Read anuak 1 Timöthi 2 Bible Online

1 Timöthi 2 - anuak bible

1 Timöthi 2

¹'Ba dïkwøŋ nø, aana köö, ni jiy doo kwaaya Jwøk, ni ge lämö, ni pëënyge gø, ni ge dwøga met ec baŋe kiper jiy bëët,

²ki nyeye, ki jøø ni kwörge døøŋŋø yøø, nee ø wëëk bëëtö mëëth ki bëët-mëër, ni øøna jø Jwøk, ni bëëtö marø wøp ki yïth jammi bëët.

³Ni beeye mana näk wøp na mïërö ki waŋ Jwøk na näk Pïëmi marø,

⁴ŋat wø many man piem jiy bëët, ki man kwanyge gïïa näk adïëri.

⁵Kiper beeye Jwøk aciel, ki nyïjöö aciel keere ni en yïthakic Jwøk ki jiy, ni beeye dhaanhnha näk Krictø Jecu,

⁶ŋata wïïr ree nyeŋ kwöc jiy bëët, ni gïre ocaanø ki kanya näk kare.

⁷Ni beeye gïna jier aani kipere, naa tïma naa køpa luum Jwøk, ni näga nyïïatwiel, ni aana dïpööy jï juurre, ki man pwönynya geni ki ŋäädhe ka adïëri. 'Ba a caana adïëri, naa ba caan tööt.

⁸'Ba mana manynya nø, jiy doo lämö yïth kwörögø bëët, ni dëëtge ege cïp kur keerge, ni thaaŋge ceŋge jï Jwøk ni bäŋ gootø wala wëër.

⁹'Ba mään thuwø, doo käära abïïe mo orømø ki bëëtö mo beer ni patha mo atöör, ni wøp marge man døøcge dëëtge mo mïërö patha dwøc wïc, wala käär warkey, wala käär tii mo beyø, ki gïï mo ŋeew ka jammi mo thööth.

¹⁰'Ba ge doo tïïya gïï mo beyø, kaawat mana doo tïïc määnni mo wø köö ni geno jïëy ki luum Jwøk.

¹¹Beerra man ö dhaage ni kwany luup ni eni lïŋö, ni mwöl.

¹²'Ba aani, a ba jïëy ki dhaagø ki man pööe, wala ki man tïme na wïth cwøw. 'Ba eni doo lïŋö jaak.

¹³Kiper Adam beeye na kwøŋ cwääc, ni cwääc Iip køøre.

¹⁴'Ba paa Adam na cøøgi, 'ba beeye dhaagø na cøøgi ni tïme na ŋata dhal luum Jwøk.

¹⁵'Ba dhaagø okøny thuwø kiper mana nywøl jiy, ni näk eni puta bëëtö ri ŋäädhe ki mëër, ni ena kur keere, ni mwöl.