Read anuak 2 Timöthi 1 Bible Online

2 Timöthi 1 - anuak bible

2 Timöthi 1

¹Aana Pøøl na nyïïatwiel mar Krictø Jecu ki køør mana many Jwøki kiper kwøw mana buue ni di cïbö ni en ri Krictø Jecu.

²A göönna baŋï, ï na wääda ma Timöthi, na mëëra ki ïïni. Met ec, ki bäth-ec, ki bëët-mëër ni en jï Jwøk na näk Wuuö ki Kwääyø ma Krictø Jecu en bäätï.

³Jwøk apwøa, eni na tïnynya ni cwïnya leer bäre, kaawat mana tïïc kwäya, kany wø caara gïrï cooth yïth laam 'moa.

⁴Kany wø para jwøk marï na jwöŋï, cwïnya puta äpö ki wärre ki cääŋŋe ki man neena ïïni, nee cwïnya mïnne.

⁵Naa lääŋŋa ŋäädhe marï na näk adïëri, ni beeye ŋäädhe mana kwøŋ en cwïny waŋu ma Lööi ki meru ma Yuni, ni ŋääa ni ena cwïnyï kawaane.

⁶'Ba a doo naa para wïïï nee wïïï ba wïle ki muuy manø ni cwïnyï enø na cïp Jwøki jïrï ki køør mana cïba ceŋŋa bäätï.

⁷Kiper Jwøk ø käre mooø ki cwïnynyi mo lwäär, 'ba cïpa cwïnynyi mo teek, ki mëër, ki män røk ki raay.

⁸'Ba kär wïïï lääö nø, ki man nyoothï riï kiper Kwääyø, wala kipera, a na tööny eni. 'Ba lwør kurï ri gïïö ni leth yøø, kiper luumma nyään na met, ki køør teek man wø cïp Jwøki jïrï,

⁹eni na piem øøni, na cwøl øøni ki cwönna en kur keere, ni paa kiper tïïe 'moø moa tïïø, 'ba beeye ki køør met ec mare ki mana manynye e keere, ni beeye met yie mana cïbe jïïø cøøn ki ri Krictø Jecu ni piny poot käre cwääö,

¹⁰na nyooth kawaane kiper mana joot Pïëmi marø ma Krictø Jecu, ŋata raany thøø ni käl kwøw, ni beeye kwøw mana näk adïëri mo bäŋ cuŋŋe, ni tïïc gø ni nëënö ki køør luumma nyään na met.

¹¹Ni beeye luummögø na nyään na met na kwany aani kiper nee køba, ni aana nyïïatwiel ni näga dïpööy.

¹²Ni beeye ni jwøra gïï ni leth ii. 'Ba wïïa ba doo lääö, kiper ŋata ŋäädha ŋääa, ni ŋääa ni løny jïre ki man gwøk gïna wëëga eni këël mano këët cäŋöca.

¹³Caath køør luum pwöc mana näk adïëri na wïnynyï baŋa, niï caatha køør ŋäädhe ki mëër na en ri Krictø Jecu.

¹⁴Gwøk gïna näk adïëri na wëëk ïïni, ki køør Jwïëc Jwøk na en kur keere ni bëëdö cwïnynyø.

¹⁵'Ba awïnynyï ni jø Eecia bëët aana wecge, ni ö Pijela ki Ermøjeni ni dwätge ki geni.

¹⁶'Ba bäth-ec mar Wuuö en bäät po Onecipera, kiper aana kønye kwöre mo thööth. Ni wïïe kär lääö ko oguudi 'moa.

¹⁷'Ba kanya pïïe Röm, aana manynye ni yie met døc ni joot aani.

¹⁸'Ba ojïti ki met ec baŋ Wuuö dïcäŋöca. Ni ŋäyï døøc na ateeŋ køny mo nyïëdi na køny aani ki gø yi Epeca.