Read anuak Piliman 1 Bible Online

Piliman 1 - anuak bible

Piliman 1

¹Aana Pøøl na tööny Krictø Jecu, ki Timöthi na näk cöögø. A määtha ïïni, Piliiman, ï na näk omëër marwa na tïïö ki waani na aciel,

²ki nyijøøa na Apia na näk cöögø, ki Arcipa na näk ŋat leny ŋäädhe ki øøni na aciel, ka acooŋ Jwøk mana en paarï.

³Met ec ki bëët-mëër man wø ööi ki baŋ Jwøk na näk Wääø, ki Kwäärö ma Jecu Krictø, bëëde bäätï.

⁴'Ba aani, Jwøa wø pwøa pwøø cooth, kany wø para gïrï ki yïth laam 'moa.

⁵Kiper ŋäädhe marï na en jïrï kiper Kwäärö ma Jecu, ki mëër marï man wø mëërï ki jø Jwøk bëët, wø wïnynya wïnynyö.

⁶Kiper aani, a wø lämö nee ŋäädhe marï nywaagï ki jø møga, nee gïïa beyø bëët na näk 'moø ri Krictø, nee wëëk ŋäc.

⁷Kiper aana jïtö ki met ec mo dwøŋ ki cøm cwïny ki køør mëër marï, coka. Kiper cwïny jø Jwøk amïnnö ki køørï.

⁸Kiper manøgønø, doo løny jïra ki ri Krictø ki man köömma ïïni ki man tïïyï gïna diï tïïö.

⁹'Ba kiper nyeŋ mëër keere doo beerra mana daa ï kwaa, a na Pøøl, ni aana ŋat dwøŋ, a no otööny Krictø Jecu en.

¹⁰A kwaya ïïni kiper wääda ma Onecima, ŋata tïma ni aana wänni yi øt twöc en.

¹¹Dïkwøŋ eni bäŋ gïn mo ee kønyø dëërï, 'ba kawaane atïmö niï maare ka køny, ki aani bëët.

¹²A duua eni baŋï, keda a jääŋŋa cwïnya kiree.

¹³Aani yia doo met døc ki mana dee bëëdö kany buuta, naa tïnynye na karï, kany ena øt twöc en kiper luumma nyään na met.

¹⁴'Ba manøgø ba daa tïïö ni dwørï poot kära wïnynyö, kiper nee met ec marï nee ba tïme keda gïn mo mak ka teek, 'ba doo beerra mana diï gø tïïö ki met cwïnyï.

¹⁵Kanymør gïna tøøre buutï en dïciel, beeye kiper nee duu baŋï nee put bëëte buutï na bäre bäre,

¹⁶ni ba bëëdö kaamar laŋŋø këët, 'ba tïmö na cöögö ni wø mëërö ki gø, ni beeye gïna beerra eni. Ni ena coka møn maa mëër ki gø, 'ba kadha marï røk, kiper ena dhaanhnhï, ni beeye cöögu ki ri Wuuö.

¹⁷'Ba ni näk maa iï ŋäädhö døøc ni aana nyawadu, pänh eni keda mana diï aani pänhnhö.

¹⁸'Ba ni näk da gïn mo raac mo ee tïïö dëërï, wala da gïn mo manynyï manynyø baŋe, pëëny aani ki gø,

¹⁹coola coolø jïrï. 'Ba luubö man gööra aani ki cera, a na Pøøl. 'Ba marï na mayï baŋa ba caana nø, këël dëërï kiree.

²⁰'Ba ka adïëri møn, coka, a manynya met yiï nee jooda ki ri Wuuö. Wëëk cwïnya mïnnö ki ri Krictø.

²¹'Ba kiper mana ŋäädha ïïni døc ni luumma leŋï leŋø, beeye na göönna baŋï en, ni ŋääa ni manøgø tïïyï tïïö ni kaala cer mana caana jïrï.

²²'Ba maya thuwø, øt wëël wär jiiŋŋï kipera. Kiper yaa ŋäädhö ni aano wëëk ööny baŋu ki køør laam mou.

²³'Ba ïïna määth Epapara, ni en øt twöc ki aani na aciel en ki køør Krictø Jecu.

²⁴Ïïna määth Maaki thuwø, ki Aritarka, ki Diima, ki Luk, jø wø tïïö ki aani na aciel.

²⁵Ba met ec mar Kwääyø ma Jecu Krictø bëëde cwïnynyu.