Read anuak Ibaru 1 Bible Online

Ibaru 1 - anuak bible

Ibaru 1

¹'Ba yïth nïne mo acääŋŋe cøøn Jwøk acäänö ki kwäyø ki dhøk nyïïkuk Jwøk, ki uutjïëthe mo thööth ma teeŋi.

²'Ba ki yïth nïne moi ii, ena cäänö ki øøni ki ri Wäädö, ŋata nyoodhe ni beeye lwiidhø mana en jammi bëët cere, ŋata ö eni thuwø na cwääc piny ki køøre,

³ŋata joot ajiem Jwøk dëëre, ni kït Jwøk kiree ena dëëre, ŋata bëën jammi bëët ki dwøre na teek. 'Ba eni, kanya nø wëën ajäl raay, ena pï piny bäät cwïï Kwääya dwøŋ ni en maalø.

⁴Ni tïm kare ni dwøŋŋa eni ki nyïïatwiet maal, kaamar nyeŋŋe ni lïëŋ dï nyeŋge.

⁵?Kiper a nyïïatwiel maal mane na cään Jwøki ki gø, ni «Ïïna Wääda, ni ïïna tïïa ni ïïna Wääda dïcäŋi en»? Wala oköö, ni «Aano tïmö ni aana Wuuö jïre, ni tïme ni ena Wäädö jïra.»

⁶'Ba kanya käl wääde na näk kaa piny, ena köö, ni «Beerra man ö nyïïatwiet maalli mo Jwøk bëët ni wøørge eni.»

⁷'Ba mar nyïïatwiet maal, ee caanø, ni «Beeye wø tïïc nyïïatwiete na jamø, ni tïïc laage na lëëp mäc.»

⁸'Ba mar Wäädö, ee caanø, ni «Ï na Jwøk, wälu marï obëëdö këël na bäre bäre; ni ŋøl ma adïëri otïmö ni beeye athøny kwär mar buyï.

⁹'Ba ï mëër ki bëëtö mo beer niï män ki raay; kiper manøgø nø, Jwøk na näk Jwøï ïïna jøre ki maar met ec, ni kaala mar nyïïawäätu.»

¹⁰Ni cäŋ köö, ni «Ï na Kwäärö, piny caga ïïni wïlöölö, ni maalø tïïya ïïni ki cerï.

¹¹Geno ränynyi, 'ba ïïni, ï dööŋ karï. Geno ränynyi bëët kaamar abïï.

¹²Ni banï ge kaamar jalabiiya, ni wiil geni kaawat man wø wiil abïï. 'Ba ïïni, ï poot bëëdö na karï karï, ni cwiiri moï ba thum.»

¹³?'Ba a nyïïatwiel maal mane na köömme, ni «Pï bäät cwïïa, këël mano tïïa nyïïmän moï na køøm tietï»?

¹⁴?Aŋø, ge paa jwïëy bëët ni wø tïny Jwøk, ni wø jääŋŋi kiper nee jø wø jïti ki pïëm man piem ge ki gø, nee bëënyge?