Read anuak 1 Timöthi 5 Bible Online

1 Timöthi 5 - anuak bible

1 Timöthi 5

¹Kär ŋat mo dwøŋ joogï ki luubö mo teek, 'ba köömmï kaawat mana diï wäru köömmö, ni cäännï wøpe kaamar nyïïmeru.

²Ni cäännï cïdëëre kaamar mëëe, ni köömmï nyïïakuue kaamar nyïïmeru, niï ciil ki raay bëët.

³Wøør mään moø ni bëëdö na määr thuunhnhi ni bäŋ ŋat køny ge yøø.

⁴'Ba ni näk cï thøø jïre da obwöre wala nyïïkwaaye, beerra man kwanyge tïïc mana dege tïïö jï tuuŋge dïkwøŋ ki køør bëët jöör Jwøk, ni kønyge jøøa nywøl ge. Kiper gïnögø beeye gïn mo beer nyïm Jwøk.

⁵'Ba dhaaŋ wø näk cï thøø møn, ni dööŋŋa eni keere, wø ŋäätha Jwøk møn, ni put bëëtö ni kwaaya Jwøk cooth, ni lämö ki wärre ki cääŋŋe.

⁶'Ba cï thøø man wø ba kïïn gïr cwøre, eno thøw këël na bëëde ni kwøw.

⁷Køp luummögø jïge, nee bäŋe ŋat jøøŋ geni.

⁸'Ba ni näk da dhaanhø mo tuuŋge ba caame, ni letha per jø paare røk, ŋatøgø nyootha gø ni eno kweer ki lam man, ni kadha rääye døc ki ŋat mo kär jïëy.

⁹Kär dee cï thøø mo nyeŋŋe göör røk määr thuunhnhi ni näk cwiiri moe poot kär tïmö na pïërabïciel, ni nywöm mare patha aciel.

¹⁰'Ba eni wär tïme na dhaagø mo wøp mare ee nyoodhø kiper tïïe moa beyø ni wø tïïe, na ŋat mo piitha obwöre, mo pänhnha jiy, mo lwøga tiet jø Jwøk, mo kønya jøøa näk dëëtge da gïï mo leth, mo puta tïmö ni tïïya gïï wø beyø ki yïth jammi bëët.

¹¹'Ba määr thuunhnhi moø ni therø yøø, kär nyeŋge göör røk määr thuunhnhi. Kiper kanyo tïm cwïnyge ni manynya nywöm, ge jøøl ki bëët jöör Krictø.

¹²Kanyøgø ge jïtö ka ajäla kiper mana taakge kööŋ marge mana dïkwøŋ.

¹³'Ba ki køør bëëtö manøgø thuwø, ge kwänynyö ki bëëtö jaak, ni tïmge ni ge wïïrö jaak ni ge cøøa paani nø, ni cige paani nø. Ni paa bëëtö jaak keere, 'ba ge tïmö ni gena dïwääc nyeŋŋi, ni ge cøøa yïth luup jø møøk, ni ge cara gïï mo ba mïërö ki man carge ge.

¹⁴'Ba a doo naa manynya man nywøm mään moø ni therø yøø, ni nywølge ki jiy, ni jekge mïëcge, nee nyimän ba jïte ki jöö man buu øøni ki gø.

¹⁵Kiper møøk anø luk kur Ceethan.

¹⁶'Ba ni näk da dhaagø mo ojïëy ni ŋäädhe mo jïre da tuuŋge ma määr thuunhnhi, beerra man gwøk geni, nee ba tïme na öölö bäät acooŋ Jwøk, na acooŋ Jwøk tïme ni gwøga määra näk määr thuunhnhi møn.

¹⁷'Ba jaak acooŋ Jwøk moø ni tïïö døc yøø, wär tïmge na jiy mo di wøørø døøc, ni letha per jøø no oööl røk yøø ki køp luum Jwøk ki pwöc.

¹⁸Kiper wø caan wëël Jwøki caanø, ni «Kär niï rïëpa dhi rwaath kany wø dïne ki beel,» ni «Ŋat tïïc doo maga gät tïïc mare.»

¹⁹Kär niï jïëy ki luubö mo di caanø, ni da gïn mo raac mo otïïc jaan acooŋ Jwøki ni näk ba caana jiyi ariiø wala adäk, jøøa ŋäc gø.

²⁰'Ba ni näk da jiy mo poot no onieŋ yïth raay, jook geni nyïm jiy bëët, nee jiy møga putge lwäyö.

²¹'Ba a köömma ïïni nyïm Jwøk, ki nyïm Krictø Jecu, ki nyïm nyïïatwiet maal na näk ojierø, ki man gwøgï luup moi ii, ni bäŋe ŋat mo pere letha eni jïrï, ni luummï aciel kiper jiy bëët.

²²Kär niï läädö ki cïp ceŋ bäät dhaanhø kiper tïny Jwøk, ni ba ciï yïth raay mo ŋat mør. 'Ba bëëdï karï, niï ciil ki raay bëët.

²³Kärï maath pïï keerge këët, 'ba mädhï ki køøŋø mo thiinh kiper yiï, kiper täwe moï cooth.

²⁴Raay mo jø møøk nëënö jaak, ni ŋäc ni ge cøøa kar ajäla, 'ba raay mo jø møga dëëtge onyoothge cään.

²⁵Kaawat manøgø thuwø, gïï wø beyø ni wø tïïc dhaanhe wø nëënö jaak. 'Ba këël doo ba nëënö, ba doo puta bëëtö no okanø.