Read anuak Ibaru 12 Bible Online

Ibaru 12 - anuak bible

Ibaru 12

¹Kiper manøgønø, na tïme ni buutø da teeŋ lwaa lïŋŋe mo thööth ma yøøgø nø, beerra man ööø thuwø ni cïbø gïïö ni peek yøø piny, ki raay no onigän dëëtø ii, ni ŋwieø ŋwïëy man en nyïmmø en, ni cwïnynyø yøø maaø,

²ni ø neeta Jecu, eni na täk ŋäädhe marø ni wø tïïc gø nee thur kare, ni beeye ŋata jïëny thøw bäät jaadha no odëëdö kiper met ec mana en nyïme, na taak laac wïc, ni pï piny buut wäl Jwøk bäät cwïïc.

³Caarru eni na jïëny teeŋ männa män jø raayi ki gø, kiper nou ba ööllu ni räny cwïnynyu.

⁴'Ba leny maru ki raay, u poot kär cööp ri køny remmu piny.

⁵?Aŋø, wïthu awïl ki luumma købe jïïu kede köömma wääte? na kööe, ni «Wääda, kär pwöc Wuuö Jwøk neetï keda gïn mo jööt jaak, ni ba räny cwïnyï ki juuk mare.

⁶Kiper Wuuö Jwøk wø pwönynya jø wø mëëre ki geni, ni pwöt wääte bëët mo wø jïëe ki ge.»

⁷Jïënynyu gïï mo leth ni beeye pwöc. Kiper u käär Jwøki ni uuna wääte. ?A wäädö mane ni bäŋ wø pwöny wänni?

⁸'Ba ni näk mo uuno wiiø nou ba pwönynyi ki pwöc man wø pwöny øøni bëët ki gø, u tïmö ni uuna wäät akwanya nou patha wääte këët.

⁹'Ba jïïø da wëëe piny thuwø mo wø pwönynya øøni, ni wøørø geni. ?Aŋø nø, ni ba jïëø ki Wää jwïëy 'moø ni kwøø?

¹⁰Kiper wëëgø øøna pwönyge ki kany mo thiinh kaawat mana manyge, 'ba Jwøk ø wø pwönynye kaper nøø bëënynyø, nøø tïmø ni ø ena kur keerø na mo Jwøk ki eni na aciel.

¹¹Kiper pwöc nëëni keda gïn mo leth kawaane ennø, ni patha gïn mo beer. 'Ba køøre cään obëënynyi jï jø wø ŋïïyi ki gø, ni cïpe ki bëët-mëër ki bëënynyö jïge.

¹²Kiper manøgønø, tïŋu ceŋŋu maal no oniläp yøø, ni wëëgu cøŋŋu moa no ojöönyö tëënnö.

¹³Ni tïïu ki uutjïëthe mo thïŋŋö kiper tietu, kiper nee ŋat wø kwömi nee waŋ ocwiie ba needunynya, 'ba nee bëënynye.

¹⁴Manynyu ki man bëëdu ki bëët-mëër ki jiy bëët, ni manynyu man tïmu nou ena kur keeru na mo Jwøk, kiper bäŋ ŋat mo Wuuö dee neenø ni näk ba en kur keere.

¹⁵Gwøgu røgu nee bäŋe ŋat mo kääŋi ki met yi Jwøk, nee bäŋe gïn mo keec mo tuy ni ööl uuni, ni raany jiy mo thööth.

¹⁶Ni bäŋe ŋat mo bëëte patha kare, wala ŋat mo taaga Jwøk, ni caala Icøø na ŋeew dööŋö mare ki kar cam aciel.

¹⁷Kiper ŋäyu ni køøre cään kanya tïme ni manynya gwïëth mana doo ci jïre, ena kwier, kiper na käre jïtö ki jöö man cäŋ wïïe caarrø ki gø, këël na many gø ni eni jwöŋö ki pï nyeŋ.

¹⁸Kiper u kär ö baŋ gïn mo di mulö, kaamar Kïn Caynay, na neen kwäyu ni bääte da maac mo liel, ki muudhö, ki kany mo dhïïth, ka atuunna,

¹⁹ki dwør tuuŋ, ki dwøl mo luupe tïïya jøøa wïny gø ni kwääö nee bäŋe luubö mør mo cäŋ caannø jïge këët.

²⁰Kiper gena tïmö ni ge lwäär ki luumma køp jïge, ni «Këël doo naa lääy noo gut kïnnögø, doo këërö ki kïte.»

²¹Ni näk adïëri møn, kiper na tïm gïna joot ni kännö ki lwär mo raac døc, Modhe aköö, ni «Dëëra atïmö ni kwanynyi ki lwär.»

²²'Ba u ööa bäät Kïn Dhayan yi pääny Jwøa kwøw na näk Jerucalem mar maal, ki nyïïatwiet maal mo ba maar lønyø ki kwaan na näk dëëtge ege cooŋø ki met ec,

²³ki jø Jwøk moa näk ojierø na caal kaai, jøøa näk nyeŋge ogöörö maal. Uuna ö baŋ dïŋut luup na näk Jwø jøw bëët, ki baŋ jwïëc jøøa beyø na näk otïïö no othur karge,

²⁴ki baŋ Jecu na näk nyïjöö mar luumma nyään na tuut, ki baŋ remma jør, na näk meta dwøre ki dwør rem Eebel.

²⁵Gwøgu rou nou ba kweerru ki ŋatøgø ni cäänö enø. Kiper ni näk jøøka kär bøth kanya kwierge ŋata kööm geni piny, ø ba bøth na bäre bäre ni näk ŋat wø kööm øøni ki maal yøø kwierø.

²⁶Kanyøca piny atïïc dwøre ni jäŋŋi, 'ba kawaane ena bugö, ni «Poot da aciel mør, kanyo cäŋa piny tïïyö ni jäŋŋi, ni paa piny keere, 'ba këël maalø thuwø.»

²⁷'Ba luummi na kööe, ni «Poot da aciel mør,» caana gø ni gïï wø jäŋŋi, daae daa, ni beege jammi moa no ocwääö, nee gïï wø ba maar jäŋ, nee dööŋge.

²⁸Kiper manøgønø, beerra man dwøgø pwøc jïre kiper mana jïtø ki bura mo ba maar jäŋŋi, ni tïnynyø Jwøk ni ø tïïya gïï wø mïn yie ki ge, ni ø pwøya eni ni yøø wøørø, ni ø lwäär.

²⁹Kiper Jwøk marø beeye maa wø räänyö.