Read anuak Ibaru 10 Bible Online

Ibaru 10 - anuak bible

Ibaru 10

¹'Ba kiper na tïme ni ciik Modhe beeye nyuudhi mar gïïa beyø na doo öö, ni paa gïïaka ki dëëtge, ba maar lønyø jïge ki man tïïcge jø wø ö baŋ lam no othur karge, ki køør olämme moøgø ni wø cïp cooth ki yïth cwiiri bëët.

²?'Ba onää oløny jï ciigøgø, olämme ba doo naa ege nø wec ki cïp en? Onää jø lam dëëtge onø tïmö ni waany yie aciel na bäre bäre, ge ba doo poodø këët ni da raay mo jwørge jwørø ki cwïnyge.

³'Ba yïth olämme moøgø da gïn mo wø para wïthge ki raay moge ki yïth cwiiri bëët.

⁴Kiper ba doo maara lønyø ki man ö rem rwädhe ki mo dïëk ki mana dege raay wëënnö.

⁵Kiper manøgøøni, kanya ö Krictø piny, ena köö, no «Olämme ki muuce, paa gïïa manynyï. 'Ba da dëël mo iï tïïö kipera.

⁶'Ba olämme mo wø waaŋ bäre, ko olämme mo wëën raay, paa gïïa met yiï ki ge.

⁷'Ba kanyøgø, aana köö, ni ‹A nut ennø; aana öö kuna tïïa mana manynyï, ï na Jwøk, kaawat mana gööri yi Wëël Jwøk kipera.› »

⁸'Ba kanya caan gïïögø ni maalø yøø, ni «Ï ba many olämme ki muuce, ko olämme mo wø waaŋ bäre, wala olämme mo wëën raay, ni yiï bäŋ wø mïnni ki ge,» këël na bëëde ni gïïögø wø cïp ka køør ciik Modhe,

⁹ena cäŋ köö, ni «Neenï, aana ö kuna tïïa mana manynyï.» 'Ba eni wiila luumma dïkwøŋ, kiper nee maya kïth kare.

¹⁰Ni beeye manøce na many Jwøki na tïïc øøni ni ø ena kur keerø, ki køør dëër Jecu Krictø na cïp no olämi yie aciel na bäre bäre.

¹¹'Ba dïlämme bëët, ge wø bëëdö kar tïïe moge ki yïth nïne bëët, ni ge cïpö ki teeŋ olämme moøgø cooth cooth, mo wø ba maar lønyø jïge ki man wëënge raay.

¹²'Ba Krictø, kanya ööe na nø cïp dëëre no olämi yie aciel na bäre bäre kiper raay, ena pï bäät cwïï Jwøk.

¹³'Ba ki mana täge kar kanyøce, eni koora kanya di nyïïmänne tïïö yie na køøm tiete.

¹⁴'Ba beeye ki køør olämi aciel keere na ö eni na tïïc jøøa näk ocïp kur keerge no othur karge na bäre bäre.

¹⁵'Ba Jwïëc Jwøk na en kur keere, mare akøbe jïïø thuwø, na kööe,

¹⁶ni «Wuuö Jwøk aköö, ni ‹Man beeye luubö mano tuuda ki geni køør nïrögøøni, Ciik 'moa okïtha cwïnyge, ni gööra ge wïthge.› »

¹⁷'Ba køøre ena cäŋ köö, ni «Raay moge ki gïïa bacge ba lääŋŋa këët.»

¹⁸'Ba kanya nø wec raay, doo bäŋ olämi këët mo cäŋ cïpö kiper raay.

¹⁹'Ba nyïïmera, kiper mana tïme ni ø tëënnö ki man dønynyø kanya en kur keere na pere leth ki køør rem Jecu,

²⁰na näk jöö mana nyään na kwøw, na jabe kiperø, ki køør abïïna näk ogëëŋö, na näk beeye dëëre,

²¹ni tïme ni jïïø da kwääy lam mo dwøŋ ni en Øt Jwøki cere,

²²beerra man nyiigø kany mo cään ki cwïny ma adïëri, ni ŋäädhe päl cwïnynyø, ni cwïnynyø ojørø ni leer, ni bäŋ raay mo pär cwïnynyø ki ge, ni dëëtø olwøø ki pïï mo tøŋ.

²³Beerra man putø ŋäädhe marø mar yi nyïm mana jïëø ki gøøni maa cwïnynyø ni ø ba dääŋi. Kiper wää buuki dwøre ba dak.

²⁴Beerra man neetø dëëtø ki man cøømmø cwïnynyø ni ø mëër ni tïïø ki tïïe mo beyø,

²⁵ni ba wiiø røømmø kar acooŋ Jwøk, kaawat man wø tïïc jø møga, 'ba cømø cwïnynyø kaa man ŋäyu gøøni enø ni cäŋ Wuuö Jwøk kare acäännö.

²⁶'Ba ni näk mo ø poot cøøa yïth raay ki teek wïc, ni luumma näk adïëri yøø nø kwany, doo bäŋ olämi këët mo dagø kiper raay.

²⁷'Ba dööŋŋa lwäy ajäla mano en nyïm, ki maac mo liel ni raac døc, mano cam jø wø män ki Jwøk.

²⁸'Ba ŋat mo ciik Modhe ee taaø, eni thøw ni bäŋ køny mo joode, ki køør dööt jiy ariiø wala adäk mo wø caan bääyö mare.

²⁹?'Ba a teeŋ rääc ajäla mo nyïëdi nø, na caarru noo rømi ki ŋat mo O Jwøk ee raanynyø, ni käre rem luumma tuut wøørø, mana tïïc eni ni ena kur keere, ni jøøŋ Jwïëc Jwøk ni wø cïp met ec?

³⁰Kiper eni na caan gøøni, ni «Cool kwör beeye mara, ni beeye aani noo cool gø,» ŋääø. Ni cäŋ köö, ni «Wuuö Jwøk mar jiye oŋøle.»

³¹Beeye gïn mo di lwäärö døc ki man päth dhaanhe cer Jwøa kwøw.

³²'Ba cäŋu wïthu caarrø ki nïra kwøŋu beet kanya magu cwïnynyu ki gïïa leth na jwørru, køør mana cwøl u yi tar,

³³na wara jïtu ki gïï mo leth, nou di buuö nyïm jiy bëët ki kwör møøk, ni ki kwör møøk gïï mo leth wø jwørru kaper mana dwallu cwïnynyu ki jø wø caanni na enøgønø.

³⁴Kiper cwïnynyu apädhö ki gïr jø tööc, ni jïëyu ki man twier jammi mou ni yïthu met, kiper mana ŋäyu gø ni jïïu da gïn mo beerra eni mo puta bëëte.

³⁵Kiper manøgønø, kär teek ŋäädhe maru wetu, kiper beeye noo känni ki gïn mo dwøŋ jïïu.

³⁶Kiper manynya man magu cwïnynyu, nee mana many Jwøki tïïyu ni ci buuki jïïu.

³⁷«Kiper dööŋŋa kany mo thiinh, nee eni na doo öö, ööe, ni eni ba ruu.

³⁸'Ba dhaanhnha mana beer, okwøw ki køør ŋäädhe, 'ba noo näk mo ree di kwalø, cwïnya ba many gø këët.»

³⁹'Ba ø ba en dï jø wø kwal dëëtge ni raanynyi, 'ba ø ena dï jø wø jïge da ŋäädhe, ni gwøga jwïëcge.