Read anuak 2 Timöthi 2 Bible Online

2 Timöthi 2 - anuak bible

2 Timöthi 2

¹Ï na wääda nø, bëëdï niï teek ki ri met ec mana en ri Krictø Jecu.

²'Ba mana wïnynyï baŋa buut jøøa thööth na wïny gø, wär wëëk jiy mo iï ŋäädhö mo maara lønyø jïge ki man pwönyge jiy møøk thuwø.

³Lwør kurï ri gïï wø leth, ni ïïna ŋat leny ma wøp mar Krictø Jecu.

⁴Kiper ŋat leny wïïe bäŋ wø maaŋŋe ki tïïe møøk, kiper mano këël wïïe ri tïï ŋata kïth gø yi tïïc ni døøya yi gø mo met.

⁵Ni ŋat wø lääti, bäŋ wø røøny ni näk ba reŋi ka køør dwøl.

⁶Ni beeye ŋat puur man wø tïïö døc, na doo kwøŋ kure lwør ri beel moo kwøŋ ciek.

⁷Caar wïïï ki gïï caana ii, kiper ïïno køny Wuue ki man ŋäyï tiet jammi bëët.

⁸Lääŋ Jecu Krictø na tïŋ maal ki yi thøø, na näk nyikwaar Deebit, kaawat mana en ri luumma nyään na met na caana,

⁹ni beeye luummögø na nyään na met ni jwøra gïï ni leth ii kipere, ni aano twöö ko oguudi kede aana kuu. 'Ba luum Jwøk patha otwöö.

¹⁰Kiper manøgønø, cwïnya yaa maa ki yïth jammi bëët kiper jø Jwøk, nee pïëm man piem geni ki gø na en ri Krictø Jecu jootge thuwø, ni beeye pïëm man wø cäädhi ka ajiema näk adïëri na näk bäŋ cuŋŋe.

¹¹Man beeye luubö ma adïëri: Ni näk øøno thøw ki eni, øøno kwøw thuwø ki eni na aciel.

¹²Wala ni näk cwïnynyø yøø maa, øøno røøny thuwø ki eni na aciel. 'Ba ni näk eni mooŋø mooŋø, ø mooŋe mooŋø thuwø.

¹³'Ba ni näk jïïø bäŋ ŋäädhe, eni mare poot na adïëri. Kiper eni ree ba maar mooŋ.

¹⁴Par wïthge ki gïn, ni köömmï geni nyïm Jwøk, ki man kwierge pïëm tiet luup ni wø bäŋ gïn mo joot rege, 'ba beeye ränynyö keere jï jø wø wïny gø.

¹⁵Put dëërï mak døøc niï ciï nyïm Jwøk ni ïïna ŋat mo ee jïëö, na ŋat tïïc mo wïïe ba lääy, ni luum adïëri iï gwøø døøc na wøp.

¹⁶Kwier luup moø ni ba en jöör Jwøk yøø, kiper jiy bwødhe wøk jöör Jwøk, ni kadhe døc.

¹⁷Ni ö luupge ni tïmge ni nyaa nyïmge kaamar atwøda mo ba caŋŋi. 'Ba Aymeneea ki Piliita adwätö ki geni,

¹⁸jøøa gaa wøk ra adïëri, kiper mana caange gø ni duun wøk ki yi thøø anø tägö, ni raanyge ŋäädhe mar jø møøk.

¹⁹'Ba Jwøk, mare na näk ee këël piny wø cuŋŋa kare, ni ŋïï man ena dëëre na ennø, ni «Wuuö moa näk moe ŋääe,» ni «Jiy bëët mo wø cøør nyeŋ Wuuö, raay wär kwierge.»

²⁰'Ba paac mo beer, patha dääe mo warkey wala dääe mo gwel-bïrö keerge ni wø en yie, 'ba yie da dääk jenni mo otieŋø thuwø, ki dääk odhöönhe, ni møøk tïïc kaper tïïe mo mïërö ni møøk tïïc kaper tïïe moa ba mïërö.

²¹'Ba ni näk dhaanhø dëëre ee jiiø ni wec gïna näk ba mïërö, eni doo tïmö ni caala dak mar tïïa mïërö, no ocïp kur keere ni pere leth døc jï wää paaci, no ojiiŋŋø kiper tïïe moo beyø.

²²Kiper manøgønø, tïïc karï ni bäär ki jap thïnhö, ni këëllï wïïï ri gïïa beyø, ki ŋäädhe, ki mëër, ki bëët-mëër, ni ïïno dwätö ki jø wø cøør nyeŋ Wuuö ki cwïny mo tar.

²³Kär dee gïn jølï ri pïëm luup bøøl moø ni bäŋ tietge yøø. Ŋäyï ni gïïögø wø käla wëëye.

²⁴'Ba laŋ Wuuö ba doo tïmö na ŋat wëëye, 'ba eni doo mwöl jï jiy bëët, na dïpööy mo ŋäc pwöc, ni cwïnye ee cïp piny,

²⁵na ŋat wø pwöny jøøa wïthge teek ni eni mwöl, ni kanymør geno wëëk Jwøki løk cwïny, ki man ŋäcge adïëri,

²⁶nee bøthge ki ya abïëp mar anägö, na kwøŋ ge peec kiper nee mana manynye tïïcge.