Read anuak Ibaru 11 Bible Online

Ibaru 11 - anuak bible

Ibaru 11

¹'Ba ŋäädhe beeye wø tïïc jap wø ŋääth yi nyïm ni ŋäc na adïëri, ni nyøtha jammi mo wø näk ba nëëni, ni nutö.

²Ni beeye na ö kwäre na jïëyi ya Jwøki ki køøre.

³Ni beeye ŋäädhe ni ŋääø gø ki man näk mo piny cwääc ka dwør Jwøk, ni tïme ni gïï wø nëëni ii, cwääca ri gïï mo ba nëëni.

⁴Ni beeye ŋäädhe, na ö Eebelli na cïp olämi mana tïmö ni beerra eni jï Jwøk ki mar Keen, ni beeye na jïëc eni ni eni beer ki køøre, kanya ö Jwøki na jïëe ko olämme moa cïbe. 'Ba këël na thøøe, eni poot luubö ki køør ŋäädhe mare.

⁵Ni beeye ŋäädhe na ö Inøki na käli ni kïthi maal nee thøø ba neene, ni käri joodø kiper mana käli ya Jwøki. 'Ba kanya poode ni eni kär kälö, acaan ni yi Jwøk ee døøc mo met.

⁶'Ba ni näk bäŋ ŋäädhe, ba maar lønyø jï dhaanhø ki man døøc yi Jwøk mo met. Kiper ŋat wø nyiik buut Jwøk kany mo cään, wär cwïnye dee ŋäädhe ni Jwøk nutö, ni wø cïpö ki jammi jï jø wø many eni.

⁷Ni beeye ŋäädhe, na ö Noa na leŋ luubö mana caan Jwøki jïre ni tïïc jääy, ni piem jø paare, kanya ö Jwøki na køp gïïa näk poot kär nëënö jïre. Ni beeye gïnögø na jääl piny ki gø, ni tïm Nöa na lwiidhø mar jïëc man wø ööi ki ri ŋäädhe.

⁸Ni beeye ŋäädhe, na ö Eeberammi na leŋ luubö kanya cwøli ni aa kanya wäŋŋi ni cøøa jïre no olaaw. Ni aae ni kanyo ci yie kuue.

⁹Ni beeye ŋäädhe, na ö eni na bëëde yi paana buuk, kaawat man wø bëët wëëllö yi ŋöömö mo path, ni bëëdö yïth oduŋkaare ki Aydhak, ki Jeekap, na näk lwiidhi ki eni ri buuögø na aciel enøgø.

¹⁰Kiper eni neeta pääny mana näk ogeerø na adïëri, na näk dïgëëdi mare ki ŋata tïïc gø beeye Jwøk.

¹¹Ni beeye ŋäädhe, na ö Ceera ki dëëre na jïte ki teek nyöödö, këël na näk eno døøŋŋø ni kare onø pöödhö, kiper na caar ŋata buŋ gø ni dwøre ba dak.

¹²Kiper manøgønø, ki ri dhaanhø aciel, ŋata näk dëëre onø rømø ki thøø, nyïïkwaaye anyaay ni tïmge ni thööth kaamar ceec maal ki nyeŋ akwöny naama dwøŋ wø ba løny ki kwaan.

¹³'Ba jøøi bëët ii, gena thøø yïth ŋäädhe, ni gïna buuk kär ci jïge, 'ba aneenge ni kare bäär ni mïn yïthge ki gø, ni ege jïëö ni gena jiy mo path mo bäŋ poge bäät piny.

¹⁴Kiper jø wø cäänö na enøgønø, wø nyootha gø ni ge manynya kany mo tïmö na poge.

¹⁵'Ba onää wïthge ege caarø ki gïr paana aacge yie, ge doo jïtö ki jöö man døøkge ki gø.

¹⁶'Ba atïmö ni cwïnyge lääŋŋa paac mana beerra eni, ni beeye paana en maalø. Kiper manøgø, Jwøk wïïe ba laay ki man cwøli na Jwøk marge, kiper da pääny mo ee jiiŋŋø kiperge.

¹⁷Ni beeye ŋäädhe, na ö Eeberammi na cïp Aydhak no olämi kanya päänynyi ya Jwøki. Ni ö eni na ci buuki jïre, ni put jïëy ki man cïp wääde na näk aciel no olämi,

¹⁸ŋata gïre caan, ni «Beeye Aydhak noo cak nyïïkwaayï ki ree.»

¹⁹Kiper ee caarø ni løny jï Jwøk, këël ki man tïŋ jiy maal ki yi thøø. Kiper manøgønø, doo caanø, ni ena thøw, ni cäŋi jootø.

²⁰Ni beeye ŋäädhe, na ö Aydhaki na kwac gwïëth bëët moo en nyïm nee ci ri Jeekap ki Icøø.

²¹Ni beeye ŋäädhe, na ö Jeekapi, kanya thøøe, na gwïëth wäät Jocep karge riet, ni wøør Jwøk ni ree ee jääŋö ka athøra mare.

²²Ni beeye ŋäädhe, na ö Jocepi na caan wääth mar jø Icriel, kanya tïm kare ni cään ki thøø, ni cem ge kiper cuuwe.

²³Ni beeye ŋäädhe, na ö Modhe na kani ya menni ki wänni ki dwäde adäk kanya nywøli, kiper na jootge nyilaal na wøp, ni kärge lwäyö ki dwør nyeya.

²⁴Ni beeye ŋäädhe, na ö Modhe na kweere ki man cwøli ni ena o nyi Peerø kanya døøŋŋe.

²⁵Ni tïme ni jiera bëët caarø ki jø Jwøk na aciel, ki mana di yie mïnnö ki jap raay ni wø laar jøølø.

²⁶Ni ee caarø na abuua mana buui ki gø kiper Krictø beeye kwärö eni mana dwøŋ ki kwär mar Ijep, kiper na neet gïno cïp yi nyïm.

²⁷Ni beeye ŋäädhe, na ö eni ni wec Ijep ni kär lwäyö ki wëëc nyeya. 'Ba cwïnye ee maa ni tïme keda neeta Jwøk ni wø ba maar neen.

²⁸Ni beeye ŋäädhe, na ö Modhe na gwøk Cäŋa Pööth Thøøe Yie, ni jør rem, kiper nee ŋata ö kuna 'näk kaai nee kaai mo jø Icriel ba gude.

²⁹Ni beeye ŋäädhe, na ö jiyi na kaathge Naama Kwaar, ni ge cäädhi ka kany mo otal. 'Ba na ö jø Ijepi na ŋwaalge gø, gena mut.

³⁰Ni beeye ŋäädhe, na ö kiir mar Jerikö na pädhe køør mana wïr lage ki cääŋŋe abïriiø.

³¹Ni beeye ŋäädhe, na ö Reeyapi na näk kääbi na käre thøw na aciel ki jøøa wïthge teek, kiper na pänh jøøa liew paac ki mëër.

³²?Agïnaŋø mør nø, noo cäŋa caannø? Kiper piny pöödhö bääta noo caana gïr Gidien, ki Barak, ki Camcøn, ki Jepta, wala mar Deebit, ki Camiel, ki gïï nyïïkuk Jwøk,

³³jøøa dïïm mïëc nyeye ki køør ŋäädhe, na ŋøl luup ki ŋøl ma adïëri, na joot gïïa buuk, na mec dhøk ŋuuwe,

³⁴na jwöc mäc mo døøŋŋø, na bøth dhøk opëëlle, na tïïc ni ge teek ki ri jäk, ni tïmge na atïëte mo tøŋ, ni riemge lwaa lenye mo juurre.

³⁵Ni ö määnni ni jootge jicge moa thøw ki køør mana duuge wøk ki yi thøø. Ni ö møøki ni caari, ni kweerge ki man pät geni, kiper nee ge cäŋge duu wøk ki yi thøø, ki kwøw mana beerra eni.

³⁶Ni ö jø møøki ni buui ni pööti, ni ö møøki ni tööc geni ko oguudi ni kïth ge øt twöc.

³⁷Ni këër ge ki kïte këël mana thøwge, ni ŋøør ge na thäŋi, ni nääŋ geni ko opëëlle, ni ge wïïrö jaak ni ge käära duup rööm ki mo atëëe, ni ge can, ni ge jøøya gïï mo leth, ni ge di caannø,

³⁸ni ge wïïrö dï paap ki bäät kïte, ki yïth buri ki kwör mo ŋammø piny, ni beege jøøa beyø na näk ba doo rømø ki man bëëtge dï jø piny.

³⁹'Ba jøøgø bëët, këël na ŋäc geni møn ni jïge da ŋäädhe, gïna buuk kär ci jïge,

⁴⁰kiper mana tïme ni da gïn mør mo beerra eni mo ŋäc Jwøki kiperø, ki man näk mo ge ba thur karge ni ø tøør.