Read anuak 1 Timöthi 3 Bible Online

1 Timöthi 3 - anuak bible

1 Timöthi 3

¹'Ba luummi en beeye adïëri. Ni näk dhaanhø manynya man tïme na ŋat wø raŋ acooŋ Jwøk, tïïc mana manynye wøp.

²'Ba ŋat wø raŋ acooŋ Jwøk doo tïmö na dhaanhø mo bäŋ gïn mo jøøŋŋi ri bëëtö mare, mo cïïe aciel, ni ree ee mänö ki raay, ni wïïe leer, ni eno rømø ki wøør, na ŋat mo pänhnha wëëlle, ni ŋäc pwöc,

³ni patha ŋat meeye, wala ŋat lenye, ni ba wëëyi, 'ba eni doo mwöl, ni cwïnye ba päl ki jammi.

⁴'Ba eni doo pwönynya nyïïe ki jø paare bëët, ni luumme ojïëc nyïïe, ni eno wøør nyïïe ki yïth jammi bëët.

⁵?Kiper ni näk ba løny jï dhaanhø ki man pwöny jø paare, a acooŋ Jwøk ogwøk gø nidïï?

⁶'Ba eni kär näk ŋat mo kanya jïëe yie poot cään, kiper kanymør cwïnye laara jïtö ka atöör, ni päth ya ajäla kaamar anägö.

⁷'Ba wär tïme na dhaanhø mo ŋäc jøø ni en wøk yøø ni bëëtö mare beer. Kiper kanymør eni jïtö ka ajøøŋ, ni päth ya abïëp anägö.

⁸Kaawat manøgø thuwø, jø wø tïny acooŋ Jwøk doo tïmö na jiy mo owøørø, ni bäŋ luup oriewi dhøkge, ni ge patha oŋïyö ki maath kwøŋ mo thööth, ni ge patha owär ki joot jammi.

⁹'Ba ge doo ŋäya ŋäädhe mana näk tiere okwøŋ kan piny, ni bäŋ gïn mo jäälge rege ki gø.

¹⁰'Ba geni thuwø, ge doo kwøŋa päänynyö. Køøre nø, noo nyoothge røkge ni bäŋ gïn jøøŋŋi ri bëëtö marge, wär tïmge na jø wø tïny acooŋ Jwøk.

¹¹Kaawat manøgø thuwø, mään doo tïmö na jiy mo owøørø, ni ge patha dïwääc nyeŋ, 'ba røkge dege mänö ki raay, ni geno ŋäädhö ki yïth jammi bëët.

¹²'Ba jø wø tïny acooŋ Jwøk wär nyöömge ki mään oceele, ni pwönyge nyïïge na wøp ki jø mïëcge bëët.

¹³Kiper jø wø tïny acooŋ Jwøk na wøp, nyeŋge wø tïmö ni wïnyö ni beer, ni ö ŋäädhe marge na en ri Krictø Jecu ni pälle thuwø.

¹⁴'Ba yaa ŋäädhö naa laara ö baŋï. 'Ba a gööra luup moi baŋï,

¹⁵kiper noo näk maa ruu, nee bëët dhaanhø mana dee bëëdö ki gø ya acooŋ Jwøk nee ŋäyï, na näk beeye acooŋ Jwøa kwøw, na näk werø, na cuŋ adïëri ree.

¹⁶Ajïëø møn, ni gïna näk tiere okwøŋ kan mar lam marø, dwøŋ møn. Kiper øøna jïëy, ni ena nyooth kanya tïme na dhaanhø, ni ŋunni ya Jwïëc Jwøki, ni ena neen nyïïatwiet maalli, ni nyeŋŋe okøbø dï mïëri, ni jïëc nyeŋŋe dï piny, ni kïthi maal ka ajiem.