Read anuak Ibaru 3 Bible Online

Ibaru 3 - anuak bible

Ibaru 3

¹Kiper manøgønø, nyïïmera, u na en kur keeru na mo Jwøk, ni nywaak cwönna öö ki maal, caarru gïr Jecu, na näk Nyïïatwiel na Kwääy Lam Mana Dwøŋ mana jïëø ki gø.

²Kiper eni dwør ŋata jier gø agwøe kaamar Modhe thuwø na gwøk tïïe mo Øt Jwøk.

³'Ba Jecu atïmö no orømø ka ajiem mo dwøŋ døc ni kaala mar Modhe, kaamar dïgëëdi ni wø nyeŋŋe pwøc ni kaala øtø.

⁴Kiper uudi bëët, wø da dïgëëte moge, 'ba dïgëëdi man wø geer jammi bëët beeye Jwøk.

⁵'Ba Modhe tïï Øt Jwøk bäre agwøe ni ena ŋat tïïc mo oŋäädhö, ni køp jammi moa doo caan Jwøki yi nyïm.

⁶'Ba Krictø Øt Jwøk agwøe ni ena wäädö. 'Ba beeye øøni na øde, ni näk mo ø puta bëëtö ni cwïnynyø yøø maa ki mana jïëø ki gø, ni ø jeemma ŋäädhe marø.

⁷Kiper manøgønø, kaawat mana caani ya Jwïëc Jwøki na en kur keere, ni «Dïcäŋi, noo wïnynyu dwøre,

⁸kär cwïnynyu døøyu mo teek, ni caala dïcäŋ mar ageem, cäŋa näk cäŋ päänynyö dï paap,

⁹kanya ö kwäyu na päänyge aani, ni jootge tïïe 'moa ki cwiiri ma pïëraŋween.

¹⁰Kiper manøgønø, cwïnya aränynyö ki beenhnhece, ni kööa, ni ‹Cooth cwïnyge wø gaa wøk, ni uutjïëthe 'moa poot ba kwanyge.›

¹¹Kaawat mana kööŋa kanya goota, ni kööa, ni ‹Ge ba doo dønynya kar jwöm mara bäre bäre.› »

¹²Nyïïmera, gwøgu rou nee bäŋe dhaanhø dïïu mo cwïnye jïti ki raay ni tääe, ni gaa wøk cer Jwøa kwøw.

¹³'Ba beerra man köömmu røgu keeru cooth, kany poode na dïcäŋi en, nee bäŋe ya dhaanhø aciel dïïu mo cwïnye tïmö ni teek kiper mano cøøgi ya raayi.

¹⁴Kiper ø dwäti ka Krictø, ni näk gïna kwøŋø ŋääth yøø maa cwïnynyø møn këël cuŋŋe;

¹⁵kaawat mana no ogöörö, ni «Dïcäŋi en, noo wïnynyu dwøre, kär cwïnynyu døøyu mo teek ni caala dïcäŋ mar ageem.»

¹⁶?'Ba a jøøe moe na wïny gø, ni pootge ni ge poot gëëmö, këël na wïnyge gø? ?Aŋø, paa jøøa ö wøk ki Ijep bëët ni ge bwøtha Modhe?

¹⁷?Na a jøøe moe na räny cwïny Jwøki ki ge ki cwiiri ma pïëraŋween? ?Aŋø, paa ge jøøgø bëët na bääyö, na thøø dï paap?

¹⁸?Na a jøøe moe na kööŋe kiperge, ni «Ge ba doo dønynya kar jwöm mara bäre bäre?» ?Aŋø, paa ge jøøa wïthge teek?

¹⁹Kiper manøgønø, ajoodø ni kär løny jïge ki man dønyge kiper na tääge.