Read anuak Ibaru 2 Bible Online

Ibaru 2 - anuak bible

Ibaru 2

¹Kiper manøgønø, wär ïthø ciiø døøc ki gïïa wïnynyø, kiper kanymør ø pöödhö ki buutge.

²'Ba ni näk luumma køp nyïïatwiet maalli beeye adïëri, ni ö jøøa dhal gø bëët ki jøøa wïthge teek ni jïtge ki pöödö mo rømø ki gø,

³?a øøni, øøno bødhø nidïï, ni näk teeŋ pïëm man piem jiy ki gø manø ni dwøŋ enø yøø wiiø? Kiper akwøŋ Kwäärö køp, ni ö jøøa wïny dwøre ni nyoothge gø jïïø ni beeye adïëri.

⁴Ni Jwøk thuwø ojïëy ki mare ki køør nyuuthe ki tïïe mo døøŋŋø døc, ki gïï mo rëëma ec ma teeŋi, ki muuce moa ö ki ri Jwïëc Jwøk na en kur keere, na pääŋŋe kaawat mana manynye keere.

⁵Kiper paa nyïïatwiet maal na kööm Jwøki ni piny mano ööi oen ceŋge na kwääri, ni cäänwa kipere en.

⁶'Ba da kany mo ogöörö yie, ni «?Dhaanhø agïnaŋø, ni lääŋŋï gø en? ?Ni wär dhaanhø agïnaŋø, ni gwøgï gø en?

⁷'Ba eni iï tïïö ni thiinhnha eni ki kany mo thiinh ki nyïïatwiet maal, ni røønyï gø ka ajiem ki wödö,

⁸ni cïbï jammi bëët cere.» 'Ba kanya ö Jwøki na cïp jammi bëët cer dhaanhø, bäŋ gïn mo ee wii wøk, ni ba en cere. 'Ba kawaane, jammi bëët poot ba neetø ni ena cere.

⁹'Ba ø neeta Jecu, ŋata tïïc ni thiinhnha eni ki nyïïatwiet maal ki kany mo thiinh kiper nee thøø bele kiper jiy bëët, ki køør met yi Jwøk. 'Ba ennø, ø neeta eni no orøønyø ka ajiem ki wödö kiper thøwa leth na jwøre.

¹⁰Kiper orømø jï Jwøk, eni na en jammi bëët jïre, ni ööi ki baŋe, ki man tïïc ŋata bwøth jiy jöör pïëm man piem geni ki gø no othur kare ki køør gïïa leth na jwøre, kanya ö eni na käl nyïïe mo thööth kar ajiem.

¹¹Kiper eni ni wø tïïc jiy ni ena kur keerge, ki jøøa no otïïö ni ena kur keerge yøø, wääge aciel. Ni beeye tiere ni ba laac wïïe ki man cwøl geni ni nyïïmenni,

¹²kanya caan gø, ni «Aani nyeŋŋï caana caanø jï nyïïmera, ni pwøa ïïni ya acooŋ Jwøk.»

¹³Ki kanya cäŋ köö, na «A bëëdö naa ŋäätha eni.» Ni cäŋ köö, ni «Aani en, ko obwöre moa cïp Jwøki jïra.»

¹⁴Kiper manøgønø, na tïme ni jøøgø beege jic dëël ki remø, eni ki dëëre, ena tïmö na dhaanhø kaamarge, kiper nee ŋata en teek thøø cere na näk anägö, nee raanynye ki køør thøwe,

¹⁵ni pät jiy bëët yi laŋ mar thøø na lwäärge ki gø yïth nïne moge bëët.

¹⁶Kiper adïëri møn, paa nyïïatwiet maal na öönynye, 'ba beeye nyïïkwaac Eeberam na öönynye nee kønye.

¹⁷Ni beeye tiere na kwøŋi tïïc ni caala nyïïmenni ki yi bëëte bäre, kiper nee eni tïme na Kwääy Lam Mo Dwøŋ yi tïï Jwøk, mo yie bäth mo oŋäädhö, nee raac jiy wëënne.

¹⁸Ni løny jïre ki man køny jø wø päänynyi, kiper eni ki dëëre gïï mo leth akwøŋ jwør, ni päänynyi.