Read anuak 2 Timöthi 4 Bible Online

2 Timöthi 4 - anuak bible

2 Timöthi 4

¹A köömma ïïni nyïm Jwøk ki Krictø Jecu, ŋato ŋøl luup jøøa kwøw ki moa näk othøw kanyo ööe noo këël buye piny,

²ki man køpï luum Jwøk cooth ki cwïnyï bäre, kany wø näk ma kare, ki kany wø näk mo patha kare, niï cøga jiy, ni joogï geni, ni köömmï ge, ni pwöc marï ba weyï, niï ba jøøm.

³Kiper da kany mo öö, kanyo ö jiyi noo ba manyge pwöc ma adïëri, 'ba dëëtge omäänyge ki dïpööye moo caan gïïo mïn yïthge ki ge, kiper ïthge na jel ki man wïnyge luup mo ŋweeth.

⁴'Ba ge kweer ki man wïnyge adïëri, ni tïmge ni ge wïïra jöör leer.

⁵'Ba ï ki dëërï, bëëdï karï cooth, ni cwïnyï iï maa ki gïï wø leth, ni tïïyï tïï ŋat wø køp luum Jwøk, nee tïïc marï put thur kare.

⁶Kiper kara acäännö ki man tïïc aani no olämi, ni kar tïŋŋö mara anø cäännö.

⁷Aana këëdö ki leny ma wøp, ni thööra ŋwïëy mara, ni gwøa ŋäädhe.

⁸'Ba køør man nø, Kwäärö, ŋata näk ŋøl mare adïëri, adun wø cïp jï jøøa beyø na kan kipera, omëëk aani dïcäŋöca. 'Ba ba mëëk a keera, 'ba omëëk jiy bëët mo wø mëër ki öönynye.

⁹'Ba mak dëërï ki man laarï ö baŋa.

¹⁰Kiper Diima aana wiie ni aae, kiper mana mëëre ki piny man en, ni ci Thecalönika. 'Ba Karecen aci Galeecia, ni ö Tayta ni ci Dalmacia.

¹¹'Ba beeye Luk keere ni en buuta. Wärï gaa baŋ Maak, ni löömmu ki gø na aciel, kiper eni pere leth jïra ki man køny aani ki tïïc.

¹²'Ba Taykika ajääŋŋa yi Epeca.

¹³'Ba kanyo ööï, koothi mana wiia buut Karpa yi Tarööa, wär kuuï. Ni kuuï weeli thuwø, 'ba letha per weet Jwøk.

¹⁴'Ba Alekdhander na näk rëëmmö atïïö dëëra ki gïn mo leth døc. 'Ba moøgø ocool Wuue dëëre.

¹⁵Gwøk riï thuwø ki eni, kiper eni män døc ki pwöc marø.

¹⁶'Ba kanya kwøŋa tier mara caan, bäŋ dhaanhø mo oö kura. 'Ba jøøgø bëët aana wecge. 'Ba beerra man ba ö Jwøki ni caan gïnögø dëëtge.

¹⁷'Ba Wuuö acuŋŋö buuta, ni wëëk a tëënnö ki man køba luum Jwøk ki kare bäre, kiper nee wïny juurre bëët. 'Ba aana piem ni bødha dhi ŋuu.

¹⁸'Ba Wuuö aano pieme yïth gïïa reyø bëët, ni gwøk aani kiper buye na en maalø. Ajiem en jïre këël na bäre bäre. Enøgønø.

¹⁹Määth Paricka ka Akwila, ki jø po Onecipera.

²⁰'Ba Eracta adööŋ Körin, ni ö Taröpima ni wiia gø piny ni tuu yi Milita.

²¹Mak dëërï ki man laarï öö, kany poot arïïa. Ïïna määth Yubula, ki Puden, ki Lina, ki Kalødia, ki nyïïmëëe bëët.

²²'Ba Wuuö bëëde cwïnyï, ni bëët met eci bäätu.