Read anuak Ibaru 4 Bible Online

Ibaru 4 - anuak bible

Ibaru 4

¹Kiper manøgønø, kany poode ni buuk mar ciin kar jwömö mare poot nut en, beerra man caarø wïthø, kiper nee ba caan ni uuna kääŋö ki gø.

²Kiper luumma nyään mar jwömö aö baŋø kaawat mana ö baŋge. 'Ba luubö mana wïnyge bäŋ gïn mo beer mo ege joodø ree, kiper mana kärge jïëy ni ŋääthge gø.

³Kiper øøni na näk ojïëy, ø dønynya kar jwömöce, kaawat mana caan gø, ni «Kaawat mana kööŋa kanya goota, ni ge ba doo dønynya kar jwöm mara na bäre bäre,» këël na thum tïïe moe ki kanya täk pinynyi.

⁴Kiper da kanymør yi Wëël Jwøk mo cäänö kiper bïriet nïne mo ogöörö na enønø, ni «Jwøk ree ajwöme ki tïïe moe bëët ri bïriet nïne.»

⁵Ni cäŋ mana kwøŋ caan nwøyø kany thuwø, ni «Ge ba doo dønynya kar jwöm mara na bäre bäre.»

⁶'Ba kiper mana tïme ni da jiy mo poot dønynya kar jwömö manøgø, ni kääŋ jøøa kwøŋ luumma nyään na met wïnynyö ki man dønyge yie, kiper mana teek wïthge,

⁷ena cäŋ cïpö ki cäŋ mør, kiper nee jø møøk dønyge yie. Ni beeye dïcäŋi en, na caane cään ki ri Deebit køør mana näk ee caanø cøøn. Ni beeye luupi ii na nø caan en, ni «Dïcäŋi noo wïnynyu dwøre, kär cwïnynyu døøyu mo teek.»

⁸Kiper onää geno mooc Jøcua ki jwömö, Jwøk cäŋ mør ba dee cäŋa caannø.

⁹Kiper manøgø nø, cäŋa näk cäŋ jwömö poot nutö jï jø Jwøk, na caal cäŋa ö Jwøki na jwöm ree ri bïriet nïne.

¹⁰Kiper ŋat wø ci kar jwöm Jwøk, tïïe moe wø wiie wiiø thuwø, kaamar Jwøk na jwöm ree ki tïïe moe.

¹¹Kiper manøgønø, beerra man maa dëëtø ki man dønynyø kar jwömöce, nee bäŋe ŋat kääŋi kiper teek wïc mo caala manøgø.

¹²Kiper luum Jwøk beeye gïn mo kwøw ni tïïö, ni betha eni ko opëëllö mo lage ariiø, ni cööbö këël man wø pääŋ kwøw ki jwïëy, ki mut ki maar cuu, ni ŋäya acaany cwïny ki mo wø many cwïnynyi.

¹³'Ba bäŋ gïn mo okanø røk moa no ocwääö bëët, 'ba jammi bëët ena wøgø, ni nëënö jï Jwøk jaak, eni noo cuŋŋø nyïme.

¹⁴'Ba na tïme nø, ni jïïø da Kwääy Lam Mana Dwøŋŋa eni, ŋata pöödhö ki dï pøøl na døø maal, ni beeye Jecu, O Jwøk, beerra man putø mana jïëø ki gøøni maa cwïnynyø.

¹⁵Kiper Kwääy Lam Mana Dwøŋ man na marø en, paa ŋat mo cwïnye ba maar pädhö ki gïr jäk marø. 'Ba beeye ŋata päänynyi ki yïth jammi bëët kaamarø, 'ba eni kär pädhö.

¹⁶Kiper manøgønø, beerra man nyiigø buut wäl met ec ni yøø ŋäädhö, kiper nøø jïtø ki bäth ec, ni joodø met ec mano køny øøni kany wø cännø.