Ba yïthakic jø leny mo jø Icriel ki Gaay da gool.

¹²'Ba Jøcua jø leny mo jïtö ki kume abïïc alwøre ni jääŋ geni nee rege kange yïthakic Bëthël ki Gaay, ni ge ena løø Gaay jï løø kur pänh-cäŋ.

¹³'Ba Jøcua ki jø døøk Icriel jiy ege nø cïïmmö, ni jø leny moa thööth ena jï løø wï-piny ki Gaay, ni lwaae mo leny møga okan jï løø kur pänh-cäŋ, ni ö Jøcua ki jø leny moa en buute ni putge dï gool caath ki wäär manøgø.

¹⁴'Ba kanya ö nyeny Gaay na neen gïnögø, eni ki jiye gena put päny maal ka amöölla cøøn ni ge läädö, ni cige baŋ leny ki jø Icriel kanya näk kar leny na näk dïët ki goor Jördan ni wø cwøl na Araaba. 'Ba kuc nyeny Gaay ni da jø leny mo okanø kipere ŋää pääny manøgø.

¹⁵Kanyøgønø, Jøcua ki jø leny mo jø Icriel moa en buute bëët dëëtge atïïcge kaamar jiy mo oböötö, ni putge reeŋø ki jø Gaay ni ge reŋi ka øtjöö mana näk coonya dï paap.

¹⁶Ni ö cwøwi bëët moa en paac ni cwøli nee reŋge køør Jøcua ki jø Icriel, ni putge reŋ køørge, ni ö geni ni puti pee kany mo bäär ki paac.

¹⁷'Ba bäŋ dhaanhø aciel røk jø Gaay ki jø Bëthël mo odööŋ mo kär ci kuna reŋ køør jø Icriel, ni putge dhi kiir marge wec ni ŋaam jaak, ni reŋge køør jø Icriel.

¹⁸Køøre Wuuö Jwøk aköö jï Jøcua, ni «Rwiec tøŋ manø ni cerï enø bäät pääny Gaay, kiper päänyögø ocïba cerï.» Ni ö Jøcua ni put tøŋ mana en cere rwiec bäät päänyögø.

¹⁹'Ba kanya ö Jøcua na rwiec cere, jø leny moa näk rege ege kanø ŋää paac apäny maal ki kanya enge yie; ni putge reeŋø ni dønyge yi pääny manøgø ni putge gø mak. Ni ö geni ni laarge pääny nyep ki maac.

²⁰'Ba kanya ö jø Gaay na lwïthge ŋäthge, pääny aputge joot ni waaŋ ni jïrö onitul, ni put nyeŋge tïmö ni rïïŋö ni bäŋ kany reŋge yie, kiper jø Icriel, na køørge ŋwiecge dï paap, nyïmge aluuge nee këëtge ki geni.

²¹'Ba kanya ö Jøcua ki jø leny mo jø Icriel moa en buute bëët na jootge gø ni pääny onø mak jiyi moa näk dëëtge ege kanø, ni jïc pääny onitul, nyïmge aputge løk ni 'näkge jø Gaay.

²²Ni ö jø Icrielli møga ni öge wøk ki yi päänyögø nee røømge ki jø leny mo Gaay. 'Ba jø leny mo jø Icriel bëët jø Gaay atiige dïër, ni jø møøk ena løøi ni jø møga ena løøga. Ni ö jø Icrielli ni putge jø Gaay bëët 'näk këël mana tïme ni bäŋ aciel mo odööŋ, ni bäŋgø mo obøth wala mo oreeŋø.

²³'Ba nyeny Gaay keere amakge ni kwøw ni kälge gø baŋ Jøcua.

²⁴'Ba kanya nø tïme ni jø Icriel jø Gaay moa reŋ køørge ege nø thöör ki 'näk pwöla dï paap, ni ge ege nø 'näk bëët këël mana thumge na bäre, jø Icriel bëët adøø baŋ jiy moa en pääny Gaay, ni 'näkge ge bëët.

²⁵'Ba dïcäŋögø cwøw mo Gaay ki mään bëët aput thøø, ni beege jiy ma kume apaar kurriiø.

²⁶'Ba Jøcua cere mana en tøŋŋi yie na rwiee, käre dwøk piny këël mana dïïr wïth jiy bëët moa bëëdö Gaay.

²⁷'Ba gïïa käl jø Icrielli kiper dëëtge beege lääc paac ki gïïa twierge keerge; ni gïnögø tïïcge ka køør dwør Wuuö Jwøk na kööm Jøcua ki gø.

²⁸Køøre Jøcua Gaay aput waaŋ ni put gø raanynyø na bäre, ni dööŋe no nikïïl këël dïcäŋi en.

²⁹Ni ö Jøcua ni 'näk nyeny Gaay ni lïër gø ri jaath këël mana tïm pinynyi na abøøya. 'Ba kanya nø päth cäŋŋi piny, Jøcua acïpö ki dwøl, ni cige ni kälge dëër gø wøk ki ri jaath, ni leeŋge gø dhi kiir mar pääny Gaay, ni putge kïte mo thööth löör bääte, ni kïte moøgø poot nut no olöör piny kanya ciel kaace këël dïcäŋi en.

³⁰Køøre Jøcua atïïö ki gïn wø cïp olämme bääte jï Wuuö Jwøk na näk Jwø Icriel, ni tïïe bäät kïnna cwøl ni Gëëbal;

³¹ni tïïc gø na kare kaawat mana ö Modhe na näk dhaanh Wuuö Jwøk na kööm jø Icriel ki gø, kaawat mana gööri Modhe piny yi wëël ciik; ni gïn wø cïp olämme bääte manøgø tïïc ka kïte mo kär tøø, ni bäŋ ŋat mo gut kïte moøgø ki nywïënyö mar tøk. Ni ö jø Icrielli ni putge cïpö bääte ko olämme jï Wuuö Jwøk, ni beeye olämme mo wø waaŋ bäre, ko olämme mo wø duunni ki mëër.

³²Ni ö Jøcua ni göör ciik piny bäät kïte møøk mo ena kaace, ni nëënö jï jø Icriel bëët, ni ŋwaala ciik piny moa näk onø göör Modhe.

³³Kanyøgønø, jø Icriel bëët ki jø døøŋŋø moge ki dïbwöthe ki dïŋut luup, gena put cuŋŋö lak acanduk man wø nyooth luumma tuut Wuuö Jwøki ki jiy, ki nyïm dïlämme na käl røk jø tuuŋ Libay na biel acanduk mar Wuuö Jwøk; këël juurre moa path na bëëdö dï jø Icriel ki wäät thwöth Icriel bëët, ge nut ni ge cuŋŋö kaagø. Ni jø møøk dëëtge cuŋŋa løøk maya ni ge dïët ki kïnna cwøl ni Geridhan, ni jøw møga cuŋŋa løøk maya ni ge dïët ki Kïn Gëëbal, kaawat mana ö Modhe na näk dhaanh Wuuö Jwøk na kööm ge dïkwøŋ, nee jø Icriel jïtge ki gwïëth.

³⁴Køøre cään, Jøcua luup bëët moa no ogöörö na ciik, ni møøk beege mo gwïëth ni møøk beege mo acïëni, akwaane ni dwøre ena maal; ni kwaane na kare ki køør moa näk ogöör piny bëët yi wëël ciik.

³⁵'Ba bäŋ luubö aciel mo odööŋ røk ciik moa cem Modhe ni kär kwaan Jøcua nyïm acooŋa mar jø Icriel bäre ki mään ko obwöre moa thenh thenh ki juurre moa path na bëëdö dïge.